اۋرۋحانا مەن ەمحانالاردى اككرەديتتەۋدەن وتكىزۋ – مەديتسينالىق قىزمەت ساپاسىنا اسەر ەتەتىن ماڭىزدى قۇرالدىڭ ءبىرى جانە ەمدەۋ قاۋىپسىزدىگىنىڭ كەپىلى. «اككرەديتتەۋ» ءسوزى لاتىن تىلىنەن ەنگەن, ياعني «سەنىم بىلدىرەمىن» دەگەن ماعىنانى بىلدىرەدى. ول مەديتسينالىق عىلىم مەن تەحنولوگيانىڭ قازىرگى زامانعى دامۋى نەگىزىندە بەلگىلەنگەن ستاندارتتارعا سايكەستىگىن باعالاۋ ءۇشىن قولدانىلادى.
بۇگىنگى تاڭدا حالىققا ساپالى جانە قاۋىپسىز مەديتسينالىق كومەك كورسەتۋ كەپىلى رەتىندە مەديتسينالىق ۇيىمنىڭ سىرتقى جانە ىشكى كەشەندى باعالاۋدان ءوتۋىنىڭ ماڭىزى زور. بۇل ءوز كەزەگىندە مەملەكەتتىك جانە جەكەمەنشىك مەديتسينالىق ۇيىمدار اراسىندا باسەكەلەستىك ورتا قالىپتاستىرادى, دارىگەرلىك كومەكتىڭ ساپاسىن ارتتىرادى.
قازاقستاندا مەديتسينالىق ۇيىمداردى اككرەديتتەۋدەن وتكىزۋ ءراسىمى 2009 جىلدان باستاۋ الادى. جىل ساناپ ەلىمىزدە كەشەندى باعالاۋدان وتۋگە ءوتىنىش بەرۋشى مەديتسينالىق ۇيىمدار سانى ۇلعايۋدا. ونىڭ بىرنەشە سەبەبى بار. بىرىنشىدەن, دەنساۋلىعىنا كوڭىل بولەتىن, دارىگەرلەر كومەگىنە جۇگىنەتىن جانداردىڭ سانى كوبەيىپ كەلەدى. ولار ستاندارتتارعا سايكەستىگى تەكسەرىلگەن مەكەمەگە سەنەدى. ونىمەن قوسا, بارلىق اۋرۋحانالار مەن ەمحانالاردا ەمدەۋدىڭ ناتيجەسى مەن ساپاسىنا جاۋاپكەرشىلىك ارتتى. سەبەبى, ازاماتتار مەديتسينالىق قىزمەت ساپاسىنا جوعارى تالاپ قويادى. ەكىنشىدەن, اككرەديتتەۋدەن وتۋگە ءوتىنىش بىلدىرە وتىرىپ, ءتىپتى جەكەمەنشىك ەمحانانىڭ ءوزى مەملەكەتتىك تاپسىرىس الا الادى.
اككرەديتتەۋ – ادىلدىك, جاريالىلىق جانە ايقىندىق قاعيداتتارىنا نەگىزدەلگەن, ءارى باسەكەگە قابىلەتتى دەنساۋلىق ساقتاۋدى قالىپتاستىرۋ, مەديتسينالىق كومەكتىڭ ساپاسىن جاقسارتۋ ءۇشىن, تەگىن ءارى ەرىكتى تۇردە جۇرگىزىلەدى. ول ۇيىمنىڭ بەلگىلەنگەن نورماتيۆتەرگە ساي جۇمىس ىستەۋ دەڭگەيىن ناقتى باعالاۋ جانە قىزمەت ساپاسىن ۇزدىكسىز جاقسارتۋدىڭ جولدارىن انىقتاۋعا پايدالانىلادى. مىسال رەتىندە, دارىلىك قاۋىپسىزدىككە توقتالايىق. جاڭا پرەپاراتتار سانىنىڭ جىل ساناپ ارتۋىنا بايلانىستى بۇگىنگى تاڭدا فارماتسەۆتەرگە ۇلكەن جاۋاپكەرشىلىك جۇكتەلگەن. سەبەبى, سەرتيفيكاتتالعان بىلىكتى فارماتسەۆت دارىلىك زاتتاردى تاڭدايدى, تاپسىرىس بەرەدى, مەديتسينالىق پەرسونال كورسەتەتىن فارماتسەۆتيكالىق قىزمەتتەردى باقىلايدى, قىزمەتكەرلەر مەن پاتسيەنتتەرگە كەڭەس بەرەدى.
ەسكە سالساق, 2013 جىلى مەديتسينالىق ۇيىمداردى اككرەديتتەۋدىڭ ناتيجەسى قاراشا ايىندا بەلگىلى بولدى. ول كەزدە 154 مەديتسينالىق ۇيىمنىڭ 27-ءسى سىرتقى جانە ىشكى كەشەندى باعالاۋدان وتپەي قالعان بولاتىن. ول ۇيىمدار اككرەديتتەۋدەن وتۋگە ءوتىنىمدى قايتا بەرمەستەن بۇرىن, سىرتقى كەشەندى باعالاۋ ناتيجەلەرى بويىنشا انىقتالعان ەسكەرتۋلەردى جويىپ, قىزمەتىنىڭ نەگىزگى كورسەتكىشتەرىن جاقسارتۋ جونىندە جۇمىستار جۇرگىزۋى ءتيىس. مىنە, سوندىقتان دا اككرەديتتەۋ – مەديتسينالىق قىزمەت ساپاسى مەن قاۋىپسىزدىگىنىڭ ماڭىزدى كورسەتكىشى. ول دەنساۋلىق ساقتاۋ مەكەمەلەرى ءۇشىن ودان ءارى دامۋ, ەمدەلۋشىلەردىڭ قاۋىپسىزدىگى مەن مەديتسينالىق قىزمەت كورسەتۋ ساپاسىن جاقسارتۋ ماقساتىندا ويلاستىرىلىپ جاسالعان قادام.
گۇلزيا قۋاندىقوۆا,
«رەسپۋبليكالىق دەنساۋلىق ساقتاۋدى دامىتۋ ورتالىعى» رمك اككرەديتتەۋ ورتالىعىنىڭ مامانى.
