قۇدىرەتتىڭ كۇشى قانداي, اينالامىزدا تۇمسا تابيعات تۇنىپ تۇر, بىراق سونى كوبىمىز كورە بەرمەيمىز. بىلايشا باسىپ, تاپتاپ ءوتىپ كەتەمىز. ال سۋرەتشىنىڭ مىندەتى سونى توقتاتىپ, كوزىمىزگە كورسەتۋ. ەستۋ قابىلەتىنەن قاعاجۋ كورسە دە سابينا تابيعاتتىڭ تىلسىم ءۇنىن بوياۋلار ارقىلى قابىلدايدى. الۋان جانردا ەركىن قالام سىلتەيتىن ونىڭ باستى تاقىرىبى – نازىك گۇلدەر, ورمان-تاۋلار, اۋىل ادامدارىنىڭ تىنىس-تىرشىلىگى. شىعارمالارىنىڭ سيۋجەتتەرى تابيعاتپەن ۇيلەسىم تاپقان حالقىمىزدىڭ باقىتتى بولاشاققا دەگەن سەنىمىن بەينەلەيدى. سول ارقىلى ىزگى ەڭبەككە, ۇلت دەنساۋلىعىنا, سۇلۋلىق پەن بۇكىل الەمدە بەيبىتشىلىككە نەگىزدەلگەن جالپى ادامزاتتىق قۇندىلىقتاردى اتاپ كورسەتەدى.
«گۇلدەر الەمىنە ءتانتىمىن, گۇلدەردەن شابىت الامىن. يريس, سۋ لالاگ ۇلى, اقجەلكەن, قىزعالداق, ءتۇرلى راۋشاندار, كوك قوڭىراۋلار مەنىڭ تاۋسىلمايتىن تاقىرىبىم. قازاق دالاسىنىڭ سۇلۋلىعى مەن بايلىعىن كەنەپ ارقىلى كورسەتۋ ونەردەگى ۇلكەن ميسسيام دەپ بىلەمىن. ءتىرى تۇستەردىڭ الۋان ءتۇرلى, ادامداردىڭ قيمىل-قوزعالىسى مەن ىم-يشاراسىنىڭ اسەمدىگى, تۋعان جەرىمىزدىڭ وسىمدىكتەرى مەن فاۋناسى مەنى ارمان بيىگىنە جەتەلەيدى, قاناتتاندىرادى», دەيدى سابينا.
سۋرەتشى گۇلدەردىڭ اۋقىمىن ادەيى ۇلكەيتەدى, جاپىراقشالاردىڭ ءپىشىنىن, ءمولدىر شىقتى مۇقيات بويايدى. وسىلايشا, كورەرمەنگە گۇلدەردىڭ قۇرىلىمىن ەگجەي-تەگجەي كورۋگە, ولاردىڭ اسپانمەن بايلانىسىن سەزىنۋگە مۇمكىندىك سىيلايدى.
سۋرەتشى اۋىل تاقىرىبىنا ءجيى جۇگىنەتىنىن ايتتىق. بۇل پولوتنولار قاراپايىم تۇرعىنداردىڭ كۇندەلىكتى كۇيبەڭگە تولى قالىپتى ءومىرىن بەينەلەيدى. تاۋ مەن قىراتتاردىڭ توسىنە كيىز ۇيلەر تىگىلىپ, ءۇي شارۋاسىنداعى ايەلدەر قازاقى اۋىلدىڭ كانىگى تىرشىلىگىن كورسەتەدى. «دالاداعى باسەكە» شىعارماسىندا گۇل جايناعان جازىقتا ەكى جىگىت ات ۇستىندە شاۋىپ كەلەدى. ولاردىڭ بولمىسىنان ەركىندىكتىڭ, كۇش-قۋاتتىڭ جانە باقىتتى جاستىقتىڭ جىگەرلى رۋحى ەسەدى. الماتىداعى كوكتوبە مۇناراسى, عاسىر كۋاسىنە اينالعان كارى ەمەندەر, ۇنسىزدىككە تولى ەسكى باقتار, ءدامى تاتقان جاننىڭ تاڭدايىندا قالاتىن اپورت الماسى سۋرەتشىنىڭ باستى «كەيىپكەرلەرىنە» اينالعان.
كيەلى ونەردىڭ كوشىن العا سۇيرەۋ ءۇشىن جاس تالانتتارىمىزدى كوپشىلىككە تانىستىرۋدىڭ ءجونى بولەك. الماتىدا بەينەلەۋ ونەرىن سەرىك ەتكەن شىعارماشىل جاستاردىڭ ۇلكەن ورتاسى بار. بۇگىندە جاس قىلقالام شەبەرلەرىنىڭ دەنى ارتىپ, دەڭگەيى ءوسىپ كەلەدى. ولاردىڭ اراسىندا ايرىقشا قولتاڭباسىمەن تانىلعان سابينا سەكىلدى تالانتتار كوپتەگەن رەسپۋبليكالىق, حالىقارالىق كورمەگە قاتىسىپ, ءتۇرلى جوبادا توبە كورسەتىپ ءجۇر. قالا پەيزاجدارى مەن دالا لاندشافتارى, ادام تاعدىرى جايلى شاعىن بايانداۋلار سابينانىڭ الەمىندە مۇلدە بولەك قىرىنان كورىنىس تابادى. اشىق تا قانىق تۇستەر كوكتەم مەن كۇزگە وزگەشە رەڭ بەرەدى.
سابينانىڭ سۇلۋ الەمىنە ءسىز دە ءۇڭىلىپ كورىڭىز.
الماتى
