ايماقتار • 17 تامىز، 2022

كوپبالالى انالاردىڭ قولداۋشىسىنا اينالعان ورتالىق

41 رەت كورسەتىلدى

قوعامدا كوپبالالى انالاردىڭ ماسەلەسى بۇگىنگى تاڭدا وزەكتى سيپات العان. ولاردىڭ ماسەلەسى ءبىرىنشى كەزەكتە ۇكىمەتتىڭ جانە جەرگىلىكتى بيلىكتىڭ ءجىتى نازارىندا تۇر. الەۋمەتتىك تارشىلىق ەڭ الدىمەن، شيەتتەي بالا اسىراپ وتىرعان انالاردىڭ نەمەسە كۇنكورىس تابىسى از وتباسىلاردىڭ يىقتارىنا اۋىر جۇك ارتىپ، قوسىمشا سالماق تۇسىرەتىنى ايان. مۇنداي كەزدە ولاردىڭ جاناشىر جان ىزدەپ، قولداۋعا ءزارۋ بولاتىنى اقيقات. ءيا، مەملەكەت تاراپىنان الەۋمەتتىك از قامتىلعان توپتارعا، سونىڭ ىشىندە كوپبالالى انالارعا از كومەك بەرىلىپ جاتقان جوق.

الايدا بۇل ماتەريالدىق تۇرعىدا عانا ەسەپتەلەتىن جاردەم ءتۇرى. الەۋمەتتىك قيىندىققا تاپ بولعان جاندارعا ءبىرىنشى كەزەكتە كەرەگى ماتەريالدىق كومەكپەن بىرگە، پسيحولوگيالىق قولداۋ مەن قوعامدا ءوز ورنىن تابۋعا بەيىمدەيتىن ورتا جانە دۇرىس باعىت-باعدار سىلتەيتىن جاناشىر ازاماتتار. بۇل ورايدا مەملەكەت باسشىسى قاسىم-جومارت توقاەۆتىڭ پارمەنىمەن انالاردىڭ الەۋمەتتىك جاع­دايىن جاقسارتۋ، وسى وزەكتى ماسەلەنى سىرتتاي عانا شەشۋگە تىرىسپاي، ونىڭ ىشكى ورامدارىنا دا ۇڭىلە وتىرىپ دۇرىس جولدارىن تاڭداۋ كۇن تارتىبىنە قويىلىپ، ناقتى ىستەر قولعا الىنعان بولاتىن. وسىلايشا، رەسپۋبليكا وڭىرلەرىمەن بىرگە شىمكەنتتە دە قالالىق جۇمىسپەن قامتۋ جانە الەۋمەتتىك قورعاۋ باسقارماسىنا قاراستى «باقىتتى جانۇيا» ورتالىعى» كوممۋنالدىق مەملەكەتتىك مەكەمەسى قۇرىلدى.

اتالعان مەكەمە باسشىسىنىڭ ورىنباسارى ەرلان ءالجانوۆتىڭ ايتۋىنشا، پرەزيدەنت قاسىم-جومارت توقاەۆتىڭ تاپسىرماسىنا سايكەس 2020 جىلعى 27 ناۋرىزدا اشىلعان ۇيىم العاشىندا shanyraq وتباسى ينستيتۋتىن قولداۋ ورتالىعى بولعان. كەيىن اتاۋى «باقىتتى جانۇيا» ورتالىعىنا» وزگەرگەن مەكەمە بۇگىنگى تاڭدا از قامتىلعان، كوپ­بالالى وتباسىلارعا جان-جاقتى قول­داۋ كورسەتۋ باعىتىندا جۇمىس جۇر­گىزىپ كەلەدى. ناقتىراق ايتقاندا، شىم­كەنت قالاسى اكىمدىگىنىڭ 2021 جىلعى 4 قا­زانداعى «جەرگىلىكتى بيۋدجەتتەن قارجى­لاندىراتىن كەيبىر كمم-لەر تۋرالى» №1157 قاۋلىسى نەگىزىندە شىمكەنت قالاسى جۇمىسپەن قامتۋ جانە الەۋمەتتىك قورعاۋ باسقارماسىنىڭ «باقىتتى جانۇيا» ورتالىعى» كوممۋنالدىق مەملەكەتتىك مەكەمەسى اشىلدى. قازىرگى تاڭدا مۇندا 31 شتاتتىق بىرلىك بويىنشا ماماندار جۇمىس ىستەيدى. الەۋمەتتىك از قام­تا­ماسىز ەتىلگەن، كوپبالالى وتباسى، قيىن جاع­دايعا تاپ بولعان وتباسىنداعى وزەك­تى ماسەلەلەردىڭ الدىن الۋ ماقسا­تىندا جۇمىسىن باستاعان ورتالىق مامان­دارى­نىڭ ىشىندە پسيحولوگ، مەدياتور، زاڭ­گەر جانە الەۋمەتتىك ساراپشىلار بار. ولار حالىققا جوعارىدا اتالعان ما­سە­­­لەلەر بويىنشا جان-جاقتى قىزمەت كورسەتەدى.

