ايماقتار • 16 تامىز، 2022

قالاعا قوسىلعان اۋىلدار: مەگاپوليس 2025 جىلى ساپالى ەلەكتر ەنەرگياسىمەن تولىق قامتاماسىز ەتىلەدى

55 رەت كورسەتىلدى

وزبەكستاننىڭ شىرشىق قالاسىندا تۋىپ-وسكەن سەرىك تۇرعىمباەۆ اعايىنعا قوسىلۋدى ماقسات ەتىپ، اتامەكەنگە قونىس اۋدارعان. باستاپقىدا ازداپ جيناعان اقشاسىنا شىمكەنتتىڭ ىرگەسىنەن جەر ۋچاسكەسىن ساتىپ الىپ، شاعىن ءۇي سالىپتى. سول جىلدارى ول ماڭايدا ءۇي سالعانداردىڭ قاتارى تىپتەن از ەدى. ال بۇگىندە تۇرعىنى كوپ شاعىن اۋدانعا اينالعان.

– كوشە جوق ەدى. ۇلكەن جولعا شىعۋ ءۇشىن دالانى توتەسىنەن كەسىپ وتە سالاتىنبىز. ينفراقۇرىلىم تۋرالى ايتۋدىڭ ءوزى ارتىق. تىم قۇرىعاندا جارىق تا بولمادى. بىرنەشە جىل تاس قاراڭعىدا وتىردىق. سۋدى جاياۋ-جالپىلاپ تومەنگى اۋىلعا ءتۇسىپ، ىدىسپەن تاسيتىنبىز. قىستا قار كەشىپ، كۇن جاۋىندا اياعىمىز باتپاققا مالىنىپ، جازدىڭ شۋاقتى كۇندەرىنە ارەڭ جەتەتىنبىز. ءسال قىرعا كوتەرىلسەڭ قازىرگى 16 قاباتتى اكىمدىك عيماراتى ورنالاسقان قالانىڭ جاڭا اكىمشىلىك-ىسكەرلىك ورتالىعى كورىنەر ەدى. بۇل ايماققا ينفراقۇرىلىم جۇيەلەرى­نىڭ قاشان تارتىلاتىنى بەلگىسىز ەدى. بەرتىنىرەكتە بۇل جەرگە بىرتىندەپ سەرۆيستىك قىزمەت كورسەتۋ، باسقا دا كاسىپورىندار مەن ولاردىڭ ءزاۋلىم كەڭسەلەرى سالىنا باستادى. سولارمەن قوسىلىپ جەكە سەكتورداعى ۇيلەر قۇرىلىسى ارتىپ، جەكەمەنشىك ينجەنەرلىك ينفراقۇرىلىمدار پايدا بولدى. اينالاسى ءۇش-ءتورت جىلدا جاڭا ۇيلەر جاۋىننان كەيىنگى ساڭىراۋقۇلاقتاي قاپتاپ، كەشەگى ايدالا جەر كادىمگى تىرشىلىگى قىبىرلاعان ەلدى مەكەنگە اينالىپ شىعا كەلدى. بىراق ينفراقۇرىلىم جۇيەلەرى كەشەگى كۇنگە دەيىن تولىق جەكەنىڭ قولىندا بولدى. گازعا نەمەسە جارىققا قوسىلۋ ءۇشىن ءۇي سالعان وتباسىلار ءبىرتالاي قاراجات تولەيتىن، – دەيدى سول كۇندەردى ەسكە العان سەرىك تۇرعىمباەۆ.

