«بوكو حارام» ۇرلاپ اكەتكەن قىزداردى ساتپاقشى

استانا. 6 مامىر. نيگەرياداعى «بوكو حارام» ەكسترەميستىك توبى وسىدان ءۇش اپتا بۇرىن ەلدىڭ سولتۇستىگىندەگى مەكتەپتەردىڭ بىرىنەن ۇرلاپ اكەتكەن وقۋشى قىزداردى ساتپاقشى بولىپ وتىر. بۇل تۋرالى Rbc.ru حابارلادى. ەستەرىڭىزگە سالا كەتەيىك, 14 ساۋىردە «بوكو حارام» سودىرلارى نيگەريانىڭ سولتۇستىگىندەگى بورنو شتاتى چيبوك ەلدى مەكەنىندەگى مەكتەپتەردىڭ بىرىنە شابۋىل جاساپ, 230 وقۋشى قىزدى ۇرلاپ اكەتكەن بولاتىن. ەكسترەميستىك توپ باسشىسى ابۋباكار شەكاۋ ۇرلانعان قىزداردى ساتپاق نيەتتە ەكەنىن ايتىپ, بەينەحابارلاما تاراتتى. اتالمىش توپ بيىلعى جىلدىڭ باسىنان بەرى جۇزدەگەن ادامنىڭ ولىمىنە سەبەپشى بولعان ەكەن. ماسەلەن, ۇستىمىزدەگى جىلدىڭ 20 اقپانىندا «بوكو حارام» سودىرلارى نيگەريانىڭ سولتۇستىك-شىعىسىنداعى باما قالاسىنا شابۋىل جاساپ, 60 ادامدى مەرت ەتكەن. ال 25 اقپاندا ولار مەكتەپكە كىرىپ, 29 وقۋشىنى اتىپ ولتىرگەن. سونداي-اق ناۋرىزدىڭ باسىندا اتالمىش توپ مۇشەلەرى مايدۋگۋري قالاسىندا تەراكت ۇيىمداستىرىپ, 50 ادامدى ولتىرگەن. ال ءساۋىردىڭ باسىندا ولار نيگەريانىڭ سولتۇستىك-باتىسىندا قاۋىم جەتەكشىلەرى مەن ءوزىن-ءوزى قورعاۋ جاساعى مۇشەلەرىنە شابۋىل جاساپ, 80 ادامدى قىرىپ سالدى. ايدار ورىسباەۆ. دەرەككوز: Rbc.ru. فوتو: Interfax.ru.