مەديتسينا • 11 تامىز، 2022

كورەي مەديتسيناسىمەن بايلانىس كەڭەيدى

145 رەت كورسەتىلدى

الەمدە مەديتسينا سالاسىندا كورەي حالقىنىڭ ءباسى جوعارى. سوندىقتان قازاقستاندىق دارىگەرلەر كورەيلىك ارىپتەستەرىمەن ءوزارا تاجىريبە الماسىپ تۇرادى. جاقىندا جە­تىسۋعا بىلىكتى مامانداردىڭ ءبىر بولىگى كەلدى. تالدىقورعان قالالىق كوپسالالى اۋرۋحاناسىندا وڭتۇستىك كورەيا رەسپۋبليكاسىنداعى ايگىلى چۋنان ۋنيۆەرسيتەتى «حەندە» اۋرۋ­حاناسىنىڭ ماماندارى حالىققا كومەك كورسەتتى.

مەديتسينا سالاسى بويىنشا الەمنىڭ الدىڭعى قاتارىنان تابىلاتىن وڭتۇستىككورەيالىقتار 4 كۇن بويى ەمدەلۋشىلەردى قابىلداپ، تەگىن وتا جاساپ، جان-جاقتىلى ەم-دوم كورسەتىپ، سىرقاتتىڭ ساقايۋىنا قولۇشىن بەردى. وسىعان وراي وتكەن كونفەرەنتسيادا العاشقى بولىپ تالدىقورعان كوپسالالى اۋرۋحاناسىنىڭ باس دارىگەرى جۇماحان مولداقۇلوۆ ءسوز الدى.

– قالالىق اۋرۋحاناعا الەمنىڭ وزىق ەلدەرى ساناتىنداعى مەديتسينا ماماندارىنىڭ تەگىن قىزمەت كورسەتەتىنى، بىزبەن ءوزارا تاجىريبە الماساتىنى ۇلكەن جەتىستىك. بىرنەشە جىلعا جالعاسىپ كەلە جاتقان بۇل ساباقتاستىق اياسىندا ءبىزدىڭ دە ماماندار وڭتۇستىك كورەيا ەلىنە بارىپ، تەگىن قىزمەت كورسەتىپ، شەبەرلىگىن شىڭداپ كەلەدى، – دەدى قوناقجايلىق كورسەتكەن باس دارىگەر.

ج.مولداقۇلوۆتىڭ ايتۋىنشا، كوپ جىل كولەمىندە ورناعان بۇل ساباقتاستىق لايىقتى جەمىسىن بەرگەن. جاس مامانداردىڭ بىلىكتىلىگى ارتىپ، شەبەرلىگى شىڭدالعان. بۇگىنگى تاڭدا چۋنان ۋنيۆەرسيتەتى «حەندە» اۋرۋحاناسىنان جەتىسۋ وبلىسىنىڭ ورتالىعىنا 40 ەرىكتى، 10-نان استام تاجىريبەلى مامان، پروفەسسورلار مەن دوكتورلار كەلگەن. اتالعان مەيماندار ورتوپەديا، حيرۋرگيا، تراۆماتولوگيا، نەيروحيرۋرگيا، نەۆرولوگيا جانە شۇعىل مەديتسينالىق كومەك بويىنشا ەمدەلۋشىلەرگە قىزمەت كورسەتەتىن بولادى.

جيىن بارىسىندا وڭتۇستىك كورەيا رەسپۋبليكاسى «حەندە» اۋرۋحاناسىنىڭ ديرەكتورى كيم بۋ سول ءسوز الىپ، مەيماندوس ەلدىڭ ىستىق ىقىلاسىنا العىسىن جاۋدىردى. سونىمەن قاتار تاڭ سامالى ەلىنەن ارنايى كەلگەن بىلىكتى مامانداردى جەكەلەي تانىستىرىپ ءوتتى. Covid-19 ۆيرۋسى جانە الەم ەلدەرىنىڭ احۋالى جايلى سلايد كورسەتىپ، تىڭ اقپارلار، اۋرۋمەن كۇرەس جولدارى تۋرالى ناقتىلى ءوز ويىن ورتاعا سالدى.

ءوز كەزەگىندە تحونيل-نانۋم اكادەمياسىنىڭ ديرەكتورى لي دجە ۆان ءسوز الىپ، قازاقستاندا بىرنەشە رەت بولعانىن، قازاق حالقىنىڭ قوناقجايلىعىنا ريزا ەكەنىن ايشىقتادى. سونىمەن قاتار كوپ جىلداردان بەرگى وزىندىك تاجىريبەلەرى جيناقتالعان كىتاپتى تالدىقورعان كوپسالالى اۋرۋحاناسىنىڭ باس دارىگەرىنە سىيعا تارتتى.

جيىننان كەيىن كورەيا ەلىنىڭ دارىگەرلەرى كەزەك كۇتىپ وتىرعان ەمدەلۋشىلەردى قابىلداۋدى باستاپ كەتتى. ءتورت تاۋلىك كولەمىندە كورسەتىلەر كومەكتى كۇتكەن ەمدەلۋشىلەردىڭ قاتارى دا قالىڭ.

 

تالدىقورعان

سوڭعى جاڭالىقتار

ۇقساس جاڭالىقتار