جۋىردا اتالعان قۇجاتقا وبلىس اكىمى ابىلقايىر سقاقوۆ پەن ەۋرازيالىق توپتىڭ باسقارما توراعاسى سەرىك شاحاجانوۆ قول قويدى. قاراجاتتىڭ باسىم بولىگى قالا ينفراقۇرىلىمىن دامىتۋعا, دەنە شىنىقتىرۋ-ساۋىقتىرۋ نىساندارىنىڭ قۇرىلىسىنا, مەديتسينالىق مەكەمەلەردى قايتا جاڭعىرتۋ مەن ءبىلىم بەرۋ سالاسىنداعى باستامالاردى ىسكە اسىرۋعا جۇمسالادى. ماسەلەن 10 كوللەدج ماتەريالدىق-تەحنيكالىق بازاسىن نىعايتۋعا قاراجات الادى. وبلىستاعى پەريناتالدىق مەكەمەلەردىڭ قىزمەتكەرلەرىن وقىتۋ ۇيىمداستىرىلىپ, وڭىرلىك بالالار اۋرۋحاناسىنىڭ جاڭا كورپۋسىنىڭ جوبالىق-سمەتالىق قۇجاتتارىن ازىرلەۋ جوسپارلانعان. قولدانىستاعى دەنساۋلىق ساقتاۋ مەكەمەلەرى جوندەلەدى.
مەموراندۋمدا الەۋمەتتىك جوبالاردى تسيفرلاندىرۋ دا قاراستىرىلعان. پاۆلودار وبلىسىنىڭ ايماقتىق گەواقپاراتتىق جۇيەسى مەن اۆتوماتتاندىرىلعان «112 كەزەكشى ديسپەتچەر قىزمەتى» اقپاراتتىق جۇيەسىن ازىرلەۋگە قارجى قاراستىرىلعان.
كەلىسىمدە ايماقتاعى ۇستازداردىڭ بىلىكتىلىگىن ارتتىرۋعا سەپ بولاتىن «ERG Mektepke» جانە «ERG كوللەدجدەرگە» اتتى باعدارلامالاردى جۇزەگە اسىرۋ دا قامتىلعان.
– ءبىز ءوڭىردىڭ الەۋمەتتىك-ەكونوميكالىق قۋاتىن ءوسىرۋدى كوزدەيتىن جۇمىسىمىزدى جالعاستىرا بەرەمىز. بۇل – ءبىزدىڭ كورپوراتيۆتىك جاۋاپكەرشىلىگىمىزدىڭ نەگىزى ءارى قىزمەتكەرلەرىمىز بەن ولاردىڭ وتباسى مۇشەلەرىنىڭ ءومىر ساپاسىن جاقسارتۋعا كۇندەلىكتى قوسار ۇلەسىمىز. ERG كاسىپورىندارى ورنالاسقان وڭىرلەردە قازاقستاندىقتاردىڭ جاڭا بۋىنى جەكە تۇلعا رەتىندە ۇيلەسىمدى ءوسىپ, ورلەۋىنە بارىنشا ىقپال ەتۋ كەرەك, – دەدى ERG ديرەكتورلارى كەڭەسىنىڭ توراعاسى الەكساندر ماشكەۆيچ.
مەموراندۋم اياسىندا ERG-ءدىڭ كورپوراتيۆتىك باستاماسى – «Tugan Qala» جوباسىن قارجىلاندىرۋ كوزدەلگەن. بۇل – شاھار تۇرعىندارىنىڭ باستامالارى مەن يدەيالارىنا ساراپشىلارمەن بىرلەسە وتىرىپ ىسكە اسىرۋعا مۇمكىندىك بەرەتىن ەرەكشە جوبا. ۇزدىك جوبالاردى تۇرعىندار داۋىس بەرۋ ارقىلى وزدەرى تاڭدايدى. بيىل بۇل بويىنشا 16 جوبا مەموراندۋمدا قامتىلعان. جالپى بيۋدجەتى 80 ميلليون تەڭگەنى قۇرايتىن ناقتى باستامالار جىل سوڭىنا دەيىن جۇزەگە اسىرىلۋعا ءتيىس.
اتاپ وتەيىك, ەۋرازيالىق توپ كاسىپورىندارى ورنالاسقان وڭىرلەرگە Eurasian Resources Group قۇيعان ينۆەستيتسيالاردىڭ جالپى كولەمى بۇگىندە 1 ملرد دوللاردان اسادى.
مۇرات قاپان ۇلى,
جۋرناليست
پاۆلودار وبلىسى
