قوستانايلىقتار جاھاندىق ۇنقاتىسۋدىڭ جاڭا ۇلگىسىن قولدادى

وركەنيەت دامىعان سايىن جەر بەتىندەگى مەملەكەتتەردىڭ پروبلەمالارى جالپىادامزاتتىق سيپات الىپ, ورتاق بولىپ وتىر. قازىر ەكونوميكالىق, قارجىلىق, ەكولوگيالىق, دۇنيەتانىمدىق داعدارىستاردىڭ قيىندىعىن بارلىق ەلدەر قاتار سەزىنەدى جانە ولاردى ءار ەل جەكە شەشە المايدى. جاھاندىق سيپات العان پروبلەمالارعا جاھاندىق ۇنقاتىسۋلار, پىكىر الماسۋلار, ويعا وي, اقىلعا اقىل قوسۋلار بولماسا, ونىڭ شيەلەنىسۋى دە ۇدەي بەرمەك. وسىدان ەكى جىل بۇرىن ەلباسى نۇرسۇلتان نازارباەۆ «G-Global» مەگاجوباسىن ۇسىنعان بولاتىن. جاقىندا قوستانايداعى ا.بايتۇرسىنوۆ اتىنداعى ۋنيۆەرسيتەتتە وبلىس اكىمى نۇرالى سادۋاقاسوۆتىڭ باسقارۋىمەن وتكەن جيىندا ساياساتكەرلەر, عالىمدار, مەملەكەتتىك ورگاندار مەن ۇكىمەتتىك ەمەس ۇيىمدار جەتەكشىلەرى, ستۋدەنت جاستار مەن جۇرتشىلىق وكىلدەرى «G-Global» مەگاجوباسى تۋرالى وي ءوربىتتى. قازاقستان حالقى اسسام­بلەياسىنىڭ باستاماسىمەن وتكەن جيىندا سەناتور, قازاقستان حالقى اسسامبلەياسى توراعاسىنىڭ ورىنباسارى اناتولي باشماكوۆ قاتىسىپ, ءسوز سويلەدى. ەلباسى نۇرسۇلتان نازارباەۆتىڭ ۇسىنعان جاھاندىق «G-Global» جوباسىن تارقاتا ايتقان ول قازىر جۇدىرىقتاي جەردى قورعاپ قالۋ بۇكىل ادامزاتتىڭ پارىزى ەكەنىنە توقتالدى. قازىر قالىپتاسىپ وتىرعان ەكونوميكالىق, ەكو­لوگيالىق جانە تەرروريزم, سوعىس, ۇلتارالىق قاقتىعىستار, قارجىلىق داعدارىستاردى بۇرىنعىداي جەتى نەمەسە جيىرما دامىعان ەلدىڭ بىرىگىپ شەشەتىن كەزىنەن ءوتىپ كەتتىك. ونى نازارباەۆ ۇسىنعان بۇكىل الەم, ياعني «G-Global» فورماتىندا ويلاسۋ كەرەكتىگىن ايتتى اناتولي افاناسەۆيچ. سەناتوردىڭ ايتۋىنشا, ەكونوميكالىق, ەكولوگيالىق داعدارىستاردىڭ الدىن الۋ ءۇشىن مادەني-دۇنيەتانىمدىق ماسەلەلەردى جاھاندىق دەڭگەيدە قولعا الاتىن كەز جەتتى. وعان ەتنوستىق, ۇلتتىق توزبەۋشىلىك, قاقتىعىستار دا قوسىلىپ وتىر. وركەنيەت كوشى ادامعا ءتان ادامگەرشىلىكتى تاپتاماۋى ءتيىس. نۇرسۇلتان نازارباەۆ ۇسىنعان «G-Global» كوممۋ­ني­كاتيۆتىك الاڭىنا قازىر الەمنىڭ 190-نان استام ەلى شىقتى. بۇكىل ادامزات جەردى شىرماعان داعدارىستاردان شىعۋدىڭ جولىن وسىلايشا ءبىزدىڭ ەلباسىمىز ۇسىنعان جاڭا فورماتتا  ويلاسادى. جيىندا سەناتور حۋساين ۆاليەۆ, عالىمدار ەركىن ءابىل, ولگا ميشۋلينا, تاعى باسقالار مازمۇندى پىكىرلەرىن قوستى. جيىن سوڭىندا قوستاناي وبلى­سىنىڭ جۇرتشىلىعى «G-Global» باستاماسىن قولداۋ, ونىڭ جۇزەگە اسۋىنا قوسىلۋ تۋرالى قارار قابىلدادى. ءنازيرا جارىمبەتوۆا, «ەگەمەن قازاقستان». قوستاناي.