شىڭعىرلاۋ – تاريحى تەرەڭ ولكە. رەسەي فەدەراتسياسىنىڭ ورىنبور وبلىسىمەن – ەجەلگى ەلەك جانە تۇزتوبە وڭىرىمەن شەكتەسىپ جاتىر. بۇل ايماقتا تالاي-تالاي تاريحي وقيعالار وتكەن. اشىلعانىنا كوپ ۋاقىت وتپەگەن شىڭعىرلاۋ اۋداندىق تاريحي-ولكەتانۋ مۋزەيى وسىناۋ اسىل مۇرانىڭ بىردەن-ءبىر جوقشىسىنا اينالدى.
مۋزەي باسشىسى تىلەگەن قاليەۆ وسى كەزگە دەيىن «ۇستاعاننىڭ قولىندا, تىستەگەننىڭ اۋزىندا» كەتكەن قۇندى جادىگەرلەردى جيناستىرىپ, ارحەولوگيالىق قازبا جۇمىستارىن ۇيىمداستىرىپ, ولكەتانۋشىلار فورۋمىن وتكىزىپ, تىنىم تاپپايدى. «جادىگەر-جاۋھارلار» اتتى جاڭا جوبانىڭ دا ماقساتى – ءوڭىردىڭ وزگەشە تاريحىن ەڭ الدىمەن ءوز تۇرعىندارىنا تانىستىرۋ.
– ءبىز وسى جوبا ارقىلى اۋىل ارالاپ, مۋزەي قورىنداعى ەرەكشە جادىگەرلەردى حالىققا تانىستىرامىز. تۋعان جەردىڭ تەرەڭ تاريحىنا بويلاتىپ, سول ارقىلى وتانشىلدىقتى كۇشەيتەمىز. ەلدىڭ شەتىن, شەكارا شەبىن جايلاعان اعايىن ءۇشىن بۇل وتە قاجەت شارا. سونىمەن بىرگە وسى جوبا ارقىلى حالىقتى مۋزەي ىسىمەن تانىستىرىپ, جەكە ادامداردىڭ قولىنداعى قۇندى جادىگەرلەرمەن مۋزەي قورىن تولىقتىرساق دەيمىز, – دەيدى جوبا جەتەكشىسى تىلەگەن قاليەۆ.
شىڭعىرلاۋ اۋدانىندا 8 اۋىلدىق وكرۋگ بار. جوبانىڭ العاشقى كۇندەرىندە مۋزەي جادىگەرلەرى اششىساي, ارداق جانە اقبۇلاق اۋىلدىق وكرۋگتەرىندە بولدى. جاڭا جوباعا حالىقتىڭ ىقىلاسى وتە جاقسى. اششىساي اۋىلدىق وكرۋگى ورتالىعى امانگەلدى اۋىلىنداعى مادەنيەت ۇيىندە وتكەن كورمەگە نەمەرەلەرىن ەرتىپ ارنايى كەلگەن كوپبالالى انا ايجان اقاەۆا ەرەكشە اسەر العانىن ايتادى. ال اعايىندى اقتان مەن ءجۇسىپ لەسوۆتار كورمەگە قۇر قول كەلمەي, مۋزەيگە جاڭا جادىگەر سىيعا تارتتى. كونە مىلتىقتىڭ قانجار قوندىرعىسى ەندى مۋزەي تورىنەن ورىن الاتىن بولادى.
اششىساي اۋىلىنداعى مادەنيەت ۇيىندە دە كورمەنى تاماشالاۋشىلار از بولمادى. ءتىپتى شەكارا شەبىن كۇزەتىپ جۇرگەن ساربازدار دا ارنايى كەلىپ, تىلسىم سىرلى تاريحي بۇيىمداردى كورىپ, مۋزەي قىزمەتكەرلەرىنىڭ تاعىلىمدى اڭگىمەسىن تىڭداۋدا.
– جوبامىزعا قولداۋ ءبىلدىرىپ, جاقسى قابىلداپ, كورمەنى ۇيىمداستىرۋعا كومەكتەسكەن اۋىل اكىمدەرىنە العىس ايتامىز, – دەيدى ت.قاليەۆ.
باتىس قازاقستان وبلىسى
