وسى كۇنى ينستيتۋت قابىرعاسىندا تالعات بيگەلدينوۆ اتىنداعى مۇراجايدىڭ اشىلۋ سالتاناتى دا ءوتتى. اسكەري ۇشقىشتار دايارلايتىن ەلىمىزدەگى جالعىز وقۋ ورنىندا وتكەن سالتاناتتى ءىس-شارادا اقتوبە وبلىسى اكىمىنىڭ ورىنباسارى بۇلبۇل ەلەۋسىنوۆا ءوڭىر باسشىسىنىڭ قۇتتىقتاۋىن جەتكىزدى. قۇتتىقتاۋدا بىلاي دەپ جازىلعان: «ەكى مارتە كەڭەس وداعىنىڭ باتىرى ت.بيگەلدينوۆ اتىنداعى اۋە قورعانىسى كۇشتەرى اسكەري ينستيتۋتىندا قازاقستاندىقتاردان باسقا رەسەي فەدەراتسياسى مەن تۋىسقان ورتالىق ازيا مەملەكەتتەرىنەن كەلىپ وقىپ جاتقان جاس كوپ. باتىر بابامىزدىڭ ەسىمىن يەلەنگەن وقۋ ورنىنىڭ پروفەسسورلىق-وقىتۋشىلىق قۇرامى ءوز ءىسىن جەتىك بىلەتىن اسكەري ۇشقىشتار مەن ينجەنەرلەردى عانا ەمەس, وتانىن سۇيەتىن ناعىز پاتريوتتاردى دا تاربيەلەپ كەلەدى. وتىز جىلدان بەرى تاۋەلسىز قازاقستاننىڭ اسكەري ماماندارىن دايارلاۋ ىسىندە وسى وقۋ ورنى ماماندارىنىڭ ەڭبەگى زور».
بۇل وقۋ ورنىنىڭ ەڭ ءبىرىنشى تۇلەكتەرى 1998 جىلدىڭ 22 تامىزىندا ديپلوم الدى. سودان بەرى 2 500 وفيتسەر دايارلانىپ, ولار بۇگىندە ەلىمىزدىڭ اسكەري اۋە كەڭىستىگىندە جانە ازاماتتىق اۆياتسيا, قورعانىس سالاسىندا ابىرويلى ەڭبەك ەتىپ ءجۇر. ىرگەلى وقۋ ورنىن حالىق قاھارمانى, سەناتور تالعات مۇساباەۆ, ەلىمىزدىڭ اۋە قورعانىسى كۇشتەرى باس قولباسشىسىنىڭ جاۋىنگەرلىك جانە دەنە دايىندىعى جونىندەگى ورىنباسارى, پولكوۆنيك تالعات سىزدىقوۆ قۇتتىقتادى. قارۋلى كۇشتەر ارداگەرلەر كەڭەسىنىڭ اقتوبە وبلىسى بويىنشا توراعاسى, زاپاستاعى پولكوۆنيك قاجىمۇقان ساتەنوۆ كۋرسانتتاردى ەكىنشى دۇنيەجۇزىلىك سوعىستا اۋەگە 305 رەت كوتەرىلىپ, تالاي رەت ولىممەن بەتپە-بەت كەلگەن تالعات بيگەلدينوۆتىڭ قاھارماندىعىنان ۇلگى الىپ, ەلدىڭ ەستى ۇلدارى بولۋعا شاقىردى.
اسكەري ينستيتۋتتىڭ اتشاپتىرىم اۋماعىنداعى بوس تۇرعان عيماراتتا اشىلعان تالعات بيگەلدينوۆ اتىنداعى مۇراجايدى وسى وقۋ ورنىن 2002 جىلى بىتىرگەن 130 تۇلەك جاساقتاعان. قازىر مۇندا تالعات بيگەلدينوۆتىڭ ءار جىلدارى اقتوبەگە كەلگەن ساپارىندا تۇسىرىلگەن فوتوسۋرەتتەر, گازەت ماقالالارى, ۇشقىش كيىمدەرى, ۇشاق ماكەتتەرى, وتاندىق اسكەري اۆياتسيا تاريحىنا قاتىستى ءتۇرلى ەكسپونات قويىلعان. وسى وقۋ ورنىنىڭ 2002 جىلعى تۇلەگى, پولكوۆنيك مۇرات جاكەشوۆ باتىر اتىنداعى مۇراجاي اشۋ ۇسىنىسىن ينستيتۋت باسشىسى, اۆياتسيا گەنەرالى داۋرەن قوسانوۆ بىردەن قولداعانىن جەتكىزدى. وسى وقۋ ورنىنىڭ تاعى ءبىر تۇلەگى, SCAT اۋە كومپانياسىنىڭ قازىرگى ديرەكتورى Boeing747 ۇشاعىنىڭ ماكەتىن جىبەرسە, ازاماتتىق اۆياتسيا سالاسىندا قىزمەت ەتىپ جۇرگەن باسقا تۇلەكتەرى مۋزەيدى قىزىقتى ەكسپوناتتارمەن جابدىقتاۋدا بەلسەندىلىك تانىتقان. سونداي ۇيىمشىلدىقتىڭ ارقاسىندا از ۋاقىتتىڭ ىشىندە مۇراجاي ەكسپوزيتسياسى سيرەك جادىگەرلەرمەن تولىقتى.
اقتوبە وبلىسى
