– ءبىز ءوزىمىزدىڭ ارىپتەستىك ىنتىماقتاستىعىمىزعا قۋانىشتىمىز, ويتكەنى وسىنداي ونەر بايلانىسى, ەڭ الدىمەن كورەرمەندەرگە وڭ ىقپالىن تيگىزەدى, – دەگەن «استانا وپەرا» تەاترىنىڭ ديرەكتورى, قازاقستاننىڭ ەڭبەك سىڭىرگەن قايراتكەرى عالىم احمەدياروۆ ەكى ونەر ورداسى اراسىنداعى ءتالىمدى تاجىريبە باس شاھاردىڭ مادەني ءومىرىن كوركەيتىپ, ودان سايىن بايىتا تۇسەتىندىگىن جەتكىزدى.
ايتا كەتەيىك, قاراعاندى اكادەميالىق مۋزىكالىق كومەديا تەاترى رەسپۋبليكامىزداعى وپەرەتتا مەن ميۋزيكل جانرىنداعى بىردەن-ءبىر ونەر ورداسى سانالادى. جىل سايىن وندا جەتىگە جۋىق جاڭا قويىلىمدار ساحنالانعانىمەن, جالپى تەاتر رەپەرتۋارىندا 200-دەن استام سپەكتاكل بار.
كەندى ولكەنىڭ ابىرويىن اسىرىپ جۇرگەن تەاتردىڭ جەتەكشىسى, قازاقستاننىڭ ەڭبەك سىڭىرگەن قايراتكەرى امانتاي يبراەۆ «استانا وپەراداعى» ونەر ساپارى قاراعاندىلىق تەاتردىڭ ارتىستەرى مەن مۋزىكانتتارى ءۇشىن ايتۋلى وقيعا بولعاندىعىن اتاپ ءوتتى.
– ءبىزدىڭ ۇجىم ەلىمىزدەگى بىرەگەي تەاتردىڭ ساحناسىندا كورسەتۋگە رەپەرتۋارىمىزداعى ۇزدىك دەگەن سپەكتاكلدەردى الىپ كەلدى. ونىڭ ىشىندە الەمگە تانىمال كومپوزيتورلاردىڭ ءبىرى ۆ.باسكيننىڭ جاڭا شىعارماسى, برودۆەي ميۋزيكلىنىڭ ءداستۇرلى جەلىسىمەن جازىلعان «كەنتەرۆيل قامالىنىڭ ەلەسىن», سونداي-اق تەاترىمىزدىڭ نەگىزىن قۇرايتىن كلاسسيكا – ي.كالماننىڭ «تسيرك حانشايىمىن», م.دۋناەۆسكيدىڭ «القىزىل جەلكەندەرىن» جانە ت.ب. تۋىندىلاردى قويىپ, كورەرمەندەردىڭ جاقسى باعاسىن الدىق, – دەدى ا. يبراەۆ.
اتالعان مۋزىكالىق تەاتردىڭ ەلوردالىقتار كوڭىلىنەن شىققان قويىلىمداردىڭ قويۋشى ديريجەرى, بەلارۋس مۋزىكالىق تەاترىنان ارنايى كەلگەن قوناق نيكولاي ماكارەۆيچ گاسترولدىك ساپاردىڭ وتە جوعارى دەڭگەيدە وتكەندىگىن ايتتى.
– بۇل گاسترولدىڭ مەن ءۇشىن ورنى بولەك. اسىرەسە «استانا وپەرا» زالى مەن فويەسىنىڭ ادەمىلىگى ۇنادى. ءوزىم ەۋروپانىڭ كوپتەگەن تەاترىن, سونىڭ ىشىندە ايگىلى ۆەنا وپەرا تەاترىن كوردىم. سوندا دا ماعان وسى ونەر ورداسىنداعى ديزاينەرلەر مەن سۋرەتشىلەردىڭ شەبەر جۇمىسى تاڭعالدىردى. ءۇش سپەكتاكلدىڭ دەكوراتسياسىن بۇزباي, سول كۇيىندە ساقتاۋعا بولاتىن ساحنانىڭ تەحنيكالىق جابدىقتالۋى مەن اكۋستيكاسى كەرەمەت بالەت زالى دا كوڭىلىمنەن شىقتى. مەن ونى «مەتروپوليتەن وپەرا» جانە «لا سكالامەن» قاتار قويار ەدىم, – دەيدى مينسكتەن كەلگەن ماەسترو.