ورتالىقتىڭ كومەگىنە جۇگىنىپ كەلگەن­دەردىڭ ءبىرىن اڭگىمەگە تارتتىق. ەسىمى – ۇلمەكەن جۇماليەۆا. قالا تۇرعىنى. ءتورت بالانىڭ اناسى. ۇلكەنى مەكتەپتە وقىسا، ەڭ كەنجەسى 3 جاستا ەكەن. ءوزىنىڭ ايتۋىنشا، قازىرگى ۋاقىتتا ەش جەردە جۇمىس ىستەمەيدى. وسىندا اتاۋلى الەۋ­­مەتتىك كومەك بويىنشا ازىق-ت ۇلىك الۋعا قۇ­جاتتارىن راسىمدەۋگە كەلگەندە كوپ­با­لالى انالارعا كورسەتىلەتىن قىزمەت تۇر­لەرىن ەستىپ بىلگەن.

– بەس كۇننەن بەرى بيىل 6 جاسقا تولاتىن قىزىمدى لوگوپەدكە اكەلىپ ءجۇرمىن. كورسەتىلەتىن قىزمەتى تەگىن ەكەن. وسى جاعى مەنى ەرەكشە قۋاندىرىپ وتىر. بۇل ورتا­لىقتا مۇنداي تەگىن قىزمەت تۇرلەرى بار ەكەنىن بىلمەپپىن. دەرەۋ قۇربىلارىما حابارلاسىپ، جاعىمدى جاڭالىقپەن ءبولىستىم. ولار دا بۇل جاڭالىعىمدى قۋانا قابىلداپ، قازىر وسى جەرگە بالالارىن اكەلىپ ماماندارعا كورسەتىپ، وزدەرى دە قوسىمشا كۋرستارعا جازىلىپ قويدى. كۋرس دەمەكشى، مۇندا مانيكيۋر-پەديكيۋر كاسىبىنە ۇيرەتەتىن تەگىن كۋرس بار ەكەن. سوعان جازىلدىم. ەندى ساباق باستالسا، بارىپ وقيمىن. جۇبايىم دا تۇراقتى ەش جەردە ىستەمەيدى. قۇرىلىستان تاۋىپ كەلگەن اقشاسىنا جانە 4 بالاعا الا­تىن مەملەكەتتىك جاردەماقىعا جان باعىپ وتىرمىز. نەگىزگى ماماندىعىم – باستاۋىش ءپانىنىڭ مۇعالىمى. بىراق بۇل ماماندىق بويىنشا بۇرىن جۇمىس ىستەگەن ەمەسپىن. مەنى قىزىقتىرىپ وتىرعانى – قىزداردىڭ تىرناعىن ارلەۋشى ماماندىق. بۇل شىنىمەن دە بۇگىنگى نارىقتا وتە سۇرانىسقا يە. ەستۋىمشە، مانيكيۋر جاسايتىنداردىڭ ەڭ تومەنگى قىزمەت اقىسىنىڭ ءوزى 5 مىڭ تەڭگەدەن باستالاتىن كورىنەدى. ەندى سونىڭ وقۋىن وقىپ الىپ، ءوزىم ۇيدەن كىشىگىرىم سالون اشىپ، جەكە كاسىبىمدى باستاعىم كەلەدى. جالپى، مەملەكەتتىڭ ءبىز سەكىلدى الەۋمەتتىك كومەككە مۇقتاج جاندارعا قا­رايلاسىپ، قولىنا سەرتيفيكات الۋىنا، ءبىر كاسىپتى مەڭگەرىپ شىعۋىنا جاعداي جاساپ جاتقانىنا راحمەت. «قىبىرلاعان قىر اسار» دەمەكشى، ءبىر پايدالى ىسپەن شۇعىلدانساق، ايتەۋىر وتباسىن اسىراۋعا، بالا-شاعانىڭ كيىمى مەن تاماعىن تاۋىپ بەرۋگە سەپ. قاشانعى ۇكىمەتتىڭ اۋزىنا قاراپ الاقان جايىپ وتىرا بەرەمىز، جەرگىلىكتى اكىمدىك مۇمكىندىك بەرىپ تۇر­عاندا سونى بارىنشا پايدالانىپ، نەگە وزىمىزشە ارەكەت ەتۋگە، تابىستى كاسىپتى باس­تاۋعا ۇمتىلىپ كورمەسكە، – دەيدى كوپ­بالالى انا.