ءيا، تاسساي – قالانىڭ جاڭا ورتالىعىنا جاقىن شاعىن اۋدان. بۇگىندە بۇل ايماقتا مەملەكەتتىك بيۋدجەت ەسەبىنەن ساپالى ەلەكتر ەنەرگياسى تارتىلدى. ءالى تولىق قوسىلماسا دا قۋاتتىلىق ەرەجەلەرىنە ساي گاز بەن سۋ قۇبىرلارى جۇرگىزىلدى. سونىمەن بىرگە كارىز جۇيەسىن ورناتۋ جۇمىستارى اياقتالۋعا جاقىن قالدى. جەر استىنان وپتيكالىق كابەل دە وتكىزىلدى. نەگىزگى كوشەسىنە اسفالت توسەلىپ، جارىقشامدار ورناتىلدى. دەگەنمەن شاعىن اۋداننىڭ ىشكى كوشەلەرى ءالى دە اسفالت، ءتىپتى شاعال تاس توسەلمەگەن كۇيى قالىپ تۇر. ەندىگى كەزەكتە تۇرعىن­دار كوممۋنالدىق گازعا تەزىرەك قوسىلۋدى اسىعا كۇتىپ ءجۇر. جالپى، شىمكەنتتىڭ شەتكى اۋداندارىنداعى جاعداي وسىنداي. ۋربانيزاتسيا ۇدەرىسىنىڭ ەكپىنىمەن قالاعا اعىلعان جۇرت العاشقىدا كوپ قيىندىقتى باستان وتكەردى. ينفراقۇرىلىمى بارما­عان جەرگە ءۇي سالعان حالىق اكىمدىككە ءجيى شاعىمداندى. بۇعان، ارينە، اكىمدىكتى كىنا­لاۋعا بولماس. ويتكەنى سول تۇستا قالا­نى تۇتاس دامىتىپ جىبەرەتىن رەسۋرس بولعان جوق، ءتىپتى بولعان كۇندە ءبىر پاستە اتقا­رىپ تاستاۋ مۇمكىن ەمەس. قالا شەتىندەگى اسار-2 شاعىن اۋدانى دا كوپتەن بەرى كوم­­مۋنالدىق ينفراقۇرىلىم جاعى­نان قيىندىق كورىپ كەلدى. اۋىز سۋ، جول، گاز، ەلەكتر قۋاتىنىڭ پروبلەماسى جەرگىلىكتى تۇرعىنداردى ابدەن شارشاتقان-دى. مەگاپوليستى دامىتۋدىڭ جوسپارىنا سايكەس بىلتىر اتالعان شاعىن اۋدانعا كوپتەن كۇتكەن اۋىز سۋ بەرىلدى. وسى ماقساتتى ىسكە اسىرۋعا مەملەكەت قازىناسىنان 1،5 ملرد تەڭگە قارجى قارالدى. شىمكەنت قالالىق ءماسليحاتىنىڭ حاتشىسى باحادىر نارىمبەتوۆ مەگاپوليس شالعايىندا جات­قان ەلدى مەكەندەردىڭ ينفراقۇرىلىمىن دامىتۋ Amanat پارتياسىنىڭ «وزگەرىستەر جولى: بارشاعا لايىقتى ءومىر» اتتى سايلاۋالدى باعدارلاماسىنا سايكەس جۇزەگە اسىرىلىپ جاتقانىن ايتادى. باعدارلاما اياسىندا بيىل اسار-2 شاعىن اۋدانىنىڭ باسقا دا ينجەنەرلىك-ينفراقۇرىلىم ماسەلەلەرى شەشىمىن تاپتى. سونىڭ ىشىندە قالاعا قاتىنايتىن قوعامدىق كولىكتەردى اتاپ وتۋگە بولادى. بۇدان بولەك «مونوليت – ديزاين-2030» مەردىگەر كومپانياسى كارىز جۇيەسىنىڭ قۇرىلىسىن جۇرگىزۋدە.

