باۋىرجان مومىش ۇلى تۋرالى سەريالدى «حابار» تەلەارناسى سىعىمداپ, تولىقمەتراجدى كوركەم فيلم رەتىندە ۇسىندى.
مەرەكە كۇندەرى ۇلكەن ەكرانعا پروكاتقا شىعاتىن «باۋىرجان مومىش ۇلى» تەلەحيكاياسى تۇلعالى باتىر تاعدىرىنىڭ تاعىلىمدى تۇستارىن قامتيدى.
سونىمەن, جاڭا جوبا الماتى مەن استانا قالالارىندا مامىردىڭ 5-6 كۇندەرى ۇلى جەڭىستىڭ 69 جىلدىعىنا وراي, ەكىنشى دۇنيەجۇزىلىك سوعىس پەن تىل ارداگەرلەرىنە, اسكەري ۋچيليششەلەردىڭ كۋرسانتتارىنا ۇسىنىلماق. قىسقاسى, وتكەن جىلدىڭ جەلتوقسانىندا تۇساۋىن كەسكەن اتتاس تەلەحيكايا كينو نۇسقاسىنا اۋىستىرىلىپ, كينوتەاترلاردا كورسەتىلۋ ءۇشىن DCP فورماتىنا كوشىرىلگەن.
كوركەم فيلمدە باۋىرجان مومىش ۇلىنىڭ گەنەرال پانفيلوۆپەن تانىسىپ, ونى باتالون كومانديرى ەتىپ تاعايىنداۋىنا دەيىن جانە ونىڭ جاۋىنگەرلەرىنىڭ گەرمانيا فاشيستىك اسكەرىنە قارسى ءماسكەۋ ماڭىنداعى ماترەنينو دەرەۆنياسىنىڭ جانىندا ۆولوكولام تاس جولىنداعى شايقاسىن قامتيتىن ەرلىك جولى تۇگەل كورسەتىلەدى. ءفيلمنىڭ سيۋجەتىنە الەكساندر بەكتىڭ «ۆولوكولام تاس جولى» پوۆەسى ارقاۋ بولعان.
جوبانىڭ اۆتورلارى اتى اڭىزعا اينالعان قازاقتىڭ – كەڭەس وداعىنىڭ باتىرى باۋىرجان مومىش ۇلىنىڭ بەينەسىن بارىنشا شىنايى جاساۋ وڭايعا تۇسپەگەندىگىن ايتادى. تەلەحيكايا باۋكەڭ ۇرپاقتارىنىڭ رۇقساتىمەن, باتىردىڭ كوزىن كورگەندەردىڭ كەڭەسىمەن تۇسىرىلگەن.
باستى ءرولدى ورىنداعان م.اۋەزوۆ اتىنداعى قازاق مەملەكەتتىك اكادەميالىق دراما تەاترىنىڭ بەلدى اكتەرى ەركەبۇلان دايىروۆ كوركەم ءفيلمنىڭ تۇساۋكەسەرىندە زالدى تولتىرعان اق سامايلى كورەرمەنگە بۇكىل شىعارماشىلىق توپتىڭ اتىنان رياسىز العىسىن ءبىلدىرىپ, تاعزىم ەتتى.
اتالمىش فيلمگە تۇسكەن اكتەرلەردىڭ كوبى رەجيسسەر اقان ساتاەۆپەن بىرگە جاساعان بۇرىنعى كارتينالاردان تانىس ەكەندىگىن ايتا كەتۋ كەرەك. ستسەناري اۆتورى – تەمىر جاقسىلىقوۆ بولسا, وپەراتورى – حاسان قىدىراليەۆ.
تاريحي ءفيلمنىڭ تەڭ جارتىسى الماتى وبلىسىنىڭ تالعار وڭىرىندە, كەيبىر جەرلەرى مينسك قالاسىنداعى «بەلارۋسفيلم» كينوستۋدياسىنىڭ پاۆيلونىندا تۇسىرىلگەن.
ايناش ەسالي,
«ەگەمەن قازاقستان».
الماتى.