مەكەمە باسشىسىنىڭ ورىنباسارى ەرلان ءالجانوۆ ورتالىقتىڭ باستى ماقساتى دا سول، ۇيدە وتىرىپ، قوعاممەن بايلانىستان اجىراپ قالعان انالارعا ورتادا ءوز ورنىن تابۋعا، ءبىر كاسىپتى يگە­رىپ، سول بويىنشا تابىسقا جەتىپ، وزىنە، وتباسىنا، جالپى مەملەكەتكە پاي­­داسىن تيگىزۋىنە جاردەمدەسۋ ەكەنىن جەتكىزدى. قاي كەزدە كوپبالالى انالاردىڭ الەۋ­مەتتىك ماسەلەسى وزەكتى بولادى. ەگەر ولار ۇيدە جۇمىسسىز وتىرسا، وتباسىلىق تابىسى وتە تومەن بولسا، قوعامنىڭ تەڭ مۇشەسىندەي وزدەرىن سەزىنە الماسا. مىنە، وسى كەزدە الەۋمەتتىك كيكىلجىڭ تۋىن­دايدى. ال بۇل دارەجەگە جەتكىزبەۋ ءۇشىن انالاردىڭ سۇيىكتى ىسىمەن اينالىسۋىنا مۇمكىندىك جاساۋ ماڭىزدى. نە ۋاقىتشا بالا تاربيەسىندە بولۋى نەمەسە ۋاقىتىنىڭ ءبىراز بولىگىن سۇيىكتى كاسىبىنە ارناپ وتىرۋى قاجەت. «اش ادامعا بالىق بەرمە، قارماق بەر» دەمەي مە؟! وسى قاعيدا بويىنشا جۇمىس ىستەيتىن ورتالىق قىزمەتكەرلەرى كاسىپ يگەرگەن نازىك جاندىلار نەعۇرلىم كوپ بولسا، سوعۇرلىم جۇمىسسىزدىق دەڭگەيى ازايىپ، الەۋمەتتىك جاعداي دا تۇراقتالادى دەپ ەسەپتەيدى. مەكەمەنىڭ بيلىك پەن قاراپايىم حالىقتىڭ اراسىندا «التىن كوپىردىڭ» ءرولىن وينايتىنىن ايتادى.

