جامبىلدا ناعىز جاۋىنگەر بولاتىن جاستار كوپ

ءدال قازىر ەلىمىزدەگى بارلىق اسكەري كوميسسارياتتاردىڭ الدى جاستارعا تولى. ياعني, كوكتەمگى اسكەرگە شاقىرۋ جۇمىستارى ءجۇرىپ جاتىر. ارينە, جىل وتكەن سايىن وتان الدىنداعى ازاماتتىق بورىشتى وتەۋدىڭ دە تالاپتارى قاتايىپ, اسكەر قاتارىنا ناعىز لايىق جاستار تارتىلىپ جاتقانى بەلگىلى. ءبىز جامبىل وبلىسى بويىنشا قورعانىس ىستەرى جونىندەگى دەپارتامەنتى باستىعىنىڭ ورىنباسارى, كەلىسىمشارت جانە شاقىرۋ باسقارماسىنىڭ باستىعى, پودپولكوۆنيك نۇربول زەينەلوۆپەن جولىعىپ, جاستاردىڭ اسكەرگە بارۋعا دەگەن ىنتاسى, ولاردىڭ دەنساۋلىقتارى, دايىندىقتارى تۋرالى,  جالپى وسىناۋ جۇمىستاردىڭ قالاي ۇيىمداستىرىلىپ جاتقانى جايىندا اڭگىمەلەسكەن ەدىك. – نۇربول قۋانتقان ۇلى, ارينە, اسكەرگە شاقىرۋ ءار جارتى جىل سايىن ۇيىمداستىرىلادى. بىلايشا ايتقاندا قورعانىس دەپارتامەنتى ابدەن مەڭگەرىپ العان تىرلىك. ايتسە دە ءار شاقىرۋدىڭ وزىندىك ەرەكشەلىگى بو­لا­تىنى انىق قوي. بۇل ىستە ءدارى­گەر­لەردىڭ اتقاراتىن ءرولى زور. بۇل باعىتتا جۇمىستار قا­لاي ۇيىمداستىرىلىپ جاتىر؟ – كوكتەمگى اسكەرگە شاقىرۋ جۇمىسى قىزۋ ءجۇرىپ جاتىر. كۇن سايىن ءار اۋدان رەت-رەتىمەن كەلەدى. وسىلايشا جىل سايىن 1000-نان اسا بالانى اسكەرگە جىبەرەمىز. ارينە, اسكەرگە جىبەرەمىز دەپ ايتا سالۋ وڭاي, ونىڭ استارىندا قانشاما ەسەلى ەڭبەك جاتىر. ءبىز ەڭ الدىمەن اسكەرگە باراتىن جاستاردىڭ دەنساۋلىعىن ساراپتايتىن دارىگەرلەر قۇرامىن وتە ءساتتى جاساقتادىق دەپ ايتا الامىن. ءدال قازىر 12 دارىگەر جۇمىس ىستەيدى. مۇندا كەلگەن جاسوسپىرىمدەر ەڭ الدىمەن پسيحولوگيالىق تەست تاپسىرادى. ناشاقورلىققا بايلانىستى تەكسەرۋدەن وتەدى. سوڭعى جىلدارى جاستار اراسىندا جۇرەك, بۇيرەك اۋرۋلارىنىڭ كوبەيۋىنە بايلانىس­تى دارىگەرلەر قۇرامىنا كارديولوگ پەن ۋرولوگتى دا قوسقانبىز. دەپارتامەنت باسشىسى, پولكوۆنيك باقىت ابدىباەۆ وسى قىزمەتىنە كەلگەننەن كەيىن اۋداندىق اسكەري كوميسسارياتتار عيماراتتارىنىڭ ءبارىن ارالاپ, جاي-كۇيىن كورىپ, وبلىستىق اكىمدىككە بارلىق جاعدايدى بايانداعان بولاتىن. وبلىس باسشىلىعىنا ۇلكەن راحمەت, قارجى ءبولىپ, ناتيجەسىندە عيماراتتارىمىز جوندەلىپ, دارىگەرلەر قۇرامى كوبەيىپ, قاجەتتى مەديتسينالىق قۇرال-جابدىقتاردىڭ ءبارى الىندى. سونىڭ ناتيجەسىندە جۇمىس ساپاسى دا ارتىپ, سوڭعى ءۇش جىلدان بەرى ءبىزدىڭ كوميسسيانىڭ قورىتىندىسىن الىپ, وتان الدىنداعى بورىشىن وتەۋگە اتتانعان جاسوسپىرىمدەر اراسىندا دەنساۋلىعى سىر بەرىپ, مەرزىمىنەن بۇرىن اسكەردەن بوساپ كەلگەن جاس­تار جوق. ناۋرىز ايىندا تاراز قالاسىندا رەسپۋبليكالىق وقۋ-جاتتىعۋ جيىندارىن وتكىزىپ, بارلىق وبلىستاردان ارنايى كەلگەن وكىلدەر تاجىريبە الماسىپ, جەرگىلىكتى دەپارتامەنتتىڭ جۇمىس ساپاسىنا جوعارى دەڭگەيدە باعا بەرىپ كەتتى. سودان بولار, سوڭعى ەكى جىل قاتارىنان رەسپۋبليكا بويىنشا «ەڭ ۇزدىك قورعانىس دەپارتامەنتى» دەگەن اتاقتى جەڭىپ الىپ, اۋىسپالى تۋدى ەشكىمگە بەرگەنىمىز جوق. – بۇل جولى شاقىرىلعان جاستاردىڭ كوڭىل-كۇيى, دەنساۋ­لىعىنىڭ جاي-كۇيى قالاي ەكەن؟ – ءدال قازىر اسكەرگە وتكەن عاسىردىڭ سوڭىندا, ياعني ەلىمىز ناعىز ەكونوميكالىق قيىندىقتى باستان وتكەرگەن 90-شى جىل­داردىڭ سوڭىندا دۇنيەگە كەلگەن جاسوسپىرىمدەر شاقىرىلىپ جاتىر. بۇل بۋىننىڭ بالالىق شاقتارى وتە قيىن كەزەڭگە تاپ كەلىپ, تۇرمىس تاۋقىمەتىن كوپ تارتقانى بارىمىزگە بەلگىلى. ءيا, كوپتەگەن وتباسىلاردىڭ بالالارى سول جىلدارى دۇرىستاپ تاماق ىشپەي, شيەتتەي شاقتارىنان «شاعىلىپ» وسكەندىكتەن, وسى كوكتەمدە اسكەري كوميسساريات تابالدىرىعىن اتتاپ وتىرعان جاسوسپىرىمدەردىڭ اراسىندا اسكەر قاتارىنا دەنساۋلىقتارى جارامايتىندار ەداۋىر كوپ بولاتىن شىعار دەگەن كۇدىكتىڭ بولعانى راس. كۇدىگىمىز بەكەر ەكەن, كوميسسيادان ءوتىپ جاتقان جاستاردىڭ اراسىندا ءالجۋازدارى وتە از. بۇل, ارينە, ءبىر جاعى ولاردىڭ الدىمەن اۋداندىق اسكەري كوميسسارياتتان ىرىكتەلىپ كەلگەندىگىنەن دە بولار. ايتەۋىر, قۋانىشتىسى – جامبىلدا ناعىز جاۋىنگەر, دەنساۋلىعى مىقتى, سپورتتان حابارى بار, الىمدى جاستاردىڭ قاتارى كوپ ەكەنىنە كوزىمىز انىق جەتىپ وتىر. ءبىر جىلدارى بالا كەزىندە قىتايدىڭ ارزان اياق كيىمدەرىن كيىپ وسكەندىكتەن, «مايتابان» جاستار كوبەيىپ كەتكەن بولاتىن. قازىر جىل سايىن ونىڭ كورسەتكىشى تومەن ءتۇسىپ كەلەدى. بۇعان دەيىنگى شاقىرۋلارداعى كوميسسيالاردىڭ بەرگەن قورىتىندىسىن ساراپتايتىن بولساق, بۇگىندە قالالىقتارعا قاراعاندا اۋىل جاستارىنىڭ دەنساۋلىعى مىقتى. قالا بالالارىندا كوبىنەسە كورۋ قابىلەتىنىڭ ناشارلىعى, قوس جانارىنىڭ السىزدىگى بايقالادى. بۇل, ارينە, ازاننان كەشكە دەيىن كومپيۋتەر, تەلەديدار, ۇيالى تەلەفونعا شۇقشيۋدىڭ ارقاسىندا جابىسقان دەرت ەكەنى انىق. – جاستاردىڭ اسكەرگە بارۋ­عا, وتان الدىنداعى بورىشىن وتەۋگە دەگەن ىنتا-ىقىلاستارى قانداي؟ – ءار شاقىرۋ ماۋسىمى اياقتالعان سوڭ كەلەسى ناۋقانعا دەيىن ءبىزدىڭ ماماندار زەرتتەۋ جۇمىستارىمەن اينالىسادى. ياعني, ماماندار بورىشىن وتەۋگە شاقىرىلاتىن اۋىل-اۋىلداعى جاستاردى تۇگەلدەي دەرلىك ىزدەستىرىپ, سۇراستىرىپ, مالىمەت جينايدى. مىسالى, جوعارى وقۋ ورنىندا وقيتىن نەمەسە دەنە كەمىستىگى بار مۇگەدەك جاستاردى اسكەر قاتارىنا شاقىرىپ, اۋرەگە سالۋدىڭ ەشقانداي قاجەتى جوق. ال, اسكەرگە بارۋدىڭ بارلىق تالاپتارىنا ساي جاسوسپىرىمدەردى ماماندار الدىن الا زەرتتەپ, ونىڭ ءدال قازىر قايدا, قانداي ىسپەن شۇعىلدانىپ ءجۇر, قۇقىق قورعاۋ ورگاندارىنىڭ تىزىمىندە بار-جوعى, دەنساۋلىعىنا بايلانىستى مەديتسينا مەكەمەلەرىنىڭ تىزىمىندە تىركەلگەن بە, مىنە, وسىنىڭ ءبارىن ءبىلىپ وتىرادى. جالپى العاندا, بۇگىندە اسكەرگە بارعىسى كەلەتىن جاستاردىڭ قاتارى مول. مۇنى, ارينە, ءبىر جاعى قازىر كەز كەلگەن قۇقىق قورعاۋ ورگاندارىنا جۇمىسقا تۇرۋ ءۇشىن اسكەري بيلەتتىڭ مىندەتتى تۇردە قاجەت ەكەنىمەن دە بايلانىستىرۋعا بولادى. بىراق, ەڭ باستىسى, قازىر حالىقتىڭ ەلىمىزدىڭ اسكەرىنە دەگەن سەنىمىنىڭ بەكىپ, جاستاردىڭ بويىندا وتانسۇيگىشتىك, پاتريوتتىق سەزىمنىڭ ارتىپ كەلە جاتقانىن بايقايمىز. اڭگىمەلەسكەن ورالحان ءداۋىت, «ەگەمەن قازاقستان». جامبىل وبلىسى.