استانا. 6 مامىر. ورتالىق كوممۋنيكاتسيالار قىزمەتىندە ۇيىمداستىرىلعان بريفينگتە ۇلتتىق عارىش اگەنتتىگىنىڭ توراعاسى تالعات مۇساباەۆ KazSat-3-ءتىڭ الداعى قىركۇيەكتەن باستاپ ىسكە كىرىسەتىنىن جەتكىزدى. بۇل تۋرالى egemen.kz ءتىلشىسى حابارلادى.
تالعات مۇساباەۆتىڭ ايتۋىنشا, شامامەن بيىلعى مامىر ايىنىڭ ورتاسىندا اتالعان جەر سەرىگى وربيتاداعى ءتيىستى نۇكتەسىنە جەتۋى ءتيىس. سودان سوڭ ۇشۋ-كونسترۋكتورلىق, تىركەۋ سىناقتارى جۇرگىزىلىپ, الداعى قىركۇيەكتە ونى ەكسپلۋاتاتسياعا قابىلدايدى.
ۇلتتىق عارىش اگەنتتىگىنىڭ توراعاسى عارىش سالاسىندا اتقارىلعان جۇمىستار ناتيجەسىندە ەلىمىز بايلانىس جانە اقپارات تاراتۋ سەكىلدى ستراتەگيالىق ماڭىزدى باعىتتا وزگەگە تاۋەلسىز بولعانىن اتاپ ءوتتى.
ەستەرىڭىزدە بولار, 28 ساۋىردە «بايقوڭىر» عارىش ايلاعىنان KazSat-3 ءۇشىنشى ۇلتتىق گەوستاتسيونارلىق حابار تاراتۋ جانە بايلانىس جەر سەرىگى ءساتتى ۇشىرىلعان. KazSat-3-تە قازاقستان اۋماعىن بايلانىس قىزمەتىمەن قامتاماسىز ەتە الاتىن Ku-دياپازوندى 28 ترانسپوندەر ورناتىلعان. عارىش اپپاراتىنىڭ جۇمىس ىستەۋ مەرزىمى 15 جىلداي.
سونداي-اق, بريفينگتە تالعات مۇساباەۆ 2017 جىلى ەلىمىزدىڭ تاعى ءبىر ازاماتى عارىشقا ۇشۋى مۇمكiن دەپ مالiمدەدi. ول وسىعان بايلانىستى: «بiز وتە كۇردەلi جانە ناقتى شارالاردى قولعا الىپ وتىرمىز. كەلiسسوزدەر جۇرگiزiلۋدە جانە وڭ شەشىلىپ جاتىر... بiز 2017 جىلى وسىنداي يگى ءىستىڭ جۇزەگە اسۋى مۇمكiن دەپ الدىن الا ايتا الامىز», – دەدى.
بۇدان بولەك, تالعات مۇساباەۆ مەملەكەت باسشىسىنىڭ «قازاقستان جولى – 2050: ءبىر ماقسات, ءبىر مۇددە, ءبىر بولاشاق» اتتى جولداۋىندا كورسەتىلگەن مىندەتتەردى ورىنداۋ شەڭبەرىندە اگەنتتىكتىڭ جۇرگىزىپ وتىرعان جۇمىسى تۋرالى ايتتى. ناقتىلاي ايتقاندا, ول ۆەدومستۆو قىزمەتىنىڭ ەكى ستراتەگيالىق باعىتى جونىندە ءسوز ەتتى: ءبىرىنشىسى – «عارىش ينفراقۇرىلىمىن قالىپتاستىرۋ جانە دامىتۋ», ەكىنشىسى – «عىلىم جانە عىلىمي-تەحنولوگيالىق بازانى دامىتۋ».
جولدىباي بازار.
دەرەككوز: egemen.kz.
فوتو: Lenta.kz.