مەكەمە باسشىلىعىنىڭ ايتۋىنا قاراعاندا، كۇن سايىن ورتالىققا كوپتەگەن ايەل الەۋمەتتىك كومەك سۇراپ كەلەدى. ولاردىڭ پروبلەماسى جەردە قالمايدى. مىندەتتى تۇردە ءتيىستى جاۋابى بەرىلەدى. ول ءۇشىن ءتيىستى سالا مەكەمەلەرىنىڭ باسشىلارى نەمەسە وكىلدەرى ورتالىققا كەلىپ، اپتاسىنا ءبىر-ەكى رەت جينالىس وتىكىزىپ تۇرادى. سوندا انالار تاراپىنان كوتەرىلگەن ماسەلەلەر تۇگەل قارالىپ، پروبلەمالار جىلىكتەلىپ، ورتالىق ماماندارى مۇمكىن بولعانشا تەز شەشىمىن تاۋىپ بەرۋگە تىرىسادى. راس، كەيدە ماسەلەنىڭ كۇردەلىلىگىنە بايلانىستى شا­عىمىن ارقالاپ كەلگەن ايەلدەردىڭ پروبلەماسى بىرنەشە ايعا سوزىلىپ كە­تەتىن دە جاعدايلار بولادى. دەگەنمەن بۇل جەردە انالارعا مامانداردىڭ سوزىنە جۇگىنىپ سابىرلىق تانىتۋ قاجەتتىگى تۋرا­لى اقىل-كەڭەس بەرىلەدى. ءتىپتى شالعاي اۋىلداردا تۇراتىن كوپبالالى نەمەسە وتباسىلىق كيكىلجىڭ تۋىنداعان انالارعا ورتالىقتىڭ ءموبيلدى توبى ارنايى بارىپ، قىزمەتىن كورسەتىپ قايتادى. مەكەمە ەڭ الدىمەن كوپبالالى انالارعا ءۇي جاعدايىندا كىشىگىرىم تابىس تابۋعا ۇيرەتەدى، قارىم-قابىلەتىن اشادى. ار­نايى پسيحولوگتەردىڭ كومەگىمەن ءتۇرلى ومىرلىك سيتۋاتسيالاردان قۇرالعان ترەنينگتەر وتكىزىپ، سول بويىنشا پسيحيكالىق سترەسكە تۇراقتىلىقتارىن كۇشەيتەدى. ومىردە قانداي قيىندىق كەزدەسسە دە كۇلە قاراپ، جۇرە قابىلداۋعا ۇيرەتەدى. ويتكەنى ماماننىڭ ايتۋىنشا، كوپ جاع­دايدا ايەلدەر مۇندا پسيحولوگيالىق تۇرعىدا ابدەن قالجىراعان كۇيدە كەلەدى. بارلىعى بولماسا دا قوعامدا تولقىن بولىپ سوققان ءتۇرلى قيىندىقتارعا شىداس بەرمەي، ساعى سىنىپ، اينالاسىنان ابدەن ۇركىپ، قورقىپ قالعان ولار سوڭعى كومەك تۇراعى رە­تىندە ورتالىقتى كەلىپ پانالايدى نەمەسە بىرەۋلەردىڭ كومەگىمەن وسىندا جەت­كىزىلەدى.

ك

«باقىتتى جانۇيادان» ءوز باقىتىن تاپقانداردىڭ ءبىرى ەركىناي كوشكەنباەۆا قازىر وسى مەكەمەدە ءوزى دە انالارعا تىگىس تىگۋدى، قۇراق قۇراۋدى، كەستەلەۋدى، قىسقاسى ىسمەرلىك ونەردىڭ بارلىق قىر-سىرىن ۇيرەتىپ ءجۇر. «العاشقى كەزدە وتباسىلىق ماسەلەمەن وسى ورتالىققا كەلگەن ەدىم. ءسويتىپ، وسى جەردەن ءتۇرلى دەڭگەيدە كو­مەك الىپ، تىگىن تىگۋ كۋرسىن وقىدىم. ونى بىتىرگەن سوڭ «اتامەكەن» ۇلتتىق كا­سىپكەرلەر پالاتاسىنىڭ بيزنەستى وقىتۋ كۋرسىنان ءوتىپ، ارنايى گرانتقا قۇجات تاپسىرىپ، ناتيجەسىندە كونكۋرستا جەڭىمپاز اتانىپ، 555 مىڭ تەڭگە گرانتقا يە بولدىم. بۇل قاراجاتتىڭ ۇستىنە ءوزىم جەكە قالتامنان قارجى شىعارىپ، ءبىر ميلليوننان استام تەڭگەگە كەستەلەيتىن قىمبات تىگىن ماشيناسىن ساتىپ الدىم. قازىر ۇيدە جەكە تاپسىرىستار قابىلداپ، كەستەلەۋ­مەن اينالىسامىن، ياعني كيىمدەردىڭ، سومكەلەردىڭ بەتىنە كەستەلەپ ءارتۇرلى ويۋلار سالىپ، جازۋلار جازىپ بەرەمىن. ورتالىقتان ارنايى ۇسىنىس تۇسكەن سوڭ وتىنىشتەرىن جەرگە قالدىرعىم كەلمەي، وسىندا كەلىپ ۇستازدىق ەتىپ جاتقان جايىم بار. وسى جەردە كۋرسقا قاتىسۋعا نيەت بىلدىرگەن انالارعا تىگىس تىگۋدى، قۇراق قۇراۋدى ەكى اي بويى ۇيرەتەمىز. وقۋدى بىتىرگەن سوڭ كوپشىلىگى تۇراقتى جۇمىسقا ورنالاسىپ كەتىپ جاتىر نەمەسە ۇيىنەن جەكە كاسىپ اشىپ الادى. جۋىردا كۋرستا وقيتىن ەكى كەلىنشەك ىزگىلىك قورىنىڭ كون­كۋرسىنا قاتىسىپ، 180 مىڭ تەڭگە تۇرا­تىن ءبىر-ءبىر تىگىن ماشيناسىن ۇتىپ الدى. سوندىقتان ومىردە ءوزىن جوعالتىپ الدىم دەگەن ايەلدەرگە، ۇنجىرعانى تۇسىر­مەي، وسىندا كەلىپ، جاڭا بەلەستەرگە جەل­كەندى قايتا كەرۋگە شاقىرامىن»، دەيدى ە.كوشكەنباەۆا.

