جاڭا زەلانديانىڭ پرەمەر-ءمينيسترى دجاسيندا اردەرن باسقاراتىن لەيبوريستىك پارتياسى 2020 جىلى 49,1 پايىز داۋىس جيناپ, پارلامەنتتە 64 ماندات يەلەنگەن ەدى. جەڭىلىس تاپقان ەكىنشى پارتيا – ۇلتتىق پارتيانىڭ (NAT) جەتەكشىسى دجۋديت كوللينز اردەرندى قۇتتىقتاپ, ونىڭ پارتياسى ەلەۋلى وزگەرىستەر اكەلەدى دەگەن سەنىمىن جەتكىزىپ, ء«ۇش جىل تەز وتە شىعادى. ءۇش جىلدان كەيىن تاعى دا سايلاۋ. ءبىز ءالى ورالامىز», دەگەن بولاتىن. مەجەلى مەرزىم جاقىنداپ كەلەدى. ساراپشىلار دجاسيندا اردەرننىڭ قايتا سايلانۋ مۇمكىندىگى الدەقايدا تومەن ەكەنىن ايتادى. ويتكەنى كەيىنگى ساۋالدامالار جاڭا زەلانديانىڭ وڭشىل كواليتسياسى جەتكىلىكتى قولداۋعا يە ەكەنىن كورسەتىپ وتىر. ورتالىق-وڭشىل ۇلتتىق پارتياسىن حالىقتىڭ 37 پايىزى قولدايدى. ال اردەرن باسقاراتىن لەيبوريستەر پارتياسى حالىقتىڭ 33 پايىزىنىڭ قولداۋىنا يە.
وسى ورايدا لەيبوريستەر پارتياسى 9 پايىزدىق ۇلەسى بار جاسىلداردىڭ ءداستۇرلى سەرىكتەستەرىمەن وداقتاسسا دا, ۇكىمەت قۇرۋعا قاجەت 50 پايىزدىق مەجەگە جەتپەيدى. Kantar poll ساۋالداماسىنىڭ بۇل ناتيجەلەرى لەيبوريستەردىڭ بەدەلى ايتارلىقتاي قۇلدىراعانىن كورسەتەدى.
كەلەسى سايلاۋعا ءالى ءبىر جىلدان استام ۋاقىت بار. ساراپشىلار بۇل اردەرن ۇكىمەتىنە بەدەلىن قايتا قالپىنا كەلتىرۋگە مۇمكىندىك بەرەدى دەپ ەسەپتەيدى. بىراق اي سايىنعى ساۋالداما كورسەتكىشى كوڭىل كونشىتپەي تۇر. قازىرگى بيلىككە دەگەن ەلدىڭ سەنىمى كۇن وتكەن سايىن تومەندەپ بارادى. ويتكەنى ەلدە ءومىر ءسۇرۋ قۇنى شارىقتاپ, جاڭازەلانديالىقتاردىڭ كوڭىل كۇيى ءماز ەمەس.
اردەرن TVNZ تەلەارناسىنا بەرگەن سۇحباتىندا قازىر ەكونوميكالىق تۇراقسىزدىق تەك جاڭا زەلانديادا ەمەس, وزگە شەتەلدەردە دە ورىن الىپ جاتقانىن العا تارتادى. «ەكونوميكالىق قيىندىقتارعا قاراماستان جاڭا زەلانديانىڭ ارتىقشىلىعى بار. ماسەلەن, جۇمىسسىزدىق دەڭگەيىنىڭ, قارىزدىڭ تومەندىگىن ايتا الامىن. تۋريزم قايتا جاندانىپ كەلەدى. بۇل كورسەتكىشتەر بولاشاققا سەرپىن بەرەدى. مەن ەلىمىزدىڭ دامۋىنا وپتيميزممەن قارايمىن», دەدى ول.
The Guardian باسىلىمىنىڭ حابارلاۋىنشا, قازىرگى ۇكىمەت بەدەلىنىڭ ءتۇسۋى ەكونوميكالىق سەبەپتەرگە بايلانىستى. Kantar poll ساۋالداماسى جاڭازەلانديالىقتار ەكونوميكاعا جالپى پەسسيميستىك كوزقاراسپەن قارايتىنىن كورسەتتى. وعان قاتىسقانداردىڭ 49 پايىزى الداعى 12 ايدا ەكونوميكالىق جاعداي ناشارلايدى دەگەن ويدا, ال 26 پايىزى جاعداي جاقسارادى دەپ ەسەپتەسە, 25 پايىزى وزگەرىسسىز قالادى دەپ سانايدى.
جاڭا زەلانديادا قازىر ينفلياتسيا دەڭگەيى 7,3 پايىزدى قۇرايدى. بۇل سوڭعى 32 جىلداعى ەڭ جوعارى كورسەتكىش دەپ سانايدى قارجىگەرلەر. ەلدە سوڭعى جىلدارى ءۇي باعاسىنىڭ قۇنى تومەندەپ, كەيبىر ءۇي يەلەرىنە زيانىن تيگىزگەن. بىراق يپوتەكا بويىنشا پايىزدىق مولشەرلەمەلەردىڭ ءوسۋى جانە قۇرىلىس ماتەريالدارىنىڭ قىمباتتىعى تۇرعىنداردىڭ كوڭىلىنەن شىقپاي وتىر. پاتەر جالداۋ اقىسى دا وسكەن. حالىقتىڭ جۇمىسسىزدىق دەڭگەيى تومەن بولسا دا, تۇرعىنداردىڭ باسىم كوپشىلىگى باعانىڭ شارىقتاپ بارا جاتقانىن ايتادى. سونىمەن قاتار ساراپشىلار جاڭا زەلانديانىڭ سالىق رەفورماسى دا باياۋ جۇزەگە اسىپ جاتقانىنا الاڭداۋلى.
دجاسيندا اردەرن – كەيىنگى 150 جىلدا جاڭا زەلانديانى باسقارعان ەڭ جاس كوشباسشى. ول وتىز جەتى جاسىندا پرەمەر-مينيستر قىزمەتىن اتقارىپ, الەمدەگى ەڭ جاس كوشباسشىعا اينالدى. دجاسيندا حانىم ءوزىنىڭ باسىم باعىتى رەتىندە كەدەيشىلىك پەن الەۋمەتتىك ادىلەتسىزدىككە قارسى كۇرەستى. اسىرەسە ايەلدەردىڭ قۇقىقتارىن قورعاۋدى ماقسات ەتتى. اردەرن جاقتاستارى ونى جاڭازەلانديالىقتار ءۇشىن ساياساتتاعى ادامگەرشىلىكتى بەينەلەيتىن تۇلعا, بيلىكتەگى شىنايى جانە قامقور فەمينيستىڭ ۇلگىسى رەتىندە كورەتىنىن ايتادى.
اردەرننىڭ العاشقى پرەمەر-مينيسترلىك قىزمەتى قيىن سىناقتارمەن باستالدى. بيلىككە كەلگەن جىلى كرايستچەرچ قالاسىندا ەكى لاڭكەستىك ارەكەت جاسالدى. الدىمەن لاڭكەستەر ريككارتون ماڭىنداعى مەشىتكە كەلۋشىلەرگە وق اتىپ, سودان كەيىن لينۆۋد يسلام ورتالىعىندا لاڭكەستەردىڭ قولىنان 49 ادام قازا تاۋىپ, تاعى 51 ادام جاراقات الدى. سول كەزدە اردەرن كرايستچەرچكە ۇشىپ كەلىپ, مۇسىلمانداردىڭ الدىنا شىعىپ جاڭا زەلانديادا بۇكىل ءدىن مەن كەز كەلگەن ۇلت وكىلىنە ورىن بار ەكەنىن ايتىپ, ءسوز سويلەدى, قولداۋ ءبىلدىردى. اردەرن ءۇشىن تاعى ءبىر سىناق ۋايت-ايلەند تۋريستىك ارالىندا جانارتاۋدىڭ اتقىلاۋى بولدى. جيىرما ادام قازا تاۋىپ, امان قالعانداردىڭ بارلىعى شۇعىل ەۆاكۋاتسيالاندى. دجاسيندا اردەرن اۋرۋحانادا زارداپ شەككەندەرمەن جانە دارىگەرلەرمەن كەزدەسىپ, ولاردىڭ وتباسىلارىمەن سويلەستى, امان قالعاندارعا قولداۋ ءبىلدىردى. ساراپشىلاردىڭ ايتۋىنشا, ساياساتكەردىڭ وسىنداي يگى ىستەرىن حالىق ءالى دە ۇمىتا قويعان جوق.
