ماسەلەن, ا-1 «نۇر-سۇلتان-ششۋچينسك» تاس جولىنىڭ بويىندا كەزەكتى رەت جول بويىندا ورنالاسقان قىزمەت كورسەتۋ نىسانى اشىلدى. وندا قازاق كيىز ءۇيى جانە ونىڭ جانىندا سالىنعان سانيتارلىق-گيگيەنالىق توراپ بار.
رەسپۋبليكالىق ماڭىزى بار تاس جولدىڭ بويىندا ۇلتتىق كيىز ءۇيدى ورناتۋ يدەياسى ۇلتتىق كومپانياعا كومەك كورسەتۋ جانە دەمالىس الاڭىن ءبولۋ وتىنىشىمەن جۇگىنگەن شاعىن جانە ورتا بيزنەس وكىلىنە تيەسىلى. ايتا كەتەيىك, اتالعان كۇرە جولدا كيىز ءۇي العاش رەت ورناتىلىپ وتىر. الداعى ۋاقىتتا كيىز ۇيلەر سانىن ارتتىرۋ جوسپاردا بار.
«مەنىڭ نەگىزگى ماقساتىم — مادەنيەتىمىزدى, ۇلتتىق تاعامدارىمىزدى, سالت-ءداستۇرىمىزدى ەلگە كەلگەن تۋريستەرگە كەڭىنەن پاش ەتۋ. ءبىز قۇندىلىقتارمىزدى ارقاشان دارىپتەۋىمىز قاجەت. قازىر ەلىمىزگە شەت ەلدەردەن كەلىپ جاتقان جولاۋشىلار سانى ەداۋىر ارتتى. وسى كيىز ۇيدە ۇلتتىق تاعامدار – قۇرت, شۇبات, قىمىز, ايران, كوجە ساتۋدى جوسپارلاپ وتىرمىز. كيىز ءۇيدىڭ ءىشى تولىقتاي جىلىتىلادى. سول سەبەپتى قىس ۋاقىتىندا دا جۇمىس ىستەيمىز», دەدى شوب وكىلى داۋلەن ايتباي.
ال اۆتوكولىك جۇرگىزۋشىلەرىنىڭ ىڭعايلىلىعى ءۇشىن كيىز ءۇيدىڭ جانىندا جاڭا سانيتارلىق-گيگيەنالىق توراپ ورناتىلدى.
«جىلى ءارى اباتتاندىرىلعان سانيتارلىق-گيگيەنالىق توراپ جىل بويى جۇمىس ىستەپ تۇرادى. اۆتوموبيل جولدارىن پايدالانۋشىلار ونى تەگىن پايدالانا الادى. سانيتارلىق-گيگيەنالىق توراپ ەرلەرگە, ايەلدەرگە جانە ەرەكشە قاجەتتىلىگى بار تۇرعىندارىمىزعا ارنالعان بىرنەشە كابينالاردان تۇرادى», دەپ اتاپ ءوتتى «قازاۆتوجول» ۇلتتىق كومپانياسىنىڭ جول بويىنداعى سەرۆيستى دامىتۋ ءبولىمىنىڭ باسشىسى دياس ارىنوۆ.
ەستەرىڭىزگە سالا كەتەيىك, بيىل جول بويىندا ورنالاسقان قىزمەت كورسەتۋ نىساندارىنىڭ سانى 80-گە ارتپاق, بۇل 500 جاڭا جۇمىس ورنىن اشۋعا مۇمكىندىك بەرەدى. جالپى بۇگىنگى كۇنى رەسپۋبليكالىق ماڭىزى بار تراسسالاردىڭ بويىندا 1600-گە جۋىق جول بويىنداعى قىزمەت كورسەتۋ نىساندارى جۇمىس ىستەپ تۇر.