ودان بولەك، ورتالىقتا كونديتەرلىك، كومپيۋتەرلىك ساۋاتتىلىققا ۇيرەتۋ، شاشتاراز، SMM ماماندىعى، بالالارعا ارنالعان ماسساج، دەفەكتولوگ-لوگوپەد، ءتىل كەمىستىگى بار بالالاردىڭ انالارىنا تىنىس الۋ جانە ارتيكۋلياتسيالىق جاتتىعۋ كۋرستارى بويىنشا قىزمەتتەر كورسەتىلەدى. ماسەلەن، ون جىلدان استام ۋاقىتتان بەرى ماسساج ماماندىعىن كا­سىپكە اينالدىرىپ، سودان ۇلكەن جەتىس­تىكتەرگە جەتكەن، بۇگىندە جەكە ەمدەۋ مەكەمەسى بار مامان اتيرا قاپپارقىزى وسىندا ءتالىم بەرەدى. ونىڭ ايتۋىنشا، ماسساجدى مەڭگەرگەن ايەل ەشقاشان جۇمىسسىز قالمايدى. ويت­كەنى بۇگىنگى تاڭدا، اسىرەسە جاڭا تۋعان نارەستەلەردىڭ كوبىسىنە ديسپلوزيا دياگ­نوزى قويىلادى. ال ونىڭ بىردەن-ءبىر ەمى – ماسساج. مۇنىمەن قوسا كەيبىر اۋرۋ تۇرلەرى دارىمەن ەمەس، ماسساجدىڭ كومەگىمەن ەملەلەدى. وندايلاردىڭ قاتا­رىنا ماسەلەن، پانكرەاتيت پەن ارتروز اۋرۋىن جاتقىزۋعا بولادى. سوندىقتان ماسساجدى مەڭگەرگەن ايەل وتباسىنىڭ تابىسىن ەسەلەۋگە مۇمكىندىك الاتىنىن تىلگە تيەك ەتتى.

