ءالفيا جۇكەنوۆا بەلگىلى تەلەجۇرگىزۋشى, جۇرتشىلىقتى شاعىن كاسىپكە باۋلىپ جۇرگەن دينارا ءساتجاننىڭ كۋرسىنان ءتالىم الىپ, 2019 جىلدان باستاپ تىگىن ءىسىن يگەرۋگە كىرىسەدى.
العاشىندا ءبىر تىگىن ماشيناسىمەن ىسكە كىرىسكەن ونىڭ قازىر ءتۇرلى وپەراتسيا جاساي الاتىن 15 ءىس ماشيناسى بار. ءبارىن دە ءۇش جىلدىڭ ىشىندە ءوز اقشاسىنا ساتىپ العان. الدىمەن 30 شارشى مەتردە جالعىز «جاك» تىگىن ماشيناسىمەن ءبىر ءوزى تىگىنمەن اينالىسىپتى. قولى جۇرەتىنىنە كوزى جەتكەن سوڭ ءوندىرىسىن ۇلعايتىپ 80 شارشى مەترلىك عيماراتتى جالعا الادى. العاشىندا ءۇش ادام بىرىگىپ ىستەسە, قازىر ونىڭ قاراماعىندا 9 قىزمەتكەر بار. الدىمەن شاعىن بىلعارى سومكەلەر, ودان سپورتتىق كوستيۋمدەر, كويلەكتەر, ءتىپتى اۆتوموبيلدەرگە ارنالعان سومكەلەر دە تىگەدى. ءاميان سەكىلدى بىلعارى سومكەلەردى تىگۋ ءادىسىن ءا.جۇكەنوۆا سانكت-پەتەربۋرگتەگى كۋرستان ۇيرەنگەن. ءبىر وكىنىشتىسى سول, وسى ءونىمدى جالعاستىرۋ ءىسى قازىر توقتاپ قالعان, ويتكەنى رەسەيدەن بىلعارى الۋ قيىنداپ كەتىپتى.
ءالفيا 10 تامىزدا اقتاۋ قالاسىندا بولاتىن ءسان ديزاينەرلەرىنىڭ كورمەسىنە قاتىسقالى وتىر. وعان ۇلتتىق ورنەكتەر سالىنعان كوستيۋم, شاپان, كويلەك تىگىپ اپارماقشى.
ءالفيانىڭ ءوندىرىسىنىڭ ءبىر ارتىقشىلىعى رەتىندە ونىڭ الەۋمەتتىك بيزنەسپەن اينالىساتىنىن اتاۋعا بولادى. ونىڭ قاراماعىندا الەۋمەتتىك وسال توپتاردىڭ وكىلدەرى دە جۇمىس ىستەيدى. ەكى ايەل يراننان ورالعان جالعىزىلىكتى كوپبالالى ايەل, تاعى ءبىر قىز ەكىنشى توپتىڭ مۇگەدەگى, قولىنان ءىس كەلەتىن زەينەتكەر ايەلدەر دە مۇندا ناپاقاسىن ايىرىپ ءجۇر.
بيىل ءا.جۇكەنوۆا جالعا العان عيماراتىندا ءىس تىگۋ جانە ءپىشۋ بويىنشا ورتالىق اشامىن دەپ جاريالاعان. وعان 10-15 وقۋشى قابىلدانىپتى. اشىلۋ سالتاناتىنا وبلىس اكىمىنىڭ ورىنباسارى عاني ساقتاعانوۆ پەن بەلگىلى بيزنەسۆۋمەن, ءالفيانىڭ ۇستازى دينارا ءساتجان دا قاتىستى. قازىر مۇندا تىگىنشىلىك پەن ءپىشۋدىڭ قىر-سىرىن بىلگىسى كەلەتىن قولدارى بوس ادامدار تۇسكە دەيىن كەلىپ, اقىلى تۇردە ساباق الادى. ال جۇمىسقا ورنالاستىرۋ ورتالىعى ارقىلى تىگىنشىلىككە ۇيرەنگىسى كەلەتىن ادامداردى قابىلداي المايدى. «ويتكەنى ءبىزدىڭ اتالعان مەملەكەتتىك ورگانمەن ازىرگە كەلىسىم-شارتىمىز جوق. ەگەر ولار وزدەرى جىبەرەتىن ادامدار ءۇشىن اقى تولەيتىنى تۋرالى كەلىسىم جاساسا, ارينە, ءبىز ونداي ادامداردى دا تىگىنشىلىككە ۇيرەتەمىز», دەيدى كاسىپكەر.
قازىرگى جالعا العان ۇلكەن عيماراتتىڭ ءبىراز بولىگىنە ءالى جىلۋ تارتىلىپ ۇلگەرمەگەن, جاڭا قۇرىلىس. «ەگەر وسى جەرگە بيىل جىلۋ ەنگىزىلسە, ءوندىرىستى ۇلعايتىپ, 45 ادامعا دەيىن جۇمىس ورنىن اشا الامىز», دەپ وتىر ءالفيانىڭ ءوزى.
ارينە, ءبىز ونىڭ مەملەكەتتىك تاپسىرىس بويىنشا تەندەرلەرگە قاتىسۋ مۇمكىندىگىن سۇرادىق. بىراق بۇل جاڭادان باستاعان كاسىپكەرلەر ءۇشىن وڭاي ەمەس ەكەن. الدىمەن «اتامەكەن» كاسىپكەرلەر پالاتاسىنىڭ باتاسىن الىپ, سوسىن يندۋستريا جانە ينفراقۇرىلىمدىق دامۋ مينيسترلىگىنەن ارنايى «يندۋستريالدىق سەرتيفيكات» دەگەن قۇجات يەلەنۋ كەرەك ەكەن. تەك وسى قۇجاتىڭ بولسا عانا تەندەرگە قاتىسا الاسىڭ. «ونىڭ تالابىن تولىق ورىنداۋ وتە قيىن. سوندىقتان وندايدى مەن تۇگىل بىرنەشە جىلدان بەرى ۇلكەن كاسىپكەرلىكپەن اينالىسىپ جۇرگەندەر دە الا الماي ءجۇر. سول سەبەپتى ءبىز ونداي قۇجات الۋعا ازىرگە تالپىنعانىمىز جوق», دەيدى ءا.جۇكەنوۆا. كاسىپكەردىڭ ايتۋىنا قاراعاندا, قازىر «اتامەكەن» پالاتاسى جەڭىل ونەركاسىپ ونىمدەرىن شىعاراتىن ۇساق كاسىپكەرلەردىڭ باسىن بىرىكتىرىپ اسسوتسياتسيا قۇرماق كورىنەدى. مىنە, وسى اسسوتسياتسيا بولاشاقتا تەندەرلەرگە قاتىسىپ, قۇرامىنداعى كاسىپكەرلەرگە مەملەكەتتىك تاپسىرىستار الىپ بەرۋگە تىرىساتىن بولماق...
ءالفيانىڭ ايتۋىنا قاراعاندا, قازىر كاسىپكەر استانادان 50 سپورتتىق كوستيۋم تىگۋگە تاپسىرىس العان. ونىڭ ۇستىنە 20 كوستيۋمدى قوسىمشا تىكپەك جانە ولاردى تەز ارادا ازىرلەۋگە ءتيىس. تاپسىرىس بەرۋشىلەر بۇلاردى ينتەرنەتتەن, ءتۇرلى باق-تارداعى جارناما, حابارلاندىرۋلاردان وزدەرى ىزدەپ تابادى ەكەن.
ارينە, شاعىن بيزنەستى دوڭگەلەتىپ كەتۋ وڭاي ەمەس. ول ءۇشىن قاجىرلىلىق پەن بەلسەندىلىكتەن باسقا شەبەر كادرلار تابۋ دا كەرەك. تىگىنشىلىك ۇلكەن ونەر, نەشە جەردەن ماشينا جەتىلدىرىلگەن بولسا دا, قولدىڭ ەبى بولماسا ونى ءتيىمدى پايدالانۋ قيىن. ال ءپىشۋ جۇمىسى – تىگىنشىلىكتەگى بارلىق وپەراتسيانىڭ ىشىندەگى كۇردەلىسى. ءالفيا بۇل ىسكە ۇزاق جىلدار بويى پەتروپاۆلداعى بۇرىنعى «كومسومولكا» تىگىن فابريكاسىندا شەبەر تىگىنشى بولىپ ىستەپ, بىرنەشە وردەن-مەدال العان, ارتىنان بىرنەشە جىل مەكتەپتەرگە تىگىنشىلىك بويىنشا ساباق بەرگەن, زەينەت دەمالىسىنداعى رايحان سۇراعانوۆانى تارتىپتى. «اپايىمىزدىڭ ونەرى دە, ءىسى دە بىزگە ۇلكەن ۇلگى بولىپ وتىر. ءبىز ول كىسىنى قاتتى قۇرمەتتەيمىز», دەيدى ءا.جۇكەنوۆا.
قازىر سولتۇستىكتەگى شاعىن كاسىپكەرلەردىڭ 42 پايىزى – ايەلدەر, سونىڭ ءبىرى – وسى ءالفيا جۇكەنوۆا. «جەكە كاسىپكەر» دەپ قانا تىركەلگەن ونىڭ كاسىپورنىنىڭ دامي تۇسەتىنىنە سەنگىڭ كەلەدى, ويتكەنى ول ەشكىمگە سەنبەي, ەشكىمگە قول جايماي ءوز جولىن تاۋىپ, سەنىمدى قاداممەن العا ءجۇرىپ كەلەدى.
پەتروپاۆل
