الماتى. 5 مامىر. الماتى قالاسى المالى اۋداندىق سوتى دۇيسەنبى كۇنى بۇرىنعى سۋديا كۇلپاش وتەمىسوۆانى (سۋرەتتە) 4,5 جىلعا باس بوستاندىعىن ايىرىپ, جالپى رەجىمدەگى كولونيادا وتىرۋ جازاسىنا كەستى. بۇل تۋرالى «قازاقستان جاڭالىقتارى» حابارلادى.
سوت وعان سوڭى اۋىر زارداپتارعا اپارىپ سوقتىراتىن زاڭسىز سوت اكتىسىنە جول بەردى دەگەن ايىپ تاقتى. بۇعان قوسا, بۇرىنعى سۋديا ءۇش جىلعا دەيىن مەملەكەتتىك قىزمەت اتقارۋ قۇقىعىنان ايرىلدى.
2013 جىلعى ناۋرىز ايىنىڭ سوڭىندا الماتىنىڭ ارنايى اۋدانارالىق سوتىنىڭ ۇكىمىمەن رەسەيلىك بەلگىلى بيزنەسمەن, «Silicium Kazakhstan» جشس-نىڭ بۇرىنعى باس ديرەكتورى الەكساندر سۋتياگينسكي كىسى جالداپ ادامدى ءولتىرۋدى ۇيىمداستىرعانى جانە وقتى قارۋ مەن وق-ءدارى ساقتاعانى ءۇشىن 12 جىلعا سوتتالدى. الايدا, الماتى قالاسى اپەللياتسيالىق سوت القاسىنىڭ سۋدياسى وتەمىسوۆانىڭ 2013 جىلعى 12 تامىزداعى قاۋلىسىمەن بۇل ارەكەت «كىسى ءولتىرۋدى دايىنداۋدى ۇيىمداستىرۋ» بولىپ وزگەرتىلىپ, سۋتياگينسكيدىڭ جازاسى 6 جىلعا شارتتى تۇردە باس بوستاندىعىنان ايىرىلۋ بولىپ وزگەرتىلدى. ال وقتى قارۋ مەن وق-ءدارىنى زاڭسىز ساقتادى دەگەن ايىپ دالەل جەتىسپەدى دەگەن جەلەۋمەن الىنىپ تاستالدى.
سودان كەيىن الماتى قالاسىنىڭ كاسساتسيالىق سوت القاسى وتەمىسوۆانىڭ قاۋلىسىن بۇزىپ, 2013 جىلعى 28 ناۋرىزداعى سوت ۇكىمىن وزگەرىسسىز قالدىردى, سونداي-اق وتەمىسوۆانىڭ وزىنە قاتىستى قاۋلى شىعاردى. القا سۋديانىڭ قىلمىستىق زاڭ نورمالارىن دۇرىس قولدانباي, جيناقتالعان دالەلدەمەلەردى دۇرىس باعالاماۋ كورىنىس تاپقان ۇكىم شىعارۋ ارقىلى زاڭناماسى قاساقانا بۇزىپ, ورەسكەل كەمشىلىككە جول بەرگەنىن اتاپ كورسەتتى. سۋديا وتەمىسوۆا قابىلداعان زاڭسىز شەشىمنىڭ ناتيجەسىندە سۋتياگينسكي قىلمىستىق جاۋاپكەرشىلىكتەن قۇتىلىپ كەتتى. قازىر ونىڭ جۇرگەن جەرى بەلگىسىز. قىلمىسكەرگە ىزدەۋ جاريالاندى.
قازاقستاننىڭ باس پروكۋرورى 2013 جىلعى قىركۇيەكتە سوڭى اۋىر زارداپتارعا اپارىپ سوقتىرعان زاڭسىز سوت اكتىسىن شىعارعان سۋدياعا قاتىستى قىلمىستىق كودەكستىڭ 350-بابىنا سايكەس قىلمىستىق ءىس قوزعادى. پروكۋراتۋرانىڭ مالىمەتى بويىنشا, ول 6 قىركۇيەكتە ۋاقىتشا ۇستاۋ وقشاۋلاعىشىنا قامالعان.
قۇرىش نۇرىمبەت.
دەرەككوز: «قازاقستان جاڭالىقتارى».
فوتو: rus.azattyq.org.