ورتالىق باسشىسىنىڭ ورىنباسارى SMM ماماندىعىنىڭ دا بۇگىنگى تاڭدا ناعىز سۇرانىسقا يە، تابىسى مول كاسىپتەردىڭ ءبىرى ەكەنىن ايتادى. بۇرىن «باقىتتى جانۇيادا» زاماناۋي كاسىپتى جاس كەلىنشەكتەر مەڭگەرسە، قازىر ۇلكەن جاستاعى انالار دا SMM-ءشى بولۋعا ۇمتىلىپ جاتىر. ماسەلەن، الەۋمەتتىك جەلىدە بىرەۋدى نەمەسە ونىڭ ءونىمىن، قىزمەتىن جارنامالاۋ شامامەن 50 مىڭ تەڭگە تۇرادى. سوندا وسىنداي 4-5 تاپسىرىستى قابىلداعان انا ەشقايدا شىقپاي ۇيىندە وتىرىپ، الەۋمەتتىك جەلىگە ءبىر ساعات ۋاقىتىن ءبولىپ وتىرىپ-اق اجەپ­تەۋىر تابىس تابادى. قازىر الەۋمەتتىك جەلىنىڭ مۇمكىندىگىن ءبىلىپ العان انالار ماسساج كۋرسىن ءتامامداپ بولعان سوڭ ءوز قىزمەتىن جارنامالاۋ ءۇشىن قوسىمشا SMM كۋرسىنان دا وتەدى. لوگوپەد كۋرسى دا انالاردىڭ ءوز بالالارىنىڭ ءتىلىن تەزىرەك دامىتۋعا سەپتىگىن تيگىزىپ وتىر. اسىرەسە ونىڭ تەگىن بولۋى الەۋمەتتىك جاع­دايى تومەن وتباسىلارعا ۇلكەن كومەك بولۋدا. سەبەبى بۇگىندە جەكەمەنشىك كلينيكالاردا لوگوپەدكە قابىلدانىپ، ءبىر رەت كورىنۋدىڭ ءوزى كەمىندە 10 مىڭ تەڭگە تۇرادى. وسى تۇستا ايتا كەتۋ كەرەك، ج­وعارىدا اتالعان تەگىن كۋرستارعا بيۋدجەتتەن ەشقانداي دا قارجى قارالماعان. بۇل تىكەلەي ورتالىق ماماندارىنىڭ ىقتيارىمەن، كاسىپكەرلەردەن قوسىمشا كومەكتەر قاراستىرۋ ارقىلى ىسكە اسىپ جاتقان يگى تىرلىكتەر. وسى جەتىستىكتەرى ءۇشىن شىمكەنتتەگى «باقىتتى وتباسى» ورتالىعى رەسپۋبليكادا ەڭ ۇزدىك بولىپ تانىلىپ، وزگەلەرگە ۇلگى رەتىندە تانىس­تىرىلعان. سونىمەن قاتار ورتا­لىقتا قىزمەت كورسەتۋ بۇرىشى، اتاۋلى الەۋمەتتىك كومەككە قۇجات تاپسىرۋ، تۇرعىن ءۇي كەزەگىنە تۇرۋ، ەgov.kz پورتالىنان مەملەكەتتىك قىزمەتتەردى دۇرىس پايدالى ەتىپ جاراتۋ ءۇشىن تىركەۋ، انىقتاما الۋ ءۇشىن ەقق اشۋ، مەملەكەتتىك باعدارلامالارعا قاتىسۋ ءۇشىن تىركەۋ قۇجات­تارىن راسىمدەۋ قىزمەتتەرى كور­سەتىلەدى.

بۇگىنگى تاڭدا قالا بويىنشا 18 943 از قامتاماسىز ەتىلگەن جانە كوپبالالى انالاردىڭ مۇقتاجدىقتارى تىركەۋگە الىنىپ، ءتۇرلى دەڭگەيدە اقپاراتتىق قولداۋ، پسيحولوگيالىق، قۇقىقتىق كەڭەس بەرۋ، اتاۋلى الەۋمەتتىك كومەككە قۇجات تاپسىرۋ، تۇرعىن ءۇي كەزەگىنە تۇرۋ، eqov.kz پورتالىنان قىزمەتتەر الۋ جانە تاعى باسقا بويىنشا انالاردىڭ سۇرانىستارىنا سايكەس 316 ونلاين، 18 627 وفلاين تۇردە قىزمەتتەر ۇسىنىلعان. الەۋمەتتىك ساناتقا جاتاتىن انالاردىڭ تۇرمىستىق جاعدايىن جاقسارتۋ ماقساتىندا ۇيدە وتىرىپ-اق تابىس تاۋىپ، ءوز كاسىبىن يگەرۋگە قولداۋ كورسەتۋ ءۇشىن 438 ايەلگە تەگىن وقۋ كۋرستارى ۇيىمداستىرىلدى. «وقۋ كۋرسىنان وتكەندەردىڭ جۇمىستارىنا ءارى قاراي تالداۋ جاسالىپ، ماماندار ءوز تاراپتارىنان كومەك كورسەتەدى. بۇگىنگى تاڭدا وقۋىنىڭ جەمىسىن كورىپ جۇرگەن 176 انا بار. ونىڭ ىشىندە 35-ءى ور­تالىقپەن بەلسەندى جۇمىس ىستەيدى. ماسەلەن، كونديتەرلىك كۋرسىنان وتكەن 2 انا «ايجامال» كونديتەرلىك دۇكەنىندە ناپاقاسىن تاۋىپ ءجۇر. بۇعان قوسىمشا 3 انا تاتتىلەر ءپىسىرىپ، تاپسىرىس قابىلداپ، جاپ-جاقسى تابىس تابادى. ماسساج كۋرسىن تامامداعان 12 كەلىنشەك اقىلى نەگىزدە بالالارعا ماسساج جاسايتىن مامان اتاندى. شاشتاراز كۋرسىنان بىتىرگەن ايەل سۇلۋلىق سالونىنىڭ ءبىر بۇرىشىن جالعا الىپ ەڭبەك ەتۋدە. تىگىن كۋرسىنان سەرتيفيكات الىپ شىققان 3 ايەل ءۇي جاعدايىندا تاپسىرىس قابىلداپ، تىگىن تىگەتىن بولعان. SMM ماماندىعىن مەڭگەرگەن 8 انا جەكە پاراقشالارىندا ءوز بيزنەسىن دامىتىپ وتىر. مانيكيۋر-پەديكيۋردىڭ قىر-سىرىن ۇيرەنگەن 2 ايەل ءسان سالونىنان ءبىر ورىندى جالعا الىپ جۇمىس ىستەسە، ۇشەۋى ۇيدەن پايدا تاۋىپ وتىر»، دەيدى ەرلان تۇرسىنبەك ۇلى.

