بۇل رەتتە مادەنيەت جانە سپورت مينيسترلىگى مەن وقۋ-اعارتۋ مينيسترلىگى بىرىگە وتىرىپ مەكتەپ جانە جوعارى وقۋ ورىندارى قابىرعاسىنداعى بالالار جانە جاسوسپىرىمدەر سپورتىنىڭ دامۋىنا ەرەكشە كوڭىل بولۋگە ءتيىس دەپ سانايمىن. ونىڭ وزىندىك العىشارتى بار. مەكتەپ جاسىنداعى وقۋشىعا نورماتيۆتىك جەتىستىگى ءۇشىن ء«ى, ءىى, ءىى دارەجەلى ءجاسوسپىرىم سپورتشى», سپورت سالاسىنداعى جەتكەن جەتىستىگىنە ارنالعان «سپورت شەبەرىنە ۇمىتكەر», «سپورت شەبەرى», ت.ب. دارەجەلەر جۇيەلى تۇردە زەرتتەلىپ جولعا قويىلعانى ءجون. مادەنيەت جانە سپورت مينيسترلىگىنە مەكتەپ جاسىنداعى سپورتپەن شۇعىلداناتىن وقۋشىلارعا جانە ستۋدەنت جاستارعا ارنالعان سپورتتىق توسبەلگىلەردى شىعارۋ تۋرالى ۇسىنىستار مينيسترلىك تاراپىنان قولداۋ تاپپادى. وسىعان دەيىن اتالعان ماسەلەگە قاتىستى جازعان حاتىما سول كەزدەگى مادەنيەت جانە سپورت ءمينيسترى ا.رايىمقۇلوۆانىڭ اتىنان مىناداي جاۋاپ بەرىلدى:
«قۇرمەتتى ەرلان شاياحمەت ۇلى! سپورت جانە دەنە شىنىقتىرۋ ىستەرى كوميتەتى (بۇدان ءارى – كوميتەت) ءسىز ۇسىنعان سپورتتىق اتاقتار مەن رازريادتار ءۇشىن توسبەلگىلەردىڭ جوبالارى بويىنشا كەلەسىنى حابارلايدى. بۇعان دەيىن حابارلانعانداي, «دەنە شىنىقتىرۋ جانە سپورتتىڭ ۇلتتىق تسيفرلى پلاتفورماسى (e-sport)» سەرۆيستىك باعدارلامالىق ءونىمى ارقىلى ءتيىستى سپورتتىق اتاقتار مەن رازريادتاردىڭ سپورتشىلارعا اۆتوماتتى تۇردە بەرىلۋى جوسپارلانۋدا».
مينيستر ەكەۋمىز ءبىر-ءبىرىمىزدى مۇلدە تۇسىنبەي وتىرعان سياقتىمىز. ءيا, «ە-sport» – زاماناۋي تسيفرلى پلاتفورما. ول جەردەن قانداي سپورتتىق سەكتسيالار بار, جاتتىقتىرۋشىسى كىم, بالاڭىزدى قانداي سپورت تۇرىنە بەرگىڭىز كەلەدى دەگەن سەكىلدى بارلىق اقپاراتتى الۋعا بولاتىنىن بىلەمىز. دەگەنمەن بۇل جەردە ءجاسوسپىرىم ءوز جەتىستىگىن كەۋدەسىنە تاعىپ جۇرسە, ارتىنان ەرگەن ءىنى-قارىنداستارىن ىنتالاندىرىپ سپورتقا جەتەلەيتىنى تۋرالى ءسوز قوزعالىپ وتىر. تسيفرلى جاڭا قازاقستانعا بەت بۇرىپ دامىتىپ جاتىرمىز, تۇسىنىكتى. جاس سپورتشى ءوزىنىڭ جەتىستىككە جەتكەن سپورتشى ەكەنىن دالەلدەۋ ءۇشىن «e-sport» پلاتفورماسىن اشىپ دالەلدەۋگە ءتيىس پە؟ قاي سپورتشى «ە-sport» پلاتفورماسىنداعى «جەتىستىگىن» كەۋدەسىنە تاعىپ جۇرەدى؟ مۇنداي كوزقاراسپەن بالالاردى ىنتالاندىرا الامىز با؟ ەستىگەننەن گورى كوزبەن كورسە, كوڭىل سەنەدى. تاعى بىردە: «ول تۋرالى وڭىرلەردە قاراجات قاراستىرىلماعان», دەگەن جاۋاپ الدىم. قالاي تۇسىنۋگە بولادى؟ قازاقستان ءوز جاستارىنان قاراجات ۇنەمدەي مە؟ كورشى رەسەيدە بۇل ماسەلە ناقتى جولعا قويىلعان. سپورتتىق جەتىستىكتەرىن سپورتشىلار كەۋدەسىنە تاعىپ جۇرەدى. قازىرگى پرەزيدەنت توقاەۆتىڭ تاپسىرماسىنان كەيىن وسى ماسەلەنى تاعى ءبىر ەلەكتەن وتكىزىپ, جاستاردىڭ ءوز سپورتتىق دارەجە جەتىستىگىن كەۋدەسىنە تاعىپ جۇرۋىنە جاعداي جاسالار دەپ ۇمىتتەنەمىز.
جالپى, مينيسترلىككە ءبىر سۇراق قويعىم كەلەدى. مىسالى, ەلىمىزدە ءتۇرلى سالادا جەتكەن جەتىستىكتەرى ءۇشىن ەرەسەكتەرگە «قۇرمەت», «پاراسات», ت.ب. وردەن-مەدالدار تاعىلاتىنى ايان. قىزمەتكەرلەرگە ۇلگى رەتىندە (سول اتاقتاردىڭ ءتۇرلى سالادا شىعارىلۋىنا دا تىكەلەي جاۋاپتى مادەنيەت مينيسترلىگى). مينيسترلىكتىڭ جاۋابىنا سۇيەنە وتىرىپ, «ولارعا دا كەۋدەسىنە تاقپاي, نەگە ەلەكتروندى تۇردە بەرمەسكە؟» دەگەن ورىندى سۇراق تۋىندايدى. بالالاردىڭ سپورتتاعى جەتىستىكتەرى دە جىلدار بويى شەلەكتەپ توككەن تەردىڭ جەمىسى. سپورتتى ءسۇيىپ, سپورتزالعا بارعان بالا – ءوز بالالىق شاعىنىڭ قىزىعىنان سپورتتى جوعارى قويعان جان. «جاستار ءبىزدىڭ – بولاشاعىمىز!» دەگەندە, ۇرانىمىز جەر جارادى. زاماناۋي جابدىقتالعان سپورت كەشەندەرى دە جەتەرلىك, بارلىق قولايلى جاعداي جاسالعان. بىراق سپورتقا جاۋاپتى مينيسترلىك تاراپىنان قايتارىلعان «سپورتتىق جەتىستىكتەرى تەك اۆتوماتتى تۇردە بەرىلەدى» دەيتىن جاۋاپتىڭ ءوزى تۇسىنىكسىز.
سپورت سالاسىن دامىتۋدىڭ ىرگەتاسى مەكتەپتە ىنتالاندىرۋدان قالانۋعا ءتيىس. جانە ول ءۇشىن ەلەكتروندى پلاتفورما ارقىلى ەمەس, كەۋدەسىندەگى شىنايى توسبەلگىلەرىمەن انىقتاۋ جاعىن جەتىلدىرۋ كەرەك. وليمپيادادا نە ءۇشىن مەدال تاعادى, ويلاناتىن جاعداي! كەۋدەدەگى سپورتتىق توسبەلگىلەر – جاستاردى سپورتقا باۋلۋدىڭ, ونى جانداندىرۋدىڭ ماڭىزدى ءبىر تەتىگى. كەي ادامعا جاي عانا توسبەلگى شىعار, ال بالا ءۇشىن بۇل – ماقتانىش, جەتىستىكتەردىڭ العاشقى باسپالداعى. بارلىعىمىز دا بالا كەزدە جانىمىزداعى زامانداس دوستارىمىزدىڭ سپورتتاعى جەتىستىكتەرى ءۇشىن تاققان توسبەلگىسىنە قىزىقتىق. قازاقستان بالالارى مەن جاسوسپىرىمدەرىنىڭ جانە كاسىبي سپورتشىلاردىڭ دا كەۋدەسىنە تاعاتىن, جەتكەن جەتىستىكتەرىن ايعاقتايتىن ۇلتتىق ناقىشتاعى ءوز توسبەلگىلەرى بولۋعا ءتيىس. جاڭا قازاقستاننىڭ جاستار سپورتىنا دا جاڭا كوزقاراس, تىڭ وزگەرىستەر كەرەك.
ەرلان شاياحمەت ۇلى,
سەمەي قالاسى گەربىنىڭ اۆتورى
سەمەي
