وبلىستىق اۋرۋحانانىڭ فۋنكتسيونالدى دياگنوستيكا دارىگەرى التىناي نۇرىشەۆانىڭ ايتۋىنشا, وسىنداعى گەپوتولوگيالىق ورتالىقتا مۇنداي اپپارات العاش رەت 2013 جىلى الىنعان. ال جاڭا اپپاراتپەن ەندى بالالارداعى سىرقاتتى انىقتاۋعا مۇمكىندىك جاسالىپ وتىر.
– عibroScan – باۋىردىڭ زاقىمدانۋ دەڭگەيىن دۇرىس باعالاۋعا, بولجاۋعا, اعزاداعى سوزىلمالى ديففۋزدىق اۋرۋلاردىڭ ديناميكاسىنا, ياعني گەپاتيتتىڭ ءورشۋى مەن ونىڭ تسيرروزعا اۋىسۋىنا باقىلاۋ جۇرگىزەتىن اپپارات. جاڭا اپپاراتپەن باۋىرداعى ونكولوگيالىق اۋرۋدىڭ وشاعى دا انىقتالادى, – دەيدى التىناي نۇرىشەۆا.
ونىڭ ايتۋىنشا, اۋرۋ بەلگىلەرىن انىقتاۋ ەش جاراقاتسىز ءارى قاۋىپسىز جۇرگىزىلەدى. ناۋقاسقا زەرتتەۋ جۇرگىزۋدىڭ كەرى اسەرى جوق. پاتسيەنتتى الدىن الا تەكسەرۋ, دايىنداۋ, ستاتسيونارعا جاتقىزۋ قاجەت ەمەس.
– جەرگىلىكتى دارىگەردىڭ جولداماسىمەن كەلگەن ءار ادام جاڭا اپپاراتتان تەكسەرۋدەن وتە الادى. تەكسەرۋ 10-15 مينۋتقا سوزىلادى. ونىڭ ناتيجەسى پاتسيەنتكە بىردەن بەرىلەدى. ال باۋىردى فيبروسكانەرلەۋ بىرنەشە رەت جۇرگىزىلۋى مۇمكىن. مۇنداي تەكسەرۋدىڭ ديسپانسەرلىك باقىلاۋ مەن تەراپيانىڭ تيىمدىلىگىن قاداعالاۋ كەزىندە ماڭىزى زور, – دەيدى ا.نۇرىشەۆا.
اتىراۋ وبلىسى