قىركۇيەك ايىندا وقۋ كۋرسىندا ءبىلىمىن جەتىلدىرۋ ءۇشىن قوسىمشا تاعى 251 ادام كەزەككە تۇردى. الەۋمەتتىك از قامتاماسىز ەتىلگەن جانە كوپبالالى وتباسىنداعى جاعىمسىز جاعدايلارعا ۇشى­راعان انالارعا پسيحولوگيالىق كەڭەس نەگىزىندە 448 اناعا، ونىڭ ىشىندە 297-ىنە زاڭگەرلىك كومەك كورسەتىلدى. جالپى، 1 223 ادام پسيحولوگ پەن زاڭگەر­دىڭ قىزمەتىن پايدالانعان. مەكەمە وكى­لىنىڭ مالىمدەۋىنشە، جوسپارعا سايكەس ورتالىقتا جىل باسىنان بەرى وتباسى تاقىرىبىندا پايدالى اقپارات پەن باعىت-باعدار بەرەتىن 71 ترەنينگ جانە سەمينار مەن كەزدەسۋلەر ۇيىمداستىرىلدى. جانە اجىراسۋعا ءوتىنىش بەرگەن ازاماتتارمەن مەدياتور ماماندارى جۇمىس ىستەپ، 354 وتباسى مۇشەلەرىمەن ارنايى اڭگىمەلەسكەن. 43 وتباسى مۇشەلەرىنە پسيحولوگيالىق كومەك كورسەتىلسە، 21 ادام زاڭگەرلىك كومەككە جۇگىندى. سونداي-اق مەملەكەتتىك مەكەمەلەر، ۇكىمەتتىك ەمەس ۇيىمدار، قوعامدىق بىرلەستىكتەر جانە توپتار مەن ۇيىمداردى قاتىستىرا وتىرىپ «اشىق الاڭ»، «جۇماداعى جاقسىلىق»، ء«موبيلدى قىزمەت» جوبالارى قولعا الىندى. سونىڭ اياسىندا 53 ءىس-شارا جۇزەگە اسىرىلىپتى. ما­سەلەن، «اشىق الاڭدا» مەملەكەتتىك ورگان مۇشەلەرىمەن بىرلەسە وتىرىپ جەكەلەي نەمەسە توپ-توپپەن ازاماتتاردى قابىلداپ، وزەكتى ماسەلەلەردى شەشۋدىڭ جولدارى قاراستىرىلادى. «جۇماداعى جاقسىلىقتا» ۇكىمەتتىك ەمەس ۇيىمدار، ەرىكتى ازاماتتار، توپتار، ۇجىمدارمەن بىرلەسە وتىرىپ الەۋمەتتىك وسال وتباسى مۇشەلەرىنە كومەك بەرىلەدى. ال ء«موبيلدى قىزمەتتە» ءتۇرلى جاعدايعا تاپ بولعان ازاماتتارعا قۇقىقتىق، پسيحو­لوگيالىق نەمەسە ءۇي جاعدايىندا وتىرىپ قۇجاتتارىن راسىمدەۋ شارالارىنا جاردەم قارالادى.

