ەندى قالا تۇرعىندارى پايدالانىلعان نان ونىمدەرىنىڭ قالدىقتارىن جابدىقتالعان ارنايى ورىندا قالدىرادى. ءار ەكى كۇن سايىن كونتەينەرلەردەگى نان قالدىقتارى جينالىپ, سۇرىپتالىپ, كەپتىرىلىپ, تسەحقا جىبەرىلەدى. ارنايى جابدىقتا نان قالدىقتارىنان ءىرى قارا مەن ۇساق مالعا ارنالعان تۇيىرشىكتەلگەن جەم دايىندالادى. دايىن ءونىم قاجەت ەتكەن شارۋا قوجالىقتارى مەن باسقا دا كاسىپكەرلەرگە ساتىلادى.
بۇل جوبانى كاسىپكەر ارمان ساعىناەۆ ازىرلەگەن. ونىڭ جوباسى اكىمدىك تاراپىنان قولداۋعا يە بولىپ وتىر.
«مەن ۋاقىتتى بوسقا وتكىزبەۋگە شەشىم قابىلدادىم, نەسيە الىپ, ءوز جوبامدى ىسكە اسىرا باستادىم. بوشكەلەر ساتىپ الىپ, ولاردى ءوز قولىممەن جابدىقتاپ, بويادىم. قىتايدان قۇرال-جابدىققا تاپسىرىس بەردىم. بۇل جۇمىستى الدىن الا زەرتتەپ, اقپارات ىزدەستىردىم. بىرقاتار جەم شىعارۋشىمەن كەزدەسىپ, مالىمەت جينادىم. باعا مونيتورينگىن جاساپ, جۇمىستىڭ قاراجاتىن ەسەپتەدىم. مۇمكىندىگىم بار ەكەنىنە كوز جەتكىزگەن سوڭ, قالا بويىنشا نان كونتەينەرلەرىن ورناتۋدان باستايمىن دەپ شەشتىم. بىرىنشىدەن, بۇل قالا تۇرعىندارىنىڭ نان ونىمدەرىنىڭ قالدىقتارى بويىنشا پروبلەماسىن شەشۋگە كومەكتەسەدى. ەكىنشىدەن, يتتەر قوقىس جاشىگىن شاشىپ, لاستامايدى. وسى جوبادا قولداۋ بىلدىرگەن قالالىق تۇرعىن ءۇي-كوممۋنالدىق شارۋاشىلىعى بولىمىنە العىس ايتامىن», دەدى ا. ساعىناەۆ.
قازىرگى ۋاقىتتا نۇرسايا, اۆانگارد, ۆوكزال ماڭى ىقشاماۋداندارى مەن ساتپاەۆ كوشەسى بويىنا 50 جاسىل ءتۇستى بوشكە تۇرىندەگى ارنايى كونتەينەر ورناتىلدى.
الداعى ۋاقىتتا قالادا وسىنداي 200 كونتەينەر ورناتۋ جوسپارلانۋدا.
