ۇلىبريتانيادا ينفلياتسيا سوڭعى 40 جىلدا ەڭ جوعارى دەڭگەيگە جەتتى. نارىقتى قىمباتشىلىق جايلادى. ءبىرىنشى كەزەكتە ەلەكتر ەنەرگياسى مەن ازىق-ت ۇلىك باعاسى كۇرت وسكەن. جارىق قۇنى ءبىر جىلدا 50 پايىزعا كوتەرىلسە, گاز باعاسى 2 ەسەگە قىمباتتاعان.
نەگىزى ۇلىبريتانيادا باعا تۇراقسىزدىعى وتە سيرەك كەزدەسەتىن جاعداي. سوڭعى 70 جىل ىشىندە ەل ءۇش مارتە باعا تۇراقسىزدىعىن باسىنان كەشكەن, 1950 جىلداردىڭ باسىنداعى كورەي سوعىسى كەزىندە جانە 1970 جىلداردىڭ ورتاسى مەن اياعىنداعى ەكى مۇناي داعدارىسىنان كەيىنگى جىلدارى. سونداي-اق Falklands (فولكلەند) سوعىسىنا دەيىنگى 40 جىل ىشىندە ينفلياتسيا 10 پايىزدان جوعارى كوتەرىلگەن جوق, الايدا الەمدىك پاندەميادان سوڭ ءومىر ءسۇرۋ قۇنىنا قىسىم كۇشەيە ءتۇستى.
ۇلتتىق ستاتيستيكا باسقارماسى (ONS) باعانىڭ ءوسۋى بارلىق سالادا دەرلىك بايقالعانىن ايتادى. ازىق-ت ۇلىك باعاسى, اسىرەسە قاتتى ءوستى, سونداي-اق كيىم مەن اياقكيىم, مەيرامحانالار مەن قوناقۇيلەر, دەمالىس پەن مادەنيەت ورىندارى قىزمەتىنىڭ قۇنى دا شارىقتادى. «زاۋىتتان شىققان تاۋارلاردىڭ باعاسى وتكەن ءبىر جىلمەن سالىستىرعاندا 17 پايىزعا وسكەن, بۇل 45 جىلداعى ەڭ جوعارى كورسەتكىش», دەيدى قارجى سالاسىنىڭ ماماندارى.
دەگەنمەن تۇماندى البيونداعى مۇناي باعاسى تومەن, بۇل باياۋ بولسا دا, قازىرگى اسپانداپ تۇرعان اۆتوكولىك جۇرگىزۋشىلەرىنىڭ بەنزين مەن ديزەلگە تولەيتىن باعاسىنا اسەر ەتەدى دەگەن پىكىردە قارجىگەرلەر. قىمباتشىلىققا قاراماستان, ينفلياتسيانىڭ جىلدىق قارقىنى ءالى ءوزىنىڭ شىڭىنا جەتكەن جوق. ۇلىبريتانيا بانكىنىڭ بولجامىنشا, قازان ايىنداعى ينفلياتسيا 13,2 پايىزعا جەتۋى مۇمكىن. بۇگىندە ازىق-ت ۇلىك, جانار-جاعارماي, الكوگول جانە تەمەكىنى ەسەپتەمەگەندە ينفلياتسيا شىلدەدە 6,2%-دى قۇرادى, ماۋسىمدا 5,8%-عا جەتكەن بولاتىن. ال نارىقتاعى باعا مەن جالاقى اراسىنداعى تۇراقتى الشاقتىق ساۋدا-ساتتىقتىڭ تۇرالاپ قالۋىنا اكەپ سوعۋدا. حالىقتىڭ تابىسى 3 پايىزعا ازايعان.