جالپى، قالادا 81 ەلدى مەكەن بولسا، سونىڭ 41-ءى كەزىندە تۇركىستان وبلىسىنىڭ اۋداندارىنان مەگاپوليسكە وتكەن اۋىلدار. قالا اكىمدىگى الدىمەن ينفراقۇرىلىم ماسەلەسىن تۇبەگەيلى شەشىپ الۋدىڭ قامىنا كىرىسىپ، ماگيسترالدى گاز، سۋ قۇبىرلارى تارتىلدى. بۇرىن كوپ كاسىپورىن گاز قۋاتىنىڭ تاپشىلىعىنان زارداپ شەگەتىن. كوپتەگەن جەكە سەكتورداعى ۇيلەر تابيعي گازعا قوسىلۋ بويىنشا جاريالانعان ءموراتوريدىڭ سالدارىنان «كوگىلدىر وتىنعا» قوسىلا الماي كەلدى. جاڭادان پايدالانۋعا بەرىلگەن اگرس-3 گاز تاراتۋ ستانساسىنىڭ سەپتىگى­مەن مەگاپوليس بويىنشا «كوگىلدىر وتىن» قۋاتتىلىعى ارتىپ، موراتوريلىك شەكتەۋ الىنىپ تاستالدى. جوعارىدا اتالعان اسار-2 شاعىن اۋدانىنىڭ تۇرعىندارى دا وسى ستانسا ارقىلى تارايتىن تابيعي گازدىڭ يگىلىگىن كورىپ وتىر. اگرس-3-ءتىڭ قۋاتتىلىعى 250 مىڭ تەكشە مەتردى قۇراي­دى. بۇرىنعى ەسكى ستانسا 180 مىڭ تەكشە مەتر گاز تاراتاتىن. ول قۋاتتىلىق قالا­نى گازبەن جابدىقتاۋعا تولىق جەتپەيتىن. جاڭا ستانسانىڭ مۇمكىندىگى قالانىڭ سۇ­را­نىسىنان دا ارتىپ وتىر. سوندىقتان اگرس-3-ءتىڭ سالىنۋى جالپى مەگاپوليستىڭ دامۋىنا ۇلكەن سەرپىن بەرەرى ءسوزسىز. جوسپارعا سايكەس كومەشبۇلاق سۋ كوزىنەن 25 شاقىرىمدىق ماگيسترالدى سۋ قۇبىرى تارتىلدى. قالانىڭ سولتۇستىك، سولتۇستىك-با­تىس بولىگىندەگى اسار-2، دوستىق، سولتۇستىك ساياجاي، ىنتىماق، باتىس، جاڭاتالاپ، كوكبۇلاق، يگىلىك سەكىلدى ەلدى مەكەندەر وسى ماگيسترالدى قۇبىر ارقىلى تازا ءارى ساپالى اۋىز سۋ ءىشىپ وتىر. سونداي-اق «بوزارىق 220/110/10 كۆ» قوسالقى ستانساسى مەن 110 كۆ قورەكتەندىرۋ جەلىسى بار «1-م-1» قوسالقى ستانساسى ىسكە قوسىلدى. اتالعان نىساندار قالا شەتىندەگى شاعىن اۋدانداردى ەلەكتر جارىعىمەن قامتاماسىز ەتۋگە تولىق جەتەدى. سونىڭ ناتيجەسىندە، 250 مىڭ حالىق تۇراتىن 10 جاڭا تۇرعىن ءۇي الابى ۇزدىكسىز ەلەكتر قۋاتىمەن جابدىقتالدى. قالا اكىمدىگى 2023 جىلى ءۇشىنشى مەگاپوليستە اۋىز سۋمەن قامتۋ كورسەتكىشىن ءجۇز پايىزعا جەتكىزۋدى كوزدەپ وتىر. بۇگىنگى تاڭدا قالاعا قاراستى 81 ەلدى مەكەننىڭ 78-ىندە اۋىز سۋ بولسا، قالعان 3 اۋىلعا قۇرساي، قايناربۇلاق، سايرام تۇرعىن الاپتارىنا كەستەمەن بەرىلىپ وتىر.

قالا تۇرعىندارىن ساپالى اۋىز سۋ­مەن قامتۋ كورسەتكىشىن ارتتىرۋ ماقساتىن­دا بيىل 7 نىساندا قۇرىلىس جۇمىسى قار­قىندى ءجۇرىپ جاتىر. ولار: قۇرساي (1،2 كەزەڭ)، اسار-2 (2 كەزەڭ)، نۇرتاس ۆس، تەكەسۋ ەلدى مەكەنى، ەڭبەكشى اۋدانى­نا قاراستى جاڭا قۇرىلىس اۋماقتارى جانە قايناربۇلاق اۋىلى. ال سايرام ەلدى مە­كە­­نىندە قۇرىلىس جۇمىسىن باستاۋ ءۇشىن مەملەكەتتىك ساتىپ الۋ كونكۋرسى جۇر­گىزىلگەن-ءدى.

بۇگىنگى تاڭدا قۇرساي ەلدى مەكەنىندە ەكى كەزەڭنەن تۇراتىن جوبانىڭ قۇرىلىسى اياقتالىپ، 270 شاقىرىم سۋ قۇبىرى ورناتىلدى. وسىلايشا، قۇرساي شاعىن اۋدانىنا ينجەنەرلىك-ينفراقۇرىلىم تارتۋ ءىسى قارقىندى جالعاسۋدا. 8 مىڭعا جۋىق تۇرعىنى بار شاعىن اۋداندى ساپالى اۋىز سۋمەن قامتۋ ءۇشىن ينجەنەرلىك قۇرىلىس 2021 جىلى باستالعان. جالپى ۇزىندىعى 336،5 شاقىرىمدى قۇرايتىن سۋ جۇيەسىن تارتۋ جۇمىسى جوعارىدا ايتىلعانداي، 2 كەزەڭ بويىنشا جۇزەگە اسىرىلىپ جاتىر.

ال قايناربۇلاق تۇرعىن الابىنا اۋىز سۋ قۇبىرىن تارتۋ قۇرىلىسى 2023 جىلعا وتپەلى. وسى جىلدىڭ قورىتىندىسىمەن قۇرساي، اسار-2، تەكەسۋ ەلدى مەكەندەرى مەن نۇرتاس سۋ جيناقتاعىش يماراتى­نىڭ قۇرىلىسى اياقتالادى. ناتيجەسىندە، قالا تۇرعىندارىنىڭ ساپالى اۋىز سۋمەن قامتىلۋ كورسەتكىشى 99 پايىزعا جەتەدى. جوسپارعا سايكەس، شىمكەنت قالاسىنىڭ تۇرعىندارى 2023 جىلى جوعارىدا كەلتىرىلگەن دەرەككە ساي، 100 پايىز ساپالى اۋىز سۋمەن قامتىلاتىن بولادى.

سونىمەن بىرگە جاۋاپتى ماماندار 2025 جىلى مەگاپوليس تولىق ساپالى ەلەكتر ەنەرگياسىمەن قامتاماسىز ەتىلەتىنىن ايتادى. قازىرگى ۋاقىتتا 8 ەلدى مەكەندە عانا ەلەكتر قۋاتىنىڭ ساپاسى تومەن. تابيعي گاز دا الداعى 3 جىلدا تولىق شەشىمىن تابادى. گاز بارماعان قالادا 8 ەلدى مەكەن قالىپ وتىر. مەگاپوليس قۇرامىندا بۇرىننان بولعان تۇرعىن الاپتارىندا نەگىزىنەن ينجەنەرلىك-كوممۋنالدىق ينفراقۇرىلىم پروبلەماسى حالىقتى كوبىرەك مازالاسا، تۇركىستان وبلىسىنان قالا قۇرامىنا وتكەن ەلدى مەكەندەردە جەر ۋچاسكەسىنە بايلا­نىستى قۇجاتتىق ماسەلەلەر زاڭداستىرۋعا كەلگەندە تۇرعىندار الدىنان كەسە كولدە­نەڭ شىعۋدا.

قالالىق ەنەرگەتيكا جانە ينفراقۇ­رى­لىمدى دامىتۋ باسقارماسىنىڭ بەرگەن مالىمەتتەرىنە نازار سالساق، مەگاپوليستىڭ ەلدى مەكەندەرىنە اۋىز سۋمەن بىرگە وزگە دە ينجەنەرلىك ينفراقۇرىلىمدى تارتۋ جۇمىستارى جوسپارعا ساي كەزەڭ-كەزەڭىمەن اتقارىلىپ جاتىر. ايتالىق، قاراتاۋ اۋدا­نىنا قاراستى دوستىق شاعىن اۋدانىن ساپالى ەلەكتر قۋاتىمەن قامتۋ وزەكتى ماسەلەنىڭ ءبىرى ەدى. بۇگىندە ەلەكتر تاراتۋ بەكەتىنە كەرەكتى جابدىقتار ورناتىلدى. شاعىن اۋداندى قاجەتتى ەلەكتر ەنەرگياسىمەن قامتۋعا جالعاپ قوسۋ، قوسىلۋ كوزىنە كابەل جەلىسىن جالعاۋ جانە 13 ەلەكتر ترانسفورماتورىن ورناتۋ، 7 شاقىرىم 10 كۆ كابەل جەلىسىن تارتۋ سەكىلدى جۇمىستار كىرەدى.

قۇرىلىس جۇمىستارىنان كەيىن قارا­شادا ۇيلەردى رەسمي قۋات كوزىنە جالعاۋ، ابونەنتتەۋ جۇمىستارى قولعا الىنادى. ساپالى ەلەكتر قۋاتىمەن قامتۋ ءۇشىن 8 نىساندا قۇرىلىس جۇمىستارى قارقىن العان. باستالعان ءىس وسى قارقىنىنان تايماسا، جىل سوڭىنا دەيىن شىمكەنتتىكتەردىڭ 99 پايىزى ساپالى ەلەكتر قۋاتىن تۇتىنادى.

دوستىق شاعىن اۋدانىنىڭ حالقى ەندى گازدان تاپشىلىق كورمەيدى. بۇل بويىنشا اتقارىلعان جۇمىستاردىڭ بارىسىن كوزبەن كورۋگە بارعان شىمكەنت قالاسىنىڭ اكىمى مۇرات ايتەنوۆ جەرگىلىكتى حالىقپەن جۇزدەسىپ، «2021 جىلدىڭ جەل­توقسان ايىندا 46،06 شاقىرىمعا گاز جۇيەسى تارتىلعان بولاتىن. كوگىلدىر وتىن­مەن قامتۋدا اگرس-3 نىسانىنىڭ ىسكە قو­سىلۋىن كۇتتىك. ەندى، مىنە، كوپتەن كۇت­كەن جۇمىس تولىق اياقتالىپ، سىزدەرگە گاز بەرىلىپ جاتىر. قۇجاتتارى دايىن ۇيلەرگە گاز قوسىلدى. ەندى قالعاندارىڭىز دا كۇز باستالماي قۇجاتتارىڭىزدى ازىرلەپ ۇلگەرىڭىزدەر»، دەدى.

جالپى، دوستىق شاعىن اۋدانىندا 2 686 ءۇي بولسا، تۇرعىن سانى – 15 750 ادام. 2 625 ناقتى ابونەمەنت بار. ءوز كەزەگىندە مەردىگەر مەكەمە «گح شىمكەنتگاز» جشس اتالعان جوبانى 957،838 ملن تەڭگەگە اتقا­رىپ، جۇمىستى مەرزىمىندە اياقتادى.

قالاداعى نۇرتاس ەلدى مەكەنى ەلەكتر قۋاتى ساپاسىز 8 ەلدى مەكەننىڭ قاتارىندا. بۇل ماسەلەنى شەشۋ ماقساتىندا نۇرتاس ەلدى مەكەنىنە ەلەكتر قۋاتىن تارتۋ قۇرى­لى­سى 2021 جىلى باستالعان. بۇگىنگە دەيىن قۇرىلىس جۇمىستارىنىڭ جارتىسى ورىندالدى.

قۇرىلىس بارىسىندا 600-دەن استام ەلەكتر باعاناسى ورناتىلىپ، 8 شاقىرىمعا ەلەكتر جەلىلەرى تارتىلدى. جوسپار بويىنشا قۇرىلىس جۇمىسى جىل سوڭىنا دەيىن اياقتالىپ، ىسكە قوسىلادى. سودان كەيىن «وڭتۇستىكجارىقترانزيت» جشس تاراپىنان ابونەنتتەۋ جۇمىستارى باستالادى.

سونىمەن قاتار نۇرتاس ەلدى مەكەنىن­دە ىشكى ورامدىق گاز قۇبىرى تارتىلۋدا. بۇگىنگە دەيىن بۇل جۇمىستار اياقتالۋعا جاقىن قالدى. 15،7 شاقىرىمنان استام گاز قۇبىرى توسەلدى. جالپى، گاز قۇبىرى جەلىسىن تارتۋ ءىسى تولىعىمەن جىل سوڭىنا قاراي ءبىتىپ، پايدالانۋعا بەرىلمەك. بۇدان بولەك بيىل نۇرتاستاعى تاسانباەۆ پەن حان ءتاڭىرى كوشەلەرى جارىقتاندىرىلادى.

ەنەرگەتيكا جانە ينفراقۇرىلىم­دى دامىتۋ باسقارماسىنىڭ باسشىسى ب.بۋلات­­بەكوۆتىڭ قالا اكىمىنە 6 ايداعى يندي­كاتورلاردىڭ ورىندالۋى بويىنشا بەرگەن ەسەبىندە شىمكەنتتى ەلەكتر قۋاتىمەن قامتۋ كورسەتكىشىن بيىل 98 پايىزعا جەتكىزۋ جوسپارعا قويىلعانى ايتىلعان. بۇل ماقساتقا وراي 5 ەلدى مەكەن – جاڭاتالاپ، دوستىق، تۇران، نۇرتاس، ساۋلە شاعىن اۋداندارىندا جانە بوزارىقتا 1 قوسالقى ستانسا، «اقجار» 110 كۆ قوسال­قى ستانسالارىنىڭ قۇرىلىسى اياقتالىپ، پايدالانۋعا بەرىلەدى. ال ىنتىماقتا­عى قوسالقى ستانسا مەن وسىعان بايلانىس­تى نۇرسات، قايناربۇلاق، باتىس، سولتۇستىك ­ساياجاي شاعىن اۋداندارىنداعى قۇرىلىس­تار كەلەسى جىلى اياقتالادى.

بۇگىنگى تاڭدا شىمكەنت قالاسىنىڭ 54 پايىزى كارىز جۇيەسىمەن قامتىلعان. بيىل بۇل كورسەتكىشتى 60 پايىزعا جەتكىزۋ، ياعني قوسىمشا 65 مىڭعا جۋىق تۇرعىندى قامتۋ جوسپارلانىپ وتىر. وسى مەجەگە قول جەتكىزۋ ماقساتىندا 20 نىساندا قۇرىلىس جۇمىستارى جۇرگىزىلۋدە. جىل سوڭىنا دەيىن سامال-3، ميراس-شاپاعات-2، ۇلاعات، سولتۇستىك-شىعىس، حلوپزاۆود-شولوحوۆ، جۇلدىز ەلدى مەكەندەرى كارىز جۇيەسىنە قوسىلادى. ال اسار-2، تاسساي، تۇران ىشكى جۇيەلەرى جانە دوستىق، قايتپاس-2، سولتۇستىك-باتىس شاعىن اۋداندارىن­داعى قۇرىلىس جۇمىستارى كەلەسى جىلى اياقتالادى.

سونىمەن بىرگە دوستىقتاعى كارىز سور­عى ستانساسى كنس (قايتا قۇرۋ)، ارعىن­بەكوۆتەگى كوللەكتور، تۇرانداعى ىشكى ماگيسترال، بوزارىقتاعى 74 گەكتار اۋماق­تىق قۇرىلىس جۇمىستارى دا ءوز مارەسىنە جەتەدى. ال نۇرتاس، تاراز شاعىن اۋدانى، ايشا ءبيبى كوشەسى، 112 ورام قۇرىلىسى بيىل باستالماق. قالامىزدىڭ دامۋ جوس­پارىنا سايكەس، 2022-2025 جىلدارى كارىز جۇيەسىمەن قامتۋ كورسەتكىشىن 75 پايىزعا جەتكىزۋ ماقساتى تۇر. قازىرگى ۋاقىتتا ارعىنبەكوۆ كوشەسىنىڭ بويىمەن جىبەك جولى كوشەسىنەن باستاپ №2 كوللەكتورعا دەيىن كاناليزاتسيالىق كوللەكتور قۇرىلىسى قارقىندى جۇرۋدە. كول­لەكتوردىڭ جالپى ۇزىندىعى 13،1 شا­قىرىمدى قۇرايدى. قۇرىلىسقا جاۋاپتى مەردىگەر مەكەمە – «سارىاعاش-امان» جشس. اتالعان كاناليزاتسيالىق كوللەكتور قۇرىلىسى 2022 جىلدىڭ سوڭىنا دەيىن اياقتالادى. ناتيجەسىندە، سايرام، ازات، تاسساي، ميراس، نۇرتاس، ۇلاعات، شاپاعات، سولتۇستىك-شىعىس جانە سامال-3 شاعىن اۋداندارى كوللەكتورعا قوسىلادى. ايتا كەتۋ كەرەك، بيىل قالا تۇرعىندارىن كارىز جۇيەسىمەن قامتۋ ماقساتىندا بارلىعى 16 نىساننىڭ قۇرىلىسى جۇرگىزىلىپ جاتىر.

