سالىمشىلاردىڭ زەينەتاقى جيناعى زەينەتاقى جارناسى, سونداي-اق ينۆەستيتسيالىق كىرىس ەسەبىنەن قالىپتاسادى. بۇل رەتتە ينۆەستيتسيالىق كىرىستىڭ ءرولى وتە جوعارى. ماسەلەن, 2013 جىلدىڭ قىركۇيەگى مەن 2022 جىلدىڭ شىلدەسى ارالىعىنداعى تازا ينۆەستيتسيالىق تابىس كولەمى 6,5 ترلن تەڭگە دەڭگەيىندە قالىپتاسقان.
Ranking اقپاراتىنا سۇيەنسەك, ءبىرىنشى جارتىجىلدىقتاعى ەسەپتەلگەن ينۆەستيتسيالىق كىرىس مولشەرى – 352,59 ملرد تەڭگە. سونىڭ 146,09 ميللياردى – باعالى قاعازدار بويىنشا سىياقى تۇرىندەگى كىرىستەر. بۇعان – ورنالاستىرعان سالىمدار بويىنشا سىياقى, «كەرى رەپو» وپەراتسيالارى جانە قۇندى قاعازداردىڭ نارىقتىق قايتا باعالانۋى كىرەدى. 231,32 ملرد تەڭگە شەتەلدىك ۆاليۋتانى قايتا باعالاۋدان تۇسكەن. وزگە كىرىستەردىڭ كولەمى – 11,25 ملرد تەڭگە. سونىمەن قاتار سىرتقى باسقارۋداعى اكتيۆتەر بويىنشا 36,07 ملرد تەڭگە كولەمىندە شىعىن دا بار.
«زەينەتاقى جيناعىنىڭ ۇزاقمەرزىمدى ينۆەستيتسيا ەكەنىن, ال ينۆەستيتسيالىق كىرىس مولشەرىن تالداعان كەزدە ءبىر جىلدان كەم ەمەس ۋاقىت كەزەڭىن ەسەپكە العانى ءجون ەكەنىن اتاپ وتكىمىز كەلەدى. قىسقامەرزىمدى (اپتالىق, ايلىق) دەرەكتەر كورسەتكىش بولىپ سانالمايدى. ويتكەنى نارىق كونيۋنكتۋراسى ءسات سايىن وزگەرەدى. مىسالى, 2021 جىلى سالىمشىلاردىڭ زەينەتاقى شوتىنا بولىستىرىلگەن تازا ينۆەستيتسيالىق تابىس سوماسى 1,4 ترلن تەڭگەنى قۇراپ, ءبىر جىلدا تۇسكەن جارنا سوماسىنان دا (1,3 ترلن تەڭگە) اسىپ ءتۇستى. ۇلتتىق بانك باسقارۋىنداعى بجزق زەينەتاقى اكتيۆتەرى بويىنشا كىرىستىلىك – بىلتىر ينفلياتسيا 8,4 پايىز بولىپ تۇرعان كەزدە 11,13 پايىزدى قۇرادى. بيىلعى ينۆەستيتسيالىق كىرىستىڭ وزگەرىس ديناميكاسىن دا ەسكەرمەي تۇرا المايمىز. 2022 جىلدىڭ 5 ايىنىڭ قورىتىندىسى بويىنشا شىعىن تىركەلدى. الايدا جارتى جىل ىشىندە جاعداي وڭ قىرىنا قاراي وزگەردى. بۇل جىل باسىنداعى گەوساياسي احۋالدىڭ ۋشىعۋىنان تۋىنداعان الەمدىك قارجىلىق جانە تاۋارلىق نارىقتاعى قۇبىلۋلارمەن بايلانىستى. بۇل جاعداي ينفلياتسيا وسىمىنە دە, زەينەتاقى اكتيۆتەرى بويىنشا كىرىستىلىك كورسەتكىشتەرىنە دە اسەر ەتتى», دەپ جازادى Ranking.
ولاردىڭ ايتۋىنشا, ۇزاقمەرزىمدى ديناميكاعا قاراپ وپتيميستىك كوزقاراس تانىتۋعا بولادى. تەك سوڭعى بەس جىلدىڭ (2017-2021) وزىندە ينۆەستيتسيالىق كىرىستىڭ جالپى سوماسى 5 ترلن تەڭگەگە جەتكەن.