ال ۇلىبريتانيا بانكىنىڭ توراعاسى ەندريۋ بەيلي ينفلياتسيا كەزىندە ەڭبەك ادامدارى جالاقى كوتەرۋدى سۇراۋدان باس تارتۋى قاجەت ەكەنىن ايتادى. «ەگەر بارلىعى ينفلياتسيانى جەڭۋگە تىرىسسا, كەرىسىنشە ول تومەندەمەيدى, تەك ناشارلاي بەرەدى», دەدى ول BBC Radio 4-ءتىڭ Today باعدارلاماسىنا بەرگەن سۇحباتىندا. بىرىككەن كورولدىكتە تەمىرجول مەن اۆياتسيادان باستاپ پوشتا مەن تەلەكوممۋنيكاتسياعا دەيىنگى سالالارداعى قىزمەتكەرلەر ەرەۋىلگە دە شىقتى. ويتكەنى قۇبىلمالى باعا نارىعىندا ءومىر ءسۇرۋ كەدەيلەردىڭ جاعدايىن ودان ءارى ناشارلاتا ءتۇستى. ەندريۋ بەيليدىڭ ايتۋىنشا, ەلدە سوڭعى ەكى جىلدا جۇمىس كۇشى قىسقارعان. «مەن ەل بويىنشا كوپ ساياحاتتايمىن. كاسىپكەرلىكپەن اينالىسامىن. ەلدەگى كومپانيالار ءبىرىنشى كەزەكتە ادامداردى جالداۋ كەزىندە كەزدەسەتىن قيىندىقتار تۋرالى سۇرايدى. ويتكەنى ءاربىر مەكەمە جۇمىسشىلاردىڭ تۇراقسىزدىعىنا تاپ بولىپ جاتىر. جالاقى وسپەيتىن جەرلەردە ادام تۇراقتامايدى. الايدا تۇرعىندار مۇنىڭ قارجى ساياساتى ەكەنىن تۇسىنبەيدى», دەدى بانك توراعاسى.
سونداي-اق قارجىلىق زەرتتەۋلەر ينستيتۋتىنىڭ ديرەكتورى پول دجونسوننىڭ ايتۋىنشا, كەلەسى پرەمەر-مينيستر ءۇي شارۋاشىلىعىن جانە NHS سياقتى نەگىزگى قىزمەتتەردى قولداۋعا ميللياردتاعان قاراجات جيناۋى كەرەك. «كۇزدە بولاتىن ون ءۇش پايىزدىق ينفلياتسيا مەملەكەتتىڭ قارجىسىنا ايتارلىقتاي اسەر ەتەدى. سوندىقتان بيلىككە ءۇي شارۋاشىلىعىن قولداۋ ءۇشىن تاعى دا ميللياردتاعان اقشا تابۋ كەرەك بولادى», دەدى ول.
كانادادا دا باعا تۇراقسىزدىعىنىڭ كورسەتكىشى ءوسىپ بارادى. شىلدە ايىمەن سالىستىرعاندا تامىزدا ازىق-ت ۇلىك باعاسى 9,9 پايىزعا ارتقان. ستاتيستيكا اگەنتتىگى تاراتقان اقپارات بويىنشا مۇنداي كورسەتكىش سوڭعى 41 جىلدا العاش رەت تىركەلىپ وتىر. قازىر كانادالىق بيلىك پەن قارجى ورتالىقتارى داعدارىستى ەڭسەرۋ ءۇشىن ءتۇرلى ءىس-شارالاردى قولعا الدى. ماسەلەن, «Richmond ازىق-ت ۇلىك بانكى» تۇرعىندارعا تەگىن تاماق ۇلەستىرەتىنىن مالىمدەدى. تەگىن تاماق, الدىمەن, الەۋمەتتىك جاعىنان از قامتىلعان توپتارعا, اتاپ ايتساق, قارتتارعا, بالالار مەن ەلگە جاڭادان قونىستانىپ جاتقان ميگرانتتارعا بەرىلەدى. سونىمەن قاتار ەلدە جانار-جاعارماي مەن پاتەر جالداۋ قۇنى دا وسكەن. «جىل باسىنان بەرى قىزمەت كورسەتۋ قۇنى 19 پايىزعا كوتەرىلدى. ينفلياتسياعا قارسى ءىس-شارالار تىزبەگىن بەكىتىپ جاتىرمىز. ويتكەنى باعا تۇراقسىزدىعىنىڭ كەسىرىن حالىق قازىردەن باستاپ كورىپ جاتىر, اسىرەسە جالاقىسىز وتىرعاندار قينالۋدا», دەدى «Richmond ازىق-ت ۇلىك بانكىنىڭ» اتقارۋشى ديرەكتورى حاجيرا حۋسەين.
