استانادا ۇلتتىق عىلىمي كارديوحيرۋرگيالىق ورتالىق فلەشموب وتكىزدى

استانا. 6 مامىر. ەلورداداعى ۇلتتىق عىلىمي كارديوحيرۋرگيالىق ورتالىق قىزمەتكەرلەرى جۇرتشىلىقتى تازالىققا ۇندەيتىن فلەشموب ۇيىمداستىردى. بۇل تۋرالى egemen.kz ءتىلشىسى حابارلادى. ەلىمىزدە حالىقتى تازالىققا شاقىرعان فلەشموب العاش رەت وتكىزىلىپ وتىر. ال وسى ىسپەتتەس, ياعني, دۇنيەجۇزىلىك دەنساۋلىق ۇيىمى تاراپىنان قولعا الىنىپ جۇرگەن Clean your hands اكتسياسى (قولىڭدى جۋ) جىل سايىن وتەتىن, حالىقتىڭ نازارىن اۋدارىپ جۇرگەن ءىس-شارالاردىڭ بىرىنە اينالعان. بيىل ەلىمىزدەگى «ۇلتتىق عىلىمي كارديوحيرۋرگيالىق ورتالىق» اكتسيونەرلىك قوعامى  وسى اكتسيانى فلەشموب تۇرىندە ناسيحاتتاپ, دۇنيەجۇزىلىك دەنساۋلىق ۇيىمىنىڭ اتالعان ءىس-شاراسىن قولدايتىنىن ءبىلدىرىپ وتىر. بۇلاردىڭ مۇنى ۇيىمداستىرۋداعى ماقساتى – قول گيگيەناسىن ساقتاي وتىرىپ, ادامداردىڭ ءومىرىن ۇزارتۋعا از دا بولسا سەپتىگىن تيگىزۋ. ايتا كەتەيىك, بۇگىندە الەمدەگى 16 مىڭداي مەديتسينالىق مەكەمەدە 9 ملن.-نان استام دەنساۋلىق ساقتاۋ قىزمەتكەرى ەڭبەك ەتەدى ەكەن. ولار بۇكىل ادامزاتتى قول گيگيەناسىن ساقتاۋعا شاقىرادى. ايگۇل سەيىل. دەرەككوز: egemen.kz. فوتو: egemen.kz.