جيىن بارىسىندا دەنساۋلىق ساقتاۋ مينيسترلىگىنىڭ وكىلدەرى COVID-19 اۋرۋىنىڭ ءوسۋى جانە ينفەكتسيانى تاراتپاۋ جانە ەمدەۋ بويىنشا قابىلدانىپ جاتقان شارالار تۋرالى حابارلادى.
«قازاقستاندا 20 ماۋسىمنان باستاپ كۆي اۋرۋشاڭدىعىنىