اكينوري الماتىدا تۇراقتاي ما؟

سپورتسۇيەر قاۋىم, سوڭعى جىلدارى سۋمو كۇرەسىنىڭ حاس شەبەرى اساسيوريۋ اكينوريدىڭ الماتىعى قايتا-قايتا كەلىپ جۇرگەنىن بىلەدى. سويتسەك, ونىڭ دا وزىندىك سىرى بار ەكەن.  ەڭ باستى جۇلدە – يمپەراتور كۋبوگىن 25 رەت جەڭىپ العان ايگىلى موڭعول  جىگىتى قازاق جەرىندە سۋمو كۇرەسىن دامىتۋدى قولعا الماق. ۋلان باتوردا تۋعان بالۋان ءححى عاسىر­دىڭ تۇڭعىش يوكودزۋنى (سۋمو كۇرە­سىنىڭ ەڭ بيىك دارەجەسى). ياعني, موڭعولياداعى سۋمو تاريحىنداعى العاشقى بالۋان جانە يوكودزۋن جوعارى اتاعىن العان ءۇشىنشى شەتەلدىك.  جاسى ءالى وتىزعا جەتپەگەن داڭقتى اسا­سيوريۋ: «كەزىندە مەنىڭ كۇرەستەرىم ارقىلى موڭعوليا الەمگە تانىلدى. ەندى مەن قازاقستاندىق سپورتشىلار ءوز ەلىنىڭ داڭقىن ارتتىرۋى ءۇشىن بار ءبىلىمىم مەن تاجىريبەمدى وسى ورەلى ىسكە جۇمساعىم كەلەدى», دەپ اعىنان جارىلىپ وتىر. كوبىنەسە كۇرەسكە «كوك ايداھار» دەگەن لاقاپ اتپەن شىعاتىن سۋموشىنىڭ شىن اتى-ءجونى – دولگورسۋرەنگين داگۆادورج. ۋلان باتوردا ۇلتتىق كۇرەس ءستيلى بويىنشا داڭقى شىققان وتباسىندا تۋعان اساسيوريۋ اكينوريدىڭ قالعان ءۇش اعاسى دا تانىمال سپورت تۇلعالارى كورىنەدى. سۋمو جەكپە-جەگى بويىنشا بۇگىنگە دەيىن الدىنا جان سالماعان الىپتىڭ ءبىرى وسىنىڭ الدىندا قازاقستانعا «بەس قارۋ» اتتى  ۇلتتىق سپورت تۇرلەرى قاۋىمداستىعىنىڭ پرەزيدەنتى داۋرەن مۇسانىڭ شاقىرتۋىمەن كەلگەن-ءدى. وتكەن جىلى «كوك ايداھار» قازاق­ستاندى ارالاپ, تالانتتى ءبىر سپورتشى تاۋىپ, جاپون ۇلتتىق كۇرەسىنىڭ بۇكىل قىر-سىرىنا باۋلىماق نيەتىن بىلدىرگەن ەدى. ونىڭ ويىنشا, قازاقستاندىقتار كوبىنەسە لوندون وليمپياداسىندا كۇشكە سالاتىن سپورت تۇرلەرىنە بەيىمدىلىگىن كورسەتكەن. سونىمەن ايگىلى سۋموشى الماتى قالاسى اكىمىنىڭ قابىلداۋىندا بولىپ, وڭتۇستىك استانادا كۇرەستىڭ وسى ءتۇرىن دامىتۋعا ىنتالى ەكەندىگىن بىلدىرگەن. ءوز كەزەگىندە اكىم احمەتجان ەسىموۆ بۇل باستامانى قولداپ: «الماتى –  قازاقستاننىڭ سپورت ورتالىعى. ءبىزدىڭ مەگاپوليستە سپورتتىڭ كوپ ءتۇرى دامىعان. سپورتقا قولداۋ كورسەتۋ ءبىزدىڭ باستى مىندەتىمىزدىڭ ءبىرى. سوندىقتان, قالامىزدا كوپتەگەن سەكتسيالاردىڭ, سونىڭ ىشىندە سۋمونىڭ دا اشىلعانىن قالايمىز», – دەدى. ايناش ەسالي, «ەگەمەن قازاقستان». الماتى.