شىعىس قازاقستان وبلىسى سانيتاريالىق-ەپيدەميولوگيالىق باقىلاۋ دەپارتامەنتىنىڭ ءباسپاسوز قىزمەتىنىڭ مالىمەتى بويىنشا ءساۋىر ايىنان بەرى ەندەميالىق اۋماقتاردا 3 346 ادامدى كەنە شاقتى. ونىڭ ىشىندە 14 جاسقا دەيىنگى بالالاردىڭ سانى – 997. بۇل كەنەدەن زارداپ شەككەندەر ۇلەسىنىڭ 30 پايىزىنا جۋىقتايدى.
«كەنە ەنتسەفاليتىنە شالدىققان 8 ادام تىركەلگەن. بۇل ناۋقاستاردىڭ ەشقايسىسى كەنە شاققاننان كەيىن مەديتسينالىق كومەككە جۇگىنبەگەن. دارىگەرلەرگە ۋاقتىلى, ياعني ءۇش كۇننەن كەشىكتىرمەي قارالعان ادامداردىڭ اراسىندا كەنە ينفەكتسياسىن جۇقتىرعاندار بولعان جوق. كەنە ەنتسەفاليتىن ەمدەۋ تەك ستاتسيونارلىق جاعدايدا جۇرگىزىلەدى. ينفەكتسيا جۇقتىرعان ءوڭىردىڭ 7 تۇرعىنى جۇقپالى اۋرۋلار اۋرۋحانالارى مەن بولىمشەلەرىنە جاتقىزىلعان. پاتسيەنتتەرگە ارنايى ەم-دوم تاعايىندالدى», دەلىنگەن اتالعان دەپارتامەنت بەرگەن اقپاراتتا.
بۇل رەتتە ماماندار قاۋىپتى جاندىكتىڭ بەلسەندى بولاتىن ماۋسىمى بالالاردىڭ جازعى دەمالىس ۋاقىتىنا سايكەس كەلەتىنىن, سوندىقتان كىشكەنتايلاردىڭ قاۋىپسىزدىگىنە بارىنشا ساق قاراۋ كەرەك ەكەنىن ەسكەرتەردى. تابيعاتتا, ساياباقتا, جازعى ساياجايدا سەرۋەندەۋ كەزىندە بالانى كەنە شاعۋدان قورعاۋ ءۇشىن شاشى مەن اياق-قولىن اشىق قالدىرماي, مەيلىنشە جابىق كيىندىرۋ ۇسىنىلادى. ياعني بالانىڭ باسىنا شارف بايلاۋ نەمەسە باسكيىم كيگىزگەن, سونداي-اق فۋتبولكا ەمەس ۇزىن جەيدە, شورتىنىڭ ورنىنا ۇزىن شالبار, اشىق ساندالداردى جابىق اياقكيىممەن اۋىستىرعان ءجون. بۇعان قوسا كيىمنىڭ اشىق ءتۇستى بولۋىنا ءمان بەرۋ كەرەك, سوندا كەنە كوزگە جاقسى كورىنەدى.
قاۋىپ اياق استىنان, ەگەر كەنە شاعىپ السا, ونى الىپ تاستاماي, دەرەۋ جاقىن ماڭداعى جاراقات ورتالىعىنا نەمەسە ەمحاناعا حابارلاسۋ كەرەك. ياعني بىردەن مەديتسينالىق كومەككە جۇگىنگەن ابزال.