جاۋاپتى ماماننىڭ ايتۋىنشا، بيىلعى مامىردا پرەمەر-ءمينيستردىڭ ورىنباسارى ەرالى توعجانوۆپەن وتكەن جيىن بارىسىندا شىمكەنت قالاسىنىڭ «باقىتتى جانۇيا» ورتالىعى» كمم جۇمىسىنا جوعارى باعا بەرىلدى. شىمكەنت قالاسىنىڭ اكىمى مۇرات ايتەنوۆ ورتا­لىقتىڭ جاڭا فورماتتا جۇمىس جۇرگىزۋ ءىس-تاجريبەلەرىن وزگە وڭىرلەرگە تانىستىرىپ، تاراتۋعا ارنالعان جۇمىس جوسپارلارىن پىسىقتاعان. وسىعان بايلانىستى «باقىتتى جانۇيا» ورتالىعى» كمم بازاسىندا تاجىريبە الماسۋ ماقساتىندا نۇر-سۇلتان قالاسى، قاراعاندى، باتىس قازاقستان جانە تۇركىستان وبلىستارى، تۇركىستان قالاسى جانە وزگە دە اۋدان، قا­لالاردىڭ جۇمىسپەن قامتۋ جانە الەۋمەتتىك باعدارلامالار بولىمدەرىنىڭ باسشىلارى مەن جاۋاپتى ماماندارى تاجىريبە الماسۋ ماقساتىندا مەكەمەگە ارنايى كەلىپ، قىزمەتىمەن تانىسىپ، جۇمىس جۇرگىزۋ جۇيەسىنىڭ بارىسىندا وقۋ پراكتيكاسىنان ءوتىپ قايتتى.

ورتالىقتىڭ الدىنا قويىپ وتىرعان ەندىگى ماقساتى مەن جوسپارى – مەكەمەنىڭ قالاداعى اۋدانداردان فيليالدارىن اشۋ. سونىڭ ىشىندە كەڭسەنىڭ شالعاي ەلدى مەكەندەردە ورنالاسۋىنا كوڭىل بولىنبەك. ويتكەنى الىس اۋىلداردان قالانىڭ ورتالىعىنداعى جالعىز «باقىتتى جانۇيا» مەكەمەسىنە كەلىپ-كەتۋ ۋاقىت جاعىنان قيىندىق تۋعىزىپ جاتقانعا ۇقسايدى.

 

شىمكەنت

سوڭعى جاڭالىقتار

سەمەي قالاسىنىڭ اكىمى تاعايىندالدى

تاعايىنداۋ • بۇگىن، 10:42

مەسسي جەڭىسكە جەتەلەي المادى

فۋتبول • بۇگىن، 07:35

شيرەك فينالعا ءوتتى

تەننيس • بۇگىن، 07:33

ءتورتىنشى ورىنعا تۇراقتادى

تەننيس • بۇگىن، 07:32

جۇلدەنىڭ اۋىلى الىس ەمەس

سپورت • بۇگىن، 07:28

بارىمتاعا – «قارىمتا»

قوعام • بۇگىن، 07:25

اسىق اتۋدان الەم چەمپيونى

ۇلتتىق سپورت • بۇگىن، 07:24

ادام كاپيتالىن ارتتىرۋعا ارنالادى

ەكونوميكا • بۇگىن، 07:20

جاڭا رەفورماعا سەنىم زور

پىكىر • بۇگىن، 07:16

ءۇمىت ءسوزى

پىكىر • بۇگىن، 07:12

بۇل – بولاشاقتىڭ تاڭداۋى

پىكىر • بۇگىن، 07:08

اشىقتىقتى ارتتىراتىن يگى ىستەر

قازاقستان • بۇگىن، 07:05

قۇقىق ۇستەمدىگى – كەلىسىم كەپىلى

قازاقستان • بۇگىن، 07:03

ەرتەڭىمىز ءۇشىن ۇتىمدى شەشىم

ساياسات • بۇگىن، 07:00

كاسىپ كوزى – ءناسىپ كوزى

ەكونوميكا • كەشە

ۇقساس جاڭالىقتار