قوعام • 15 تامىز، 2022

جۇرەك جىلۋىنا نە جەتسىن؟!

37 رەت كورسەتىلدى

كەشە بۋراباي باۋرايىندا ءبىرىنشى ورتالىق ازيا ۆولونتەرلەر فورۋمى اشىلدى. ىلكىمدى ىزگىلىككە نەگىزدەلگەن، جان جادىراتار جاقسى ىستەرگە ۇيىتقى بولىپ وتىرعان ۆولونتەرلەردىڭ قاتارى كۇن وتكەن سايىن كوبەيىپ، مۇمكىندىگى ارتىپ، قارىمى مولايىپ كەلەدى.

بۇل ءىس-شارانى اقپارات جانە قوعام­دىق دامۋ مينيسترلىگى ۇيىمداستىرىپ وتىرعاندىعىن ايتا كەتەلىك. نەگىزىندە فورۋم مەملەكەت باسشىسى قاسىم-جومارت توقاەۆتىڭ 2020 جىلى بىرىككەن ۇلتتار ۇيىمىنىڭ باس اسسامبلەياسىنىڭ 75-ءىنشى سەسسياسىندا ۆولونتەرلەردى جۇمىلدىرۋدىڭ حالىقارالىق جىلىن جاريالاۋ جونىندەگى باستاماسىن قولداۋعا باعىتتالعان. شىن مانىندە ۆولونتەرلەر ۇلكەن كۇش. كۇش بولعاندا دا جۇدەگەن كوڭىلدى دەمدەيتىن، تۇڭىلگەن جاندى جادىراتاتىن، كۇڭگىرت تارتقان تۇستا ساۋلە سەبەزگىلەيتىن شاراپاتى مول.

العاشقى كۇنى «الەمدىك كافە» فور­ما­تىنداعى ارقيلى ستراتەگيالىق سەسسيالار، ءبىلىم بەرۋ، ەكولوگيا، مەديتسينا، جۇمىسقا ورنالاستىرۋ، ينكليۋزيا، بۇقارالىق سپورت، ەتنو-ەرىكتىلەر جانە باسقا دا بىرقاتار باعىت بويىنشا ويىن فورماتىنداعى ۆوركشوپتار ءوتتى.

تابيعاتى تامىلجىعان بۋراباي باۋ­رايىنا ەلىمىزدىڭ تۇكپىر-تۇكپىرىنەن جينالعان ۆولونتەرلەرمەن بىرگە تاجىك­ستان مەن تۇرىكمەنستاننان دا كەلگەن وكىلدەر بار. جينالعاندار الدىندا قۇتتىقتاۋ ءسوز سويلەگەن اقپارات جانە قوعامدىق دامۋ مينيسترلىگى ازاماتتىق قوعام ىستەرى كوميتەتىنىڭ توراعاسى ماديار قوجاحمەت ەرىكتىلەرگە العىسىن بىلدىرە كەلە، بۇگىنگى جيىننىڭ وزىق تاجىريبەلەردى تالقىلاۋعا جانە ىلكىمدى ىستەر اتقارىلعان ىزگى شارۋانى ەكشەي كەلە، ۇلگى-ونەگە الۋعا باعىتتالىپ وتىر­عاندىعىن اتاپ ءوتتى.

– ۆولونتەرلىك ءبىزدىڭ ەلىمىزدە ءومىر ساپاسىن مەيلىنشە ارتتىراتىن ماڭىزدى الەۋمەتتىك قۇبىلىس بولىپ سانالادى، – دەدى ول. – بۇل مەملەكەتتىڭ الەۋمەتتىك-ەكونوميكالىق دامۋى ءۇشىن كەرەك. جالپاق الەمدى جامان تۇماۋ جايلاعان كەزدە ەرىكتىلەردىڭ ەرىك-جىگەرى ايتا قالارلىقتاي كومەك بولدى.

سپيكەر ءدال قازىرگى ۋاقىتتا بۇكىل الەمدەگى ۆولونتەرلەردىڭ كەدەيشىلىكتى جويۋعا، پاندەمياعا قارسى اتقارىلىپ جاتقان قىرۋار شاراعا قولۇشىن بەرىپ، كومەكتەسەتىندىگىنە توقتالدى. ءارى ءتورت قۇبىلاسىن تەگىس جۇرەك جىلۋىمەن جىلىتىپ، ايشۋاق نۇر سەبەزگىلەيتىن ەرىكتىلەر فورۋمى ءدال بۇگىن تۇركىستاندا دا باستالعاندىعىن ايتىپ ءوتتى. وندا قىرعىزستان مەن وزبەكستاننىڭ دا وكىلدەرى بار. جاقسى ىسكە جانى سۇيسىنگەن كورشى مەملەكەتتەردىڭ قازاقستان توپىراعىندا باستاۋ العان باعالى باس­تامانى جان-جاقتى قولداپ، ادام جانىن ەلجىرەتەتىن يگى ىستەردىڭ قانات جاياتىندىعى ءسوزسىز. بۋراباي باۋرايىندا جينالعان ءبىر قاۋىم ەل، جاقسىلىق ءدانىن سەۋىپ جاتقان ۆولونتەرلەر تۇركىستانداعى جيىنعا كوڭىل اۋدارعان بولاتىن.

– ەل ازاماتتارى قايىرىمدىلىق جانە الەۋمەتتىك ومىرگە بەل بۋىپ، بى­لەك سىبانىپ بەلسەندى ارالاسۋدا، – دەدى ازاماتتىق قوعام ىستەرى كو­مي­­تەتى توراعاسىنىڭ ورىنباسارى گۇل­با­را سۇل­تانوۆا. – بۇل پىكىرىمىزگە ءارتۇر­لى سپورت جارىستارىن، ىزگىلىككە تولى قايىرىمدىلىق مارافوندارىن، ەمدە­لۋى قيىن دەرتكە تاپ بولعان بالالاردى قولداۋ باعدارلامالارىن، بالالار ۇيلەرى مەن ونكولوگيا بولىمشەلەرىندە ىسكە اسىرىلىپ جاتقان جاناشىر جوبالاردى ۇيىمداستىرۋعا سەپ بولعان ۆولونتەرلەردىڭ ەرەن ەڭبەگى دالەل بولا الادى. بالكىم، بۇل ءىستىڭ جاپپاي وركەندەۋى حالقىمىزدىڭ بويىنداعى قايىرىمدىلىق، ىزگىلىك، جاناشىرلىق سياقتى ادەمى ادامگەرشىلىك قاسيەتتەرگە بايلانىستى شىعار. تاريحي تۇرعىدان العاندا ەلىمىزدە ىلكى زاماننان بەرى اسار ۇيىمداستىرۋ ءتارىزدى عۇرىپتار بولدى ەمەس پە؟!

گۇلبارا بەكەتقىزىنىڭ ايتۋىنا قاراعاندا، وتكەن جىلدىڭ وزىندە-اق Birgemiz جوباسى اياسىنداعى ءىس-شارالارعا ومىرلىك قيىن جاعدايلارعا تاپ بولعان بالالار مەن جاستاردى قولداۋ، مەديتسينالىق، ەكولوگيالىق باعىتتاعى ەرىكتىلەردىڭ ءىس-قيمىلى، ماتەريالدىق جانە رۋحاني، مادەني-تاريحي مۇرانى ساقتاۋ، جانۋارلاردى قورعاۋ بويىنشا جۇرگىزىلگەن جۇمىستارعا ۇزىن-ىرعاسى جەتپىس مىڭنان استام ۆولونتەر قاتىسىپتى. اتالعان سالانى تۇراقتى دامىتۋ ءۇشىن 2021-2023 جىلدارعا ارنالعان ۆولونتەرلىكتى دامىتۋدىڭ جول كارتاسى ازىرلەنگەن. قازىرگى ۋاقىتتا مەملەكەتتىك ورگاندارمەن ۆولونتەرلىك قوزعالىستى ۇيىمداستىرۋشىلاردىڭ اراسىنداعى ءوزارا ءىس-قيمىلدىڭ زاماناۋي جۇيەسىن قۇرۋ باعىتىندا جۇمىس جۇرگىزىلىپ جاتىر.

– ءبىز مۇقتاج جانداردىڭ بارلىعىن قول­داۋعا كومەكتەسەتىن جاڭا يننوۆا­تسيالىق تاسىلدەردى پايدالانامىز، – دەدى ازاماتتىق قوعام ىستەرى كوميتەتى تور­اعاسىنىڭ ورىنباسارى گۇلبارا سۇلتانوۆا.

ۆولونتەرلەردىڭ ۇلان-عايىر جۇمى­سىن وقىرماننىڭ كوز الدىنا ەلەستەتۋ ءۇشىن ناقتى دەرەكتەر كەلتىرە كە­تەيىك. ۇيىمدار مەن توپتاردىڭ سانى ءۇش ەسەگە ۇلعايىپ، بۇگىنگى كۇنى 600-گە جەتكەن. تۇراقتى ۆولونتەرلەر دە ءتورت ەسە كوبەيىپ، 200 مىڭنان استام ادامدى بىرىكتىرىپ وتىر. ىلكىمدى ىزەت، جۇرەك تەبىرەنتەر قايىرىمدىلىق ءىس-شارالارىنىڭ ارقاسىندا وسىنشاما ءىس تىندىرىلىپ وتىر. فورۋمنىڭ ەكىنشى كۇنى قاتىسۋشىلار ء«وز يدەياڭمەن ءبولىس» تاقىرىبى اياسىندا ءوز وڭىرلەرىندە اتقارىلىپ جاتقان سان الۋان ۆولونتەرلىك جۇمىس تۋرالى تارقاتىپ ايتىپ بەرمەك. بۇل قادام ءوزارا ىنتىماقتاستىققا، جاڭا بىرلەسكەن جوبالاردى قۇرۋعا، ءتۇپتىڭ تۇبىندە حالىقارالىق دەڭگەيگە شىعۋعا مۇمكىندىك بەرەدى. ءتورت باعىت بويىنشا اۋقىمدى اكتسيالار قولعا الىنادى. ونىڭ ىشىندە تابيعاتقا قامقورلىق، ياعني سەنبىلىكتەر ۇيىمداستىرىلادى.

جۇمىس كوپ، باعىت ايقىن. ءسوز سوڭىندا اقمولا وبلىسىندا اتقارىلعان ىزگى شارۋالار تۋرالى ايتا كەتكەنىمىز ارتىق بولماس. ۇلى ىستەردىڭ وسىنداي تاراۋ-تاراۋ جىلعا باستاۋلاردان قۇرالاتىندىعىن دالەلدەۋدىڭ قاجەتى جوق شىعار. قام كوڭىلگە نۇر شاپاعاتىن قۇيىپ، دەمەۋ بولار، الدىنان ءۇمىت شىراعدانىن جاعار جۇرەك جىلۋىنان اسقان قۇدىرەت جوق. جامان تۇماۋ جان القىمنان العان كەزدە ءوز باستارىن قاۋىپ-قاتەرگە تىگىپ، حالقىنىڭ جايىن ويلاعان ەرىكتىلەردىڭ ەرلىك ىستەرى تۋرالى قانشا ايتساق تا كوپتىك ەتپەيتىنى بەلگىلى. بالكىم، قوعامنىڭ ءجۇزىن نۇرلاندىراتىن دا وسىنداي ادامگەرشىلىك اجارعا بوككەن بەلسەندى قيمىل شىعار. وڭىردە بۇگىنگى كۇنى ەرىكتىلەر قاتارى ۋاقىت وتكەن سايىن ايرىقشا قارقىنمەن مولايىپ، كوبەيە ءتۇسۋى ريزاشىلىق سەزىمگە بولەيتىنى بار. بۇگىنگى كۇنى ءار تاراپتا جاناشىر ءىس-قيمىلدارى ارقىلى جان شۋاعىن اياماي سەبەزگىلەپ جۇرگەن 3 600-دەن اسا ەرىكتىلەردىڭ باسىن بىرىكتىرىپ وتىرعان سەكسەنگە جۋىق ۇيىم بار. وعان قوسا جەتى جالپىۇلتتىق جوبا جۇزەگە اسىرىلۋدا.

جان جۇرەگىڭدى ەلىتىپ، ەرىكسىز رازى قىلاتىن، قۇلاققا دا، جۇرەككە دە جىلى اسەر ەتەتىن ەرىكتىلەردىڭ تولىمدى ىستەرى جاڭا سيپاتپەن جاڭارعان قازاقستاننىڭ جاقسىلىق قىرىن تانىتاتىنداي. ەرىكتىلەردىڭ ەڭبەگى دە اتاۋسىز قالىپ جاتقان جوق. ماسەلەن، «دوبروە سەردتسە «ليدەر.كز» ورتالىعىنىڭ ۇيلەستىرۋشىسى يرينا كوتۋحوۆا «قۇرمەت» وردەنىمەن ماراپاتتالدى. «فرونت» ەرىكتىلەر قولداۋ ورتالىعى» ءوفيسىنىڭ جەتەكشىسى داستان ەرمەكوۆ «شاپاعات» مەدالىن وڭىرىنە تاقتى. ءسوز اراسىندا داستان امانگەلدى ۇلىنىڭ 2018-2022 جىلدارى جاستار ۇيىمىنا جەتەكشىلىك جاساپ، نەبىر يگى ىستەرگە ۇيىتقى بولىپ كەلە جاتقاندىعىن ايتا كەتسەك ارتىق بولماس. وزدەرىنىڭ كىشكەنتاي بولسا دا جاناشىرلىق كومەكتەرىنىڭ ارقاسىندا ەل بىرلىگىن ەسەلەپ، مۇقتاج جاندارعا قولۇشىن بەرۋدى اسقارالى مىندەت سانايتىن جاستارمەن ۇيلەسىمدى جۇمىس ىستەپ كەلەدى. «دوبروە سەردتسە «ليدەر.كز» ورتالىعى بولسا 2021 جىلى جالعىزباستى ادامدارعا ارنالعان پانسيونات اشۋعا سەپتىكتەرىن تيگىزدى. بۇل جەردە تاعدىر تالكەگىنە ۇشىراعان، جاستارى جەر ورتاسىنان اۋعان كەزدە بار قيىندىقپەن جەكە-دارا قالعان جاسامىس ادامدار پانا تاپتى. پانا عانا ەمەس، جۇرەك مۇڭىن، كوڭىل سىرىن تىڭدايتىن ىزگى نيەتتى ىزەتتى ادامدار قانشاما؟! قينالعان ساتتە ءدال سونداي جانداردىڭ دەمەۋ بولۋى ولاردىڭ دا كوڭىلىن جۇباتىپ، مارقايتىپ تاستاعانداي.

