شاھارداعى وسكەمەن كوشەسىندە كولىك كەپتەلىسى ءجيى ورىن الادى. اتالعان ماسەلەنى ءبىرجولاتا شەشىپ, كولىك قۇرالدارىنىڭ وتكىزۋ قابىلەتىن ارتتىرۋ ءۇشىن وسى اۋماقتا, ايتالىق, ءشايجۇنىسوۆ كوشەسىنەن 6-شى لينيا كوشەسىنە دەيىن جولدى كەڭەيتۋ جۇمىستارى جۇرگىزىلىپ جاتىر.
«بۇل كوشەدەگى كولىك كەپتەلىسى تۇراقتى كورىنىسكە اينالىپ كەتكەندىكتەن جولدى كەڭەيتۋ كەرەك. ەگەر دە قانداي دا ءبىر كومەك قاجەت بولسا, حابارلاسىڭىزدار, بارىنشا قولداۋ كورسەتەمىز. الايدا وسى جول قۇرىلىسىن اياقتاۋىمىز قاجەت. سەبەبى بۇل جول بويىنداعى بيزنەس ءۇشىن دە ماڭىزدى. ساياجاي ماسسيۆتەرىندە ادام كوپ تۇرادى. سوندىقتان بۇل وتە ماڭىزدى ماسەلە», دەدى نۇرلان ۇرانحاەۆ.
اتالعان كوشەدەگى كۇردەلى جوندەۋ جۇمىستارى بيىل مامىردا باستالعان ەدى. جولدىڭ ۇزىندىعى – 1,5 شاقىرىم, ال جوبانىڭ قۇنى – 1 122,6 ملن تەڭگە. بارلىق جۇمىس الداعى قاراشا ايىندا اياقتالۋعا ءتيىس.
قازىر وسكەمەن كوشەسىندە جوباعا سايكەس جەر توسەمىن ورناتۋعا بايلانىستى جۇمىستار جۇرگىزىلىپ جاتىر. ايتسە دە, مۇنداعى قۇرىلىسقا بارلىعى بىردەي ءدان ريزا دەپ ايتۋ قيىن. ماسەلەن, جەكەلەگەن كاسىپكەرلەر جولدىڭ جوندەلۋى ولاردىڭ بيزنەستى جۇرگىزۋىنە كەدەرگى كەلتىرىپ وتىرعاندارىن ايتىپ شاعىمداندى.
«وسى قۇرىلىستىڭ سالدارىنان قورشاۋدا قالىپ قويدىق. ەندى قالاي جۇمىس ىستەيمىز؟ بۇل ءالى بىرنەشە ايعا سوزىلادى. ەكى ايعا جۋىق جۇمىس ىستەمەي قالاي جۇرەمىز؟», دەپ رەنىشتەرىن جەتكىزدى جەرگىلىكتى كاسىپكەرلەر.
ن.ۇرانحاەۆ ءوز كەزەگىندە جاڭعىرتۋ جۇمىستارىن جىلدامداتىپ اياقتاۋ قاجەت ەكەنىن ايتىپ, مەردىگەر ۇيىمعا جۇمىس ۋاقىتىن ارتتىرۋدى تاپسىردى. اتاپ ايتقاندا, كۇندىزگى ۋاقىتتى بارىنشا ءتيىمدى پايدالانۋ كەرەك ەكەنىن جەتكىزدى. سونىمەن قاتار ءوڭىر باسشىسى وبلىستىق اۆتوموبيل جولدارى جانە جولاۋشىلار كولىگى باسقارماسىنىڭ باسشىسىنا مەردىگەر ۇيىم وكىلدەرى جانە كاسىپكەرلەرمەن كەزدەسىپ, جولدى كەزەڭ-كەزەڭىمەن اشۋ مۇمكىندىگىن تالقىلاۋدى تاپسىردى.
اتالعان جوندەۋ جۇمىستارى بارىسىندا وسكەمەن كوشەسىندەگى ەلەكتر ەنەرگياسىمەن قامتيتىن تىرەكتەر اۋىستىرىلىپ, شىعىس كەنتىنىڭ باتپاقتى اۋماعى ارقىلى كوشكىنباەۆ كوشەسىنەن ايۋچەنكو كوشەسىنە دەيىن شىعاتىن اينالما جول سالىنعانىن ايتا كەتكەن ورىندى.
سەمەي
