سوڭعى 3 جىل ىشىندە ەلوردادا 34 مەكتەپ بوي تۇزەپ, پايدالانۋعا بەرىلدى. ەسىكتەرىن جاڭادان اشقان وقۋ ورىندارى 70 مىڭ وقۋشى ورنىن قۇرۋعا مۇمكىندىك بەردى.
قالادا تاعى 11 ءبىلىم بەرۋ مەكەمەلەرىنىڭ قۇرىلىسى جوسپارلانعان. وقۋ ورىندارىنىڭ قۇرىلىسى قالانىڭ بارلىق اۋدانىندا ءجۇرىپ جاتىر.
«سوڭعى 2 جىلدىڭ وزىندە حالىق تىعىز قونىستانعان ەسىل اۋدانىندا - 12 مەكتەپ, الماتى اۋدانىندا - 7, بايقوڭىر اۋدانىندا - 4, سارىارقا اۋدانىندا - 2 مەكتەپ سالىندى. بيىل قالادا تاعى 11 مەكتەپ سالىنادى. اتالعان وقۋ ورىندارى قوسىمشا 23 مىڭنان استام وقۋشى ورنىن اشۋعا ىقپال ەتەدى», دەلىنگەن نۇر-سۇلتان قالاسىنىڭ ءبىلىم باسقارماسى تاراتقان حابارلامادا.
ماسەلەن, سارىارقا اۋدانىندا ورنالاسقان №65 مەكتەپتىڭ ەرەكشەلىگى – ينكليۋزيۆتى ءبىلىم بەرۋ باعدارلاماسى. بۇل مەكتەپتە ەستۋ, تىرەك-قيمىل اپپاراتى بۇزىلعان بالالار وقيدى. مۇندا بارلىعى 3 مىڭنان استام وقۋشى ءبىلىم الىپ ءجۇر, بۇل وقۋ ورنىنا جۇكتەلگەن ءتيىستى جۇكتەمەدەن اسىپ تۇسەدى. مەكتەپتىڭ قۋاتىن ارتتىرۋ ءۇشىن جانىنان جاڭا كورپۋس سالىنىپ جاتىر.
