اشىق اسپان استىندا, سۋ جاعاسىنداعى جاسىل الاڭقايدا كيىز ءۇي تىگىلىپ, ەت اسىلدى. فەستيۆالدىڭ ەرەكشەلىگى دە سوندا, جوبانىڭ ءتورايىمى ءنازيرا تابىلدينوۆا باستاعان اق جاۋلىقتى انالار, اپالار, قىزدار جاس ەرەكشەلىكتەرىنە ساي تاقيا, بورىك, ورامال, كيمەشەك پەن قازاقى ناقىشتاعى قاجەكەي, قامزول, بۇرمەلى كويلەكتەرىن كيىپ, قازاقتىڭ ۇلتتىق زەرگەرلىك اشەكەيلەرىن تاعىپ كەلدى.
جالپى, قازاق حالقىنىڭ سالت-داستۇرلەرى: بالا تاربيەسىنە ارنالعان سالت-داستۇرلەر, تۇرمىستىق سالت-داستۇرلەر, الەۋمەتتىك-مادەني سالت-داستۇرلەر بولىپ ۇلكەن ءۇش توپقا بولىنەتىنى بەلگىلى. ەتنوفەستيۆال بارىسىندا ۇيىمداستىرۋشىلار جوعارىدا اتالعان ءۇش باعىتتاعى سالت-داستۇرلەرىمىزدىڭ ءجون-جورالعىسىن تۇگەل قامتۋعا تىرىستى جانە ولار تانىمدىق-تاعىلىمدىق تۇرعىدان العاندا ءىس-شاراعا جينالعان جۇرتشىلىقتىڭ كوڭىلىنەن شىقتى دەۋىمىز كەرەك.
ەتنوفەستيۆال سوڭىندا كىتاپحانا ديرەكتورى, اقىن, «قازاق انالارى – داستۇرگە جول» جوباسىنىڭ بەلسەندى مۇشەسى گۇلجاينار نارەنقىزى ۇلتتىق اسپاپ – دومبىرانىڭ سۇيەمەلدەۋىمەن جينالعاندارعا ءان-جىردان شاشۋ شاشتى. مارە-سارە بولعان كوپشىلىك ءتۇرلى ۇلتتىق تاعامداردان ءدام تاتىپ, قۋانىشتى تارقاستى.
ۇلتتىق سالت-داستۇرلەرىمىز عاسىرلار بويى قالىپتاسقان قۇندىلىقتارىمىز بولعاندىقتان, ولاردى قولىمىزدان كەلگەنشە دارىپتەپ, جاس ۇرپاقتىڭ بويىنا سىڭىرە بەرۋىمىز كەرەك. ال ۇلتىمىز ءۇشىن يگىلىگى مەن تاعىلىمى مول وسىنداي ەتنوفەستيۆالدار ءوز وتانىنىڭ تاريحىن, سالت-ءداستۇرى مەن ادەت-عۇرپىن, رۋحاني قۇندىلىقتارىن بويىنا سىڭىرگەن, ۇلكەنگە ىزەتى, كىشىگە قۇرمەتى بار, ياعني ۇلتتىق كودتى ساقتاي الاتىن تۇلعا قالىپتاستىرۋعا سەبەپشى بولادى دەگەن سەنىمدەمىز.
اينۇر تولەگەنوۆا,
ساعي جيەنباەۆ اتىنداعى وبلىستىق جاسوسپىرىمدەر كىتاپحاناسىنىڭ بيبليوگرافى
اقتوبە
