اقش-تىڭ مەريلەند شتاتىنىڭ تۇرعىنى لوتەرەيادان $76 ملن. ۇتتى

استانا. 7 مامىر. اقش-تا دجەكپوتى 414 ملن. دوللار بولاتىن جالپى ۇلتتىق Mega Millions لوتەرەياسىنىڭ ەكىنشى جەڭىمپازى انىقتالدى. بۇل تۋرالى يتار-تاسس حابارلادى. Mega Millions وكىلى ءمالىم ەتكەندەي, 18 ناۋرىزدا وينالعان ويىن تاريحىنداعى ءۇشىنشى ءىرى ۇتىستى مەريلەند شتاتىندا تۇراتىن ادام ۇتىپ العان. بىراق ول ءوزى جونىندە ناقتى مالىمەت بەرۋدەن باس تارتىپ, اتى-ءجونىن دە, جاسىن دا, جۇمىس ىستەيتىن جەرىن دە ايتۋدى ءجون كورمەپتى. تەك بەلگىلىسى, باقىتتى بيلەتتىڭ ەگەسى ونى لا-پلاتا قالاسىنداعى ءسپيرتتى ىشىمدىكتىر ماگازينىنەن ساتىپ العان. وسىعان وراي اتالمىش ساۋدا نۇكتەسىنىڭ يەسىنە 100 مىڭ دوللار كولەمىندە كوميسسيالىق وتەم بەرەتىن بولىپتى. ۇتىس يەسى اقشاسىن تۇتاسىمەن الۋعا شەشىم قابىلداپتى. لوتەرەيا شارتى بويىنشا ول سالىقتارىن تۇگەل تولەپ بولعاننان كەيىن قولىنا تۋرا 76,4 ملن. دوللار قارجى العان. ەگەر ۇتۋشى اقشاسىن 30 جىلدىڭ كولەمىندە ءبولىپ السا, تولەيتىن سالىعى الدەقايدا كوپ بولادى ەكەن. مەريلەندتەگى ۇتىس يەسىنە وينالعان دجەكپوتتىڭ تەك جارتىسى عانا ءتيىپ وتىر. ونىڭ ءبىرىنشى بولىگىن باقىتتى بيلەتتى سۋپەرماركەتتە ساتىپ العان فلوريدا شتاتىندا تۇراتىن جۇبايلار العان بولاتىن. امەريكانىڭ لوتەرەيا بيزنەسى تاريحىندا رەكوردتى مولشەردەگى دجەكپوت – 656 ملن. دوللار 2012 جىلعى ناۋرىزدا وينالىپتى. وعان ءۇش ادام قول جەتكىزىپ, جۇلدەنى قىلداي ءبولىسىپ العان. مۇرات ايتقوجا. دەرەككوز: يتار-تاسس. فوتو: EPA/LARRY W. SMITH.