قوعام • 16 تامىز، 2022

جالبىز بەن جاۋىنقۇرت وسىرەدى

229 رەت كورسەتىلدى

ەرىنبەگەن ادامعا كاسىپ كوپ. ماسەلەن، اتىراۋلىق انار بەكمامبەتوۆا وزگەلەرگە توسىن كورىنگەنىمەن، ۇلگى بولارلىق ءىستى قولعا الدى. قازىر جەكە ءۇيىنىڭ اۋلاسىندا ماروككو جالبىزى مەن كاليفورنيالىق جاۋىنقۇرتتى ءوسىرىپ وتىر.

ونىڭ ايتۋىنشا، جاۋىنقۇرت – توپىراقتى قۇنارلاندىرۋعا تاپتىرمايتىن ءتاسىل. ول بۇل كاسىبىن جىل باسىندا باستاعان. جاۋىنقۇرتتى جا­پى­راق، تال ساباعى مەن ءتورت ت ۇلىكتەن بولىنگەن ورگانيكالىق زاتتارمەن قو­رەك­تەندىرەدى. ءسويتىپ، بيوگۋمۋس دەپ اتا­لاتىن بيولوگيالىق تىڭايتقىش شىعارادى.

– بۇل كاسىپتى قولعا الامىن دەگەن ويىم بولعان جوق ەدى. جاڭا جىل قارساڭىندا كۇيەۋبالا ءبىر قوراپ­قا سالىنعان كاليفورنيالىق جاۋىن­قۇرتتى اكەلىپ بەردى. سودان جاۋىن­قۇرت­تى زەرتتەي باستادىم. كەيىن ۇيدە وسىرۋگە بەل بايلادىم. جاۋىنقۇرت كوبەيە ءتۇستى. كەيىن تاعى دا ساتىپ الدىم. التى ايدا ءبىر قوراپتاعى جاۋىن­قۇرتتى 400 مىڭعا جەتكىزدىم. قازىر 40 شارشى مەتر اۋماقتا ءوسىرىپ وتىرمىن، – دەيدى ا.بەكمامبەتوۆا.

ءۇي ىرگەسىنەن جەكە كاسىبىن اشقان ول قۇرت­تارعا مالدىڭ تەزەگى مەن جەمىس-جيدەك، كوكونىستىڭ قالدىعىن دا بەرەدى. مۇنداي ورگانيكالىق تىڭايت­قىشتاردى اۋىل ىشىنەن تابۋ قيىن ەمەس. الايدا جاۋىنقۇرتتىڭ كالي­فورنيالىق ءتۇرى جوعارى باعالا­ناتىن­دىق­تان، ونىڭ كۇتىمى دە سوعان ساي بولۋى قاجەت.

– قازىر كاليفورنيالىق جاۋىن­قۇر­تىنىڭ نارىقتاعى قۇنى 1 شارشى مەترىنە 150 مىڭ تەڭگە تۇرادى. قۇرت­تار­دى دەرناسىل كەزىندە مالدىڭ قيى مەن جەمىس-جيدەك قالدىعىنا تاستايمىن. قالدىقتى ءۇش ايدا قورىتىپ بەرە­دى. ودان سوڭ قۇرتتاردى ەلەكپەن وتكىزىپ، ساتۋعا ازىرلەپ قويامىن. ساتۋدان قال­عانىن قايتادان قالدىقتاردى قورى­تۋعا جىبەرەمىن. بۇل پروتسەسس وسىلاي توقتاۋسىز جالعاسا بەرەدى، – دەپ تاجىريبەسىمەن ءبولىستى ا.بەكمامبەتوۆا.

ول ءۇيىنىڭ اۋلاسىندا تەك جاۋىنقۇرت وسىرۋمەن شەكتەلگەن جوق. بۇعان قوسا جەمىس-جيدەك پەن كوكونىستىڭ سان ءتۇرىن ءوسىرىپ وتىر. سونىڭ قاتارىندا ماروككو جالبىزى دا بار.

– بۇرىن جالبىزدى ءوسىرىپ كورگەن ەمەسپىن. ماروككو جالبىزىن ارىپتەسىم­نىڭ كەڭەسىمەن وسىرۋگە دەن قويدىم. ول ماروككو جالبىزىن ءبىزدىڭ نارىقتان تابۋ قيىن ەكەنىن، باعاسى قىمبات ەكەنىن اڭگىمەلەدى. راسىندا دا، سولاي ەكەن. ساۋدا ورنىنان ءبىر كيلو جالبىزدى ساتىپ اكەلدىم. ونى ابدەن تامىر جايعانشا، ەكى اپتا بويى باپتادىم. كەيىن اۋلاعا ەكتىم. قازىر جالبىزعا سۇرانىس كوبەيىپ، ءوسىرىپ ۇلگەرە الماي ءجۇرمىن، – دەيدى ول.

ەندى انار بەكمامبەتوۆا جاۋىن­قۇر­تى مەن جالبىز ءوسىرۋ ءىسىن كەڭەيتپەك ويى بار. ويتكەنى وعان شارۋالاردان سۇرانىس ارتا تۇسكەن. سول سەبەپتەن قولىنان كەلەتىن كاسىپتى جانداندىرىپ، بيوگۋمۋسپەن جەرگىلىكتى ەگىنشىلەردى قام­تاماسىز ەتۋدى كوزدەپ وتىر.

– قۇرت پەن جالبىز ءوسىرۋدىڭ پايداسى دا، تابىسى دا مول ەكەنىنە كوز جەتكىزدىم. الدىمەن ەڭبەك ەتۋگە ىنتام وياندى. ەكىنشىدەن، ءوڭىردىڭ تۇزدى توپىراعىن قۇنارلاندىرۋعا ىقپالى زور. ۇشىنشىدەن، وسى كەزگە دەيىن سىرتتان تاسىمالدانعان قاجەتتى نارسەنى ءوزى­مىز دە وسىرە الادى ەكەنبىز. دەمەك ءتول اقشامىز سىرتقا كەتپەي، وزىمىزدە قالادى عوي، – دەيدى باعبان.

 

اتىراۋ وبلىسى

سوڭعى جاڭالىقتار

ۇقساس جاڭالىقتار