ەفرەيتور تىلەك قۇماربەكوۆ ىشكى ىستەر ءمينيسترىنىڭ ورىنباسارى, ۇلتتىق ۇلان باس قولباسشىسى اتىنان «ۇلتتىق ۇلان قىزمەتىنىڭ ۇزدىگى» توسبەلگىسىمەن جانە «شىعىس» وڭىرلىك قولباسشىلىعى قولباسشىسىنىڭ قۇقىعىمەن «قوعامدىق ءتارتىپتى ساقتاعانى ءۇشىن» توسبەلگىسىمەن ماراپاتتالدى.
اعىسى قاتتى ادۋىندى وزەنگە قويىپ كەتە سالۋ وڭاي ەمەس. قول سوزىم جەردە بولسا ءبىر ءسارى, ءجۇزىپ بارىپ, بالانى جاعاعا شىعارۋعا دا جۇرەك كەرەك. مۇندايدا ەكىنىڭ ءبىرى ءوز ءومىرىن قاتەرگە تىگە بەرمەيدى.
وقيعا قالاي بولعان دەيسىز عوي. باياندايىق. شىلىڭگىر شىلدەنىڭ اياق تۇسى. ۇلبىگە شومىلىپ ءجۇرىپ, باتىپ بارا جاتقان بالانى كورىپ قالعان 3477 اسكەري ءبولىمىنىڭ ەفرەيتورى تىلەك قۇماربەكوۆ دەرەۋ كومەككە اسىعادى. بالانىڭ قولىنان ۇستاپ, اۋپىرىمدەپ جاعاعا شىعارىپ ۇلگەرگەنى سول ەدى, كەنەت ءوزى سۋ جۇتىپ, تۇنشىعا باستايدى. بالانى قۇتقارىپ ۇلگەرگەنىمەن ءوزى وزەنگە باتىپ بارا جاتقانىن كورگەن جاعاداعىلار كومەككە كەلىپ, تىلەكتىڭ ءوزىن وزەننەن شىعارىپ الادى. سۋ جۇتقان ول ەسىنەن تانىپ قالادى. جاعاجايداعىلار جەدەل جاردەم شاقىرىپ, مەديتسينالىق كومەككە جۇگىنەدى. ءسويتىپ, ەكەۋى دە امان قالادى.
مىنە, ت.قۇماربەكوۆتى قالاي عانا بەيبىت كۇننىڭ باتىرى دەمەيمىز؟! وسىعان وراي وسكەمەندەگى 3477 اسكەري بولىمىندە باتىردىڭ قايسارلىعىن جەكە قۇرام الدىندا ۇلىقتاپ, سالتاناتتى ءىس-شارا ءوتتى. جيىنعا ءبولىم باسشىلىعىمەن قاتار تىلەكتىڭ اتا-اناسى دا قاتىستى.
– قادىرمەندى وفيتسەر مىرزالار, اسكەري ءبولىمنىڭ باسشىلىعى! بالامنىڭ باتىل ارەكەتىن باتىرلىققا بالاپ, جوعارى باعا بەرىپ, قۇرمەتتەپ جاتقاندارىڭىزعا ۇلكەن العىس ايتقىم كەلەدى, – دەدى باتىر جىگىتتىڭ اكەسى امانتاي قۇماربەك ۇلى.
ايتا كەتسەك, ماۋسىمدا تاعى وسى 3477 اسكەري ءبولىمىنىڭ جاۋىنگەرى, سەرجانت ريزابەك قاناپيانوۆ كورشى ءۇيدى ءورت شارپىعانىن بايقاپ, ءۇي ىشىنەن قاريانى امان-ەسەن الىپ شىققان ەدى. ريزابەكتىڭ ەرلىگى دە ەلەۋسىز قالعان جوق.
شىعىس قازاقستان وبلىسى
