بەردىقۇلوۆ ءتۋرنيرى

9-10 مامىر كۇندەرى استانادا سپورت جانە دەنەشىنىق­تىرۋ  ىستەرى  اگەنتتىگىنىڭ ۇيىمداستىرۋىمەن باق وكىلدەرى  اراسىندا كورنەكتى قوعام قايراتكەرى, جازۋشى,  سپورت ءجۋرناليسى سەيداحمەت  بەردىقۇلوۆتى  ەسكە الۋعا  ارنالعان  شاعىن فۋتبولدان  ءداستۇرلى  رەسپۋبليكالىق تۋرنير وتەدى. بۇل شارا 1995 جىلدان بەرى الماتىدا وتكىزىلىپ كەلگەن ەدى. ەندى, مىنە, ەلىمىزدىڭ ورتالىق باسى­لىمدارىنىڭ جانە باسقا دا گازەت, تەلەارنالاردىڭ, ينتەرنەت-سايت­تاردىڭ استانادا ورنالاسۋىنا باي­لانىستى س.بەردىقۇلوۆتى ەسكە الۋعا ارنالعان ءتۋرنيردى استانادا وتكىزۋگە شەشىم قابىلدانىپ وتىر. وسىعان وراي جارىستى 9-10 مامىر كۇندەرى «استانا-ارەنا» ستاديونىندا وتكىزۋ جوسپارلانۋدا. س.بەردىقۇلوۆ ءتۋرنيرى, جوعارىدا اتاپ وتكەنىمىزدەي, الماتىدا 1995 جىلدان بەرى ءوتىپ كەلگەن ەدى. سول كەزدە ول بايلانىس جانە اقپارات مينيسترلىگى, ودان كە­يىن 2008 جىلدان باستاپ تۋريزم جانە سپورت مينيسترلىگىنىڭ ۇيىم­داستىرۋىمەن وتكەنىن بىلەمىز. ال 2011 جىلى سپورت جانە دەنەشى­نىقتىرۋ ىستەرى اگەنتتىگى شىمكەنت قالاسىندا سپورتتىڭ بەس تۇرىنەن العاش رەت باق اراسىندا س.بەر­دى­قۇلوۆتى ەسكە الۋعا ارنالعان ءى سپارتاكيادا وتكىزدى. بۇل جارىس ەندى جۋرناليستەر اراسىندا ءتورت جىلدا ءبىر رەت وتەتىن بولىپ شەشىلدى. الداعى كەزدە سپارتاكيادا ودان سايىن قىزىقتى جانە تارتىمدى ءوتۋى ءۇشىن ونىڭ باعدارلاماسىنداعى سپورت تۇرلەرىنىڭ سانىن كوبەيتۋ جوسپارلانىپتى. سپورت جانە دەنەشىنىقتىرۋ ىستەرى اگەنتتىگى بيىلعى جۋرناليستەر جارىسىن قىزىقتى وتكىزۋ ءۇشىن قولدا بار مۇمكىندىكتىڭ ءبارىن جاسايتىنىن, ال قازاقستان فۋتبول فەدەراتسياسى, «استانا-1964» فۋتبول كلۋبى, قازاقستان سپورت ءباسپاسوزى قاۋىمداستىعى, «استانا-ارەنا» ستاديونى مەن «ۇلتتىق شتاتتىق كوماندالار جانە سپورت رەزەرۆى ديرەكتسياسى» رمقك قولداۋ كورسەتەتىنىن دە حابارلادى. ءتۋرنيردىڭ مانداتتىق كوميس­سياسىنىڭ وتىرىسى 7 مامىر كۇنى ساعات 18.00-دە «استانا-ارەنا» ستاديونىندا وتەدى. «ەگەمەن-اقپارات».