جوعارىدا اتالعان شاعىن اۋداندار­دىڭ ىشىندەگى ميراس ەلدى مەكەنىندە 980 ءۇي ورنالاسقان. قازىر وندا 1 مەكتەپ پەن 6 بالاباقشا بار. شاعىن اۋدان ەلەكتر جارىعى، اۋىز سۋ جانە تابيعي گازبەن 100 پايىز قامتىلعان. ەندى كارىز جۇيەسىن تارتۋ عانا قالىپ وتىر. جوباعا سايكەس ۇزىندىعى 50،4 شاقىرىم كارىز جۇيەسى سالىنىپ، ارى قاراي شاپاعات-2 شاعىن اۋدانىنا ۇزارتىلادى. بۇگىندە قۇرىلىستىڭ ءبىرازى ورىندالعان. قولدانىسقا بەرۋ مەرزىمى بيىل قاراشا ايىندا دەپ جوسپارلانىپ وتىر. قۇرىلىستى اتقارۋشى مەرگىلەر كومپانيا – «ىنتىماق بەس ارىس» جشس. ال ونىڭ تەحنيكالىق قاداعالاۋشىسى «تۇران قۇرىلىس» مەكەمەسى.

اقجايىق شاعىن اۋدانىن ينجينەرلىك ينفراقۇرىلىممەن قامتۋ ماقساتىنا وراي قازىر مۇندا دا كارىز جۇيەسىنىڭ قۇرىلىسى قىزۋ قارقىن العان. سمەتالىق جوباعا سايكەس ۇزىندىعى 22،1 شاقىرىم كارىز جۇيەسى سالىنۋعا ءتيىس. وسىعان وراي بيۋدجەتتەن 686،1 ملن تەڭگە قارالىپ وتىر. قۇرىلىسى بيىل باستالعان نىساندا قا­زىر جۇمىستىڭ جارتىسىنا جۋىق بولىگى ورىندالعان. جۇمىستى اياقتاۋ مەرزىمى 2023 جىلدىڭ تامىزىنا قاراي جوسپارلاندى. پايدالانۋعا بەرىلسە، شاعىن اۋدانداعى 4 200 ءۇي كارىز جۇيەسىنە قوسىلادى. جاڭا كارىز جۇيەسىن شاعىن اۋدان حالقىمەن بىرگە كاسىپورىندار، مەكتەپ پەن بالاباقشالار دا پايدالانباق.

اقجايىق شاعىن اۋدانىندا 35 كوپ­قاباتتى ءۇي بولسا، قالعانى جەكە سەكتوردا­عى تۇرعىن ۇيلەر. اۋىز سۋ، ەلەكتر جارى­عى جانە تابيعي گازبەن تولىق قامتىلعان. 3 مەكتەپ پەن 12 بالاباقشا بار. بىلتىر 8 بالالار ويىن الاڭشاسى مەن 2 سپورت الاڭشاسى سالىنىپ، پايدالانۋعا بەرىلگەن. بيىل 10 سپورت الاڭشاسىنىڭ قۇرىلىسى ءجۇرىپ جاتىر. سونىمەن بىرگە شاعىن اۋداندا وسى جىلى 13 كوشە ورتاشا جوندەۋدەن وتپەك. اتاپ ايتقاندا، جاعاتاي كوشەسىنىڭ جالعاسى، ورازباي اتا، بەتەگە جالعاسى، جاعاتاي كوشەسىنىڭ جالعاسىنداعى اتاۋى جوق كوشە، №12 كوشە، سارباز كوشەلەرىنە اسفالت توسەلەدى. جوسپارعا سايكەس، جىل سايىن ورتاشا جوندەۋ جۇمىستارىمەن قالانىڭ ورتالىق كوشەلەرى عانا ەمەس، اۋداننىڭ ىشكى ورامدىق كوشەلەرى دە قامتىلادى. بۇگىندە جوسپارلانعان 308 كوشەنىڭ 145 كوشەسى جوندەۋدەن ءوتىپ، ەل يگىلىگىنە پايدالانۋعا بەرىلدى. سونىمەن قاتار بۇگىنگە دەيىن اقجايىقتا 8 كوشە جارىقتاندىرىلعان. بيىل بالقاراعاي، اسفەندياروۆ كوشەسىنە جارىق بارسا، 2023 جىلى بايسباەۆ پەن قاراساي، 2024 جىلى سپانوۆ پەن ۋالي اتا كوشەلەرىنە جارىقشامدار ورناتىلادى.

مۇنىمەن قوسا، شىمكەنت قالاسىندا 2020 جىلى 39 كوشە جارىقتاندىرىلىپ، قالانى قامتۋ كورسەتكىشى 24 پايىزدان 29،5 پايىزعا وسكەن ەدى. 2021 جىلدان باس­تاپ قالا اكىمىنىڭ تاپسىرماسىنا ساي­كەس مەملەكەت-جەكەشەلىك ارىپتەستىك جوباسى اياسىندا 104 كوشەگە جارىقشام­دار قويىلدى. ناتيجەسىندە، بۇگىندە 747 كوشەنىڭ 324-ءى جارىقتاندىرىلىپ، قامتۋ كورسەتكىشى 43،4 پايىزعا جەتتى. قوسىمشا 12 كوشەنىڭ جارىقشامى قايتا جوندەلدى. بيىل دا اتالعان جوبا اياسىندا 102 كوشە جارىقتاندىرىلماق. جۇمىستار كەزەڭ-كەزەڭىمەن جىل سوڭىنا دەيىن جۇرگىزىلەدى. ناتيجەسىندە، 2022 جىل قورىتىندىسىنا سايكەس شىمكەنت كوشەلەرىنىڭ 57 پايىزىن تۇنگى جارىقپەن قامتۋ جوسپارلانعان. 2023 جىلى 106 كوشەنى جارىقتاندىرىپ، قامتۋ كورسەتكىشىن 70 پايىزعا ءوسىرۋدىڭ جوسپارى قويىلىپ وتىر.

بۇگىنگە دەيىن ساۋلە شاعىن اۋدانىن­داعى 276 ورامنىڭ ينفراقۇرىلىم­دىق ماسەلەسى قالانىڭ كۇن تارتىبىنەن تۇس­پەي كەلگەن ەدى. ەندىگى رەتتە قالانىڭ دامۋ جوس­­پارىنا ساي ينفراقۇرىلىممەن قامتۋ جۇ­مىستارى قىزۋ ءجۇرىپ جاتىر. قازىر 276 ورامدا ينجەنەرلىك جۇيەلەرمەن قامتۋ بويىنشا قۇرىلىس جوسپارلى كەستەگە ساي اتقارىلۋدا. ەلدى مەكەن اۋىز سۋمەن تولىق قامتىلعان. ساپالى ەلەكتر جارىعىن جەتكىزۋ ءۇشىن قۇرىلىس جۇمىسى 2021 جىلى باستالعان بولاتىن. سوعان سايكەس ۇزىندىعى 76،2 شاقىرىمدىق ىشكى ورامدىق جەلى تارتىلدى، بۇل ءوز كەزەگىندە 1 300-دەن اسا ابونەنتتىڭ مەملەكەتتىك جارىقتى قولدانۋىنا مۇمكىندىك تۋعىزىپ وتىر. ال تابيعي گازبەن قامتۋ ءۇشىن ىشكى ورامدىق قۇبىر جۇيەسىن تارتۋ جۇمىسى بيىل ال­عاشقى جارتىجىلدىقتا باستالدى. گاز جۇيە­لەرىنىڭ ۇزىندىعى – 28 شاقىرىمدى قۇرايدى. ونىڭ قۇرىلىسى جىل سوڭىنا دەيىن اياقتالادى دەپ كۇتىلۋدە.

قالالار قاي كەزدە دە ادامزات وركە­نيەتىنىڭ كۇرەتامىرى سانالىپ كەلدى. مەگا­پوليس بولعان سوڭ ول جەردە عىلىم دا، مادەنيەت پەن ەكونوميكا دا قارىشتاپ داميدى. ال بۇل جاعدايدا ءىرى قالانى شەتكى ايماقتارىمەن قوسا وركەندەتۋ ماڭىزدى. سوندىقتان دا بۇگىنگى تاڭدا مەگاپوليستىڭ ورتالىق اۋداندارىنان شەتتە ءومىر ءسۇرىپ جاتقان تۇرعىنداردى ءوزىنىڭ ناعىز قالا ازاماتى ەكەنىن سەزىندىرۋگە بارىنشا كوڭىل ءبولىنىپ، جاعداي جاسالۋدا.

 

شىمكەنت

سوڭعى جاڭالىقتار

ءوڭىر جانە وركەنيەت

ساياسات • كەشە

اعا بۋىننىڭ قولداۋى

ساياسات • كەشە

ەسىمنەن كەتپەس ەساعاڭ

رۋحانيات • كەشە

بار ءۇمىت – بۋبليكتە

تەننيس • كەشە

وقىرماننىڭ رۋحاني ولجاسى

ەگەمەن قازاقستان • كەشە

ۇقساس جاڭالىقتار