NOMADS ارقىلى ۇلتىمىزدىڭ تاريحى مەن تانىمىن زەردەلەۋگە بولادى

استانا. 6 مامىر. ورتالىق كوممۋنيكاتسيالار قىزمەتىندە وتاندىق NOMADS ونلاين-ويىنىنىڭ تۇساۋكەسەرى بولدى. بۇل تۋرالى gazeta.kz حابارلادى. NOMADS-تا حالقىمىزدىڭ تاريحى مەن تانىم-تۇسىنىگى, ادەت-عۇرپى ءساتتى قامتىلعان. بۇل العاشقى وتاندىق براۋزەرلىك ويىننىڭ تۇساۋكەسەرىندە KazBussinesMedia قوعامدىق قورى كەڭەسىنىڭ توراعاسى اسقار وماروۆ: «بۇگىندە عالامتوردا ونلاين-ويىندار وتە كوپ, الايدا, ۇلتتىق ءونىم جوق.  سوندىقتان دا, وتكەن جىلى اسەت وسپانوۆ دەگەن باۋىرىمىزدىڭ ويىنا قازاق تىلىندەگى براۋزەرلىك ويىندى قۇراستىرۋ يدەياسى كەلەدى.  سودان, ءبىزدىڭ KazBussinesMedia قورى بۇل باستامانى قولداپ, ويىندى قۇراستىرۋعا كىرىستىك. ول تولىعىمەن ەجەلگى تۇركىلەر مەن قازاقتاردىڭ تاريحىنا نەگىزدەلگەن. ونى قازاقستاندىق ماماندار جاسادى. شەتەلدىكتەر تارتىلعان جوق», – دەدى. تۇساۋكەسەر راسىمىندە بەلگىلى بولعانداي, 2 اي بۇرىن الەۋمەتتىك جەلىلەرگە ىلكى نۇسقاسى شىعارىلعان بۇل ويىن قازاق جانە ورىس تىلدەرىندە دايىندالعان. ال ونىڭ وزبەك جانە قىرعىز تىلدەرىندەگى نۇسقالارىن جاساپ, ورتالىق ازيانىڭ ينتەرنەت كەڭىستىگىنە شىعۋ جوسپاردا قاراستىرىلىپتى.  سونداي-اق, بۇعان باشقۇرتتار دا قىزىعۋشىلىق تانىتۋدا. ولار ويىندى ءوز تىلدەرىنە اۋدارۋعا نيەت بىلدىرۋدە. جيىندا اسەت وسپانوۆ ويىندى قالاي باستاۋ كەرەكتىگىن ۇيرەتتى. مۇندا قازاقتىڭ قارۋ-جاراقتارى ءدال قالپىندا, كومپيۋتەرلىك نۇسقادا جاسالعان. ويىندى ازىرلەۋشىلەر ونى ءالى دە جەتىلدىرە تۇسەمىز دەپ وتىر. جولدىباي بازار. دەرەككوز: gazeta.kz. فوتو: vk.com.