زيانكەستەردىڭ كۇرت كوبەيۋىنە اسەر ەتەتىن نەگىزگى فاكتور ءتۇرلى تۇرمىستىق قالدىقتاردىڭ بەي-بەرەكەت تاستالۋى. وسىنىڭ سالدارىنان قالا اۋماعىنداعى ساياباقتاردا, اسىرەسە كوپقاباتتى ۇيلەردىڭ ماڭىندا ادام دەنساۋلىعى ءۇشىن اسا قاۋىپتى كەمىرگىشتەر كوبەيەدى. مامانداردىڭ سوزىنشە, كەمىرگىشتەردىڭ كەيبىر تۇرلەرى ءتىپتى ءولىم جاعدايلارىنا اكەلىپ سوقتىراتىن جۇقپالى اۋرۋلاردىڭ وشاعى سانالادى.
قىشىما كەنەنىڭ كەيبىر تۇقىمداستارى ءتىپتى كوزگە دە شالىنبايدى. بۇل جاندىك ادام بويىندا بورتپە, سۇزەك, كەنە ەنتسەفاليتى, تۋليارەميا سياقتى اۋرۋلاردىڭ وربۋىنە جول اشادى. مۇنداي كەنەلەر جاڭبىردان كەيىن كوگالدى جەرلەردە كوپتەپ كەزدەسەدى. سوندىقتان تابيعات اياسىنا كوككە شىعاتىن تۇرعىندار بۇل جاعدايدى قاپەرىندە ۇستاعانى ابزال. ماماندار زيانكەستەرمەن كۇرەس ماسەلەسى ءاردايىم باستى نازاردا, بىراق, ءار ازامات تازالىققا ءمان بەرىپ, ساق جۇرگەنى ءجون دەگەندى ايتادى. الماتى قالاسى اۋماعىن زيانكەستەردەن زالالسىزداندىرۋ جۇمىستارىنىڭ جازعى ناۋقانى قىزا تۇسكەن. ارناۋلى كەستە نەگىزىندە تاۋلى ايماقتار مەن دەمالىس ورىندارىندا, قالا اۋماعىنداعى ساياباقتاردا زالالسىزداندىرۋ جۇمىستارى ءجۇرىپ جاتىر. بۇعان قۇرامىندا تاجىريبەلى ەپيدەميولوگ دارىگەرلەر بار ماماندار توبى جۇمىلدىرىلعان.
الماتى
