ءبىلىم • 11 تامىز، 2022

ەرتەڭ ماگيستراتۋرا گرانتىنا قۇجات قابىلداۋ باستالادى

81 رەت كورسەتىلدى

بۇل تۋرالى ۇلتتىق تەستىلەۋ ورتالىعىنىڭ ءباسپاسوز قىزمەتىنەن ءمالىم ەتتى، دەپ حابارلايدى Egemen.kz.

«ول 15 تامىزعا دەيىن جوعارى وقۋ ورىندارىنىڭ قابىلداۋ كوميسسيالارى، ونىڭ ىشىندە ۆيرتۋالدى قابىلداۋ كوميسسيالارى ارقىلى جۇزەگە اسىرىلادى. جالپى 43 مىڭنان استام ادام ماگيستراتۋراعا ءتۇسۋ ءۇشىن ەمتيحان تاپسىردى. ولاردىڭ 42 پايىزى شەكتى بالل جينادى. ورتاشا كورسەتكىش – 71 بالل. ءبىر قاتىسۋشى ماكسيمالدى 150 بالدىڭ 140-ىن جينادى»، دەلىنگەن ورتالىق مالىمەتىندە.

كەشەندى تەستىلەۋ وتكىزۋ بارىسىندا 328 قاتىسۋشىنىڭ ناتيجەسى جويىلدى. ونىڭ ىشىندە 176 ادام سمارتفون، شپارگالكا جانە باسقا دا تىيىم سالىنعان زاتتاردى الىپ وتۋگە تىرىسقانى ءۇشىن تەست تاپسىرۋ مۇمكىندىگىنەن ايىرىلدى. كەشەندى تەستىلەۋ كەزىندە ەرەجەلەردى بۇزعانى ءۇشىن اۋديتوريادان 148 ادام شىعارىلىپ، ولاردىڭ ناتيجەلەرى جويىلدى. سونىمەن قاتار پوستپروكتورينگ قورىتىندىسى بويىنشا 4 ادامنىڭ ناتيجەسى جويىلدى. ولار ەمتيحان ماتەريالدارىن سۋرەتكە ءتۇسىرىپ، اۋديتوريادان الىپ شىعۋعا تىرىسقان.

«تەستىلەۋ ناتيجەلەرىمەن كەلىسپەگەن جاعدايدا وقۋعا تۇسەتىندەر اپەللياتسياعا ەلەكتروندى ءوتىنىش بەرە الدى. بيىل اپەللياتسياعا 20 مىڭنان استام ءوتىنىش بەردى، ونىڭ 121-ءى قاناعاتتاندىرىلدى. ماگيستراتۋرادا وقۋعا ارنالعان ءبىلىم بەرۋ گرانتتارى كەشەندى تەستىلەۋ ناتيجەلەرى بويىنشا كونكۋرستىق نەگىزدە بەرىلەدى. گرانت كونكۋرسىنا قۇجاتتاردى قابىلداۋ 12-15 تامىز ارالىعىندا جوو-لاردىڭ قابىلداۋ كوميسسيالارى، ونىڭ ىشىندە ونلاين ۆيرتۋالدى كوميسسيالار ارقىلى جۇزەگە اسىرىلادى. ياعني، بولاشاق ماگيسترانتتار قۇجاتتاردى ءداستۇرلى جانە ونلاين فورماتتا تاپسىرا الادى»، دەپ اتالىپ وتكەن حابارلامادا.

«قۇجاتتاردى تاپسىرۋ كەزىندە وقۋعا تۇسەتىن ادام ءبىلىم بەرۋ باعدارلامالارىنىڭ ءبىر توبىن جانە ءۇش جوعارى وقۋ ورنىن كورسەتەدى. ماگيستراتۋراعا ءبىلىم بەرۋ گرانتىن تاعايىنداۋ كونكۋرسى 16-20 تامىز ارالىعىندا وتەدى. جالپى 2022-2023 وقۋ جىلىنا ماگيستراتۋرا بويىنشا 13 مىڭنان استام گرانت ءبولىندى. گرانتتاردىڭ ەڭ كوپ سانى پەداگوگيكالىق ماماندىقتار ءۇشىن قاراستىرىلعان – 3642. ينجەنەرلىك، وڭدەۋ جانە قۇرىلىس سالالارىنا 3429 گرانت، جاراتىلىستانۋ عىلىمدارى، ماتەماتيكا جانە ستاتيستيكا – 1278، اقپاراتتىق-كوممۋنيكاتسيالىق تەحنولوگيالار – 1233، سونداي-اق اۋىل شارۋاشىلىعى مەن بيورەسۋرستارعا 527 گرانت ءبولىندى»، دەدى قر عجب ۇلتتىق تەستىلەۋ ورتالىعىنىڭ ديرەكتورى رۋسلان ەمەلباەۆ.

ەستەرىڭىزگە سالا كەتەيىك، ءبىلىم بەرۋ گرانتتارى قر ەڭبەك جانە حالىقتى الەۋمەتتىك قورعاۋ مينيسترلىگىنىڭ، سونداي-اق جۇمىس بەرۋشىلەردىڭ كادرلارعا قاجەتتىلىگى بويىنشا دەرەكتەرى نەگىزىندە بولىنگەن.

ءبىلىم گرانتى يەگەرلەرىنىڭ ءتىزىمى ۇلتتىق تەستىلەۋ ورتالىعىنىڭ سايتىندا جاريالانادى.

سوڭعى جاڭالىقتار

«تازا كوكجايلاۋ» اكتسياسى ءوتتى

ەكولوگيا • بۇگىن، 19:11

ءرۋبلدى ساتىپ الۋ 31%-عا ءوستى

ەكونوميكا • بۇگىن، 15:23

ۇقساس جاڭالىقتار