مەشىت – مۇسىلمان قاۋىمنىڭ جاراتۋشى اللاعا كىرشىكسىز قۇلشىلىق ەتىپ, تاۋبەگە كەلەتىن, جانىنا جۇبانىش تاباتىن, دۇعا تىلەيتىن ءمىناجات ءۇيى. مەشىت – قۇلشىلىق قانا ەمەس, ءبىلىمنىڭ, تاربيەنىڭ دە كيەلى ورداسى. بۇل مەشىتتىڭ مۇسىلمان بالاسى ءۇشىن قانشالىقتى ۇلكەن ماڭىزعا يە ەكەنىن كورسەتەدى.
كاتونقاراعاي اۋدانىنا قاراستى اقسۋ اۋىلىندا بوي كوتەرگەن جاڭا مەشىتتىڭ اشىلۋ سالتاناتى بولدى. العاشقى قۇتتىقتاۋ ءسوزدى قازاقستان مۇسىلماندارى ءدىني باسقارماسىنىڭ شىعىس قازاقستان وبلىسى بويىنشا باس يمامى ەرمەك قاجى تاسبولات ۇلى الدى. ول ءوزىنىڭ سوزىندە وسى مەشىتتىڭ بوي كوتەرۋىنە تىكەلەي ىقپال جاساعان ازامات نۇرسۇلتانوۆقا ريزاشىلىعىن بىلدىرە كەلە, وعان العىسحات تاپسىردى. باسقا ءسوز سويلەگەندەر دە اۋىلداستارىن جاڭا مەشىتتىڭ اشىلۋىمەن قۇتتىقتادى. سوڭىندا ارۋاقتارعا قۇران باعىشتالدى.
وسى مەشىت سالىنىپ جاتىر ەكەن دەپ ەستىگەن كەزدە قۋانىشىمدا شەك بولمادى. مەشىتتىڭ سالىنۋىنا كوپ كۇش-جىگەر جۇمساپ, باستان-اياق قامقورشى بولعان ازامات پەن اسحات باۋىرلارىمىزعا العىسىمىز شەكسىز. وسىنداي كورىكتى عيماراتتىڭ بوي كوتەرۋىنە جان-جاقتى قولداۋ كورسەتكەن بارلىق اۋىل ادامدارىنا دا اللانىڭ نۇرى جاۋسىن دەگىم كەلەدى.
بۇگىندە كوپتىڭ تىلەگى قابىل بولىپ, كۇمبەزى كوك تىرەگەن ءزاۋلىم مەشىتىمىزدىڭ ەسىگى بارلىق ءيسى مۇسىلمان قاۋىمى ءۇشىن ايقارا اشىق. ال مەشىت سالۋدىڭ ساۋابى قانشالىقتى ۇلكەن ەكەنى جايىندا اللا تاعالا قۇران كارىمدە: «اللا تاعالانىڭ مەشىتتەرىن تەك اللاعا جانە اقيرەت كۇنىنە يمان كەلتىرگەن, ناماز وقىعان, زەكەتىن بەرگەن جانە اللادان باسقا ەشكىمنەن قورىقپايتىندار عانا سالادى», دەپ ايتىلعان. اقسۋ اۋىلىنداعى ەڭسەلى مەشىتىمىز ءدىنىمىزدىڭ وركەندەۋى ءۇشىن قىزمەت ەتىپ, حالقىمىزدى يماندىلىققا تاربيەلەي بەرسىن.
سايراش توقپاەۆا,
گەراسيموۆ ورتا مەكتەبىنىڭ مۇعالىمى
شىعىس قازاقستان وبلىسى,
ۇلان اۋدانى