مىنە، وسىنداي ناقتى ىستەر از ەمەس. ەرىكتىلەر الەۋمەتتىك جاعىنان از قامتىلعان وتباستارىنا كومەك كورسەتۋگە ءاردايىم ءازىر. مۇنداي جۇمىستى ولار ۇدايى اتقارۋدا. 2020 جىلدىڭ باسىنان وڭىردە Birgemiz Aqmola ءموبيلدى قوسىمشاسى ىسكە قوسىلدى. مۇنداي قوسىمشانىڭ ازىرگە اقمولا وڭىرىندە عانا بار ەكەندىگىن ماقتانىش سەزىممەن ايتا كەتۋگە بولادى. قوسىمشانىڭ وزىنەن «مەنىڭ كومەكتەسكىم كەلەدى»، سونداي-اق «كومەك كەرەك» دەگەن ەكى ءبولىمدى تاڭداي الاسىز. ادامدارعا پايدالانۋعا وتە ىڭعايلى ەتىپ جاسالعان.

ايماقتا ەرىكتىلەردى مەيلىنشە مولىنان ۇيىمداستىرىپ، جاقسى ىستەرگە باعىتتاۋ ورايىندا تىندىرىمدى شارۋالار جۇزەگە اسىرىلۋدا. ەل تاۋەلسىزدىگىنىڭ وتىز جىلدىعىنا وراي ۇيىمداستىرىلعان Birgemiz Life وبلىستىق بايقاۋى وتكىزىلىپ، Uzdik volunteer، Volunteer team، «ۇزدىك ۆولونتەرلىك باستاما» اتتى ءۇش اتالىم بويىنشا ەرىكتىلەر ىشىندە ەرەكشە قاجىر-قايراتىمەن، مەيىرىم ىزگىلىگىمەن توپ جارعاندار العىس حاتتارمەن ماراپاتتالدى. «فەنيكس» ەرىكتىلەر ورتالىعى 2014 جىلدىڭ 22 قازانىندا كوكشەتاۋ قالاسىندا قۇرىلعان بولاتىن. ءبىر ماقسات توڭىرەگىندە توپتاسقان، ەل جايىن ەستەن شىعارمايتىن ەرىكتىلەر كۇنى بۇگىنگە دەيىن بەلسەندى جۇمىس ىستەپ كەلەدى. ءساتتى جوبالارىنىڭ ءبىرى «ديسپەتچەرلىك قىزمەت» جوباسى. بۇل جوبا «شانس» مۇگەدەك ادامداردى وڭالتۋ ورتالىعىمەن قويان-قولتىق جۇمىس ىستەيدى. مۇمكىندىگى شەكتەۋلى ادامداردى ارنايى كولىكپەن قامتاماسىز ەتىپ، ولاردىڭ قاجەتتىلىگى بولعان كەزدە ءارتۇرلى مەكەمە مەن ەمحاناعا بارۋىنا كومەكتەسىپ وتىر. ال اتاۋلى كومەك جوباسى كومەككە ءزارۋ ادامدارعا قولۇشىن بەرۋگە ارنالعان.

 

اقمولا وبلىسى

 

سوڭعى جاڭالىقتار

جاپونيادا جەر سىلكىندى

الەم • بۇگىن، 10:22

ۇقساس جاڭالىقتار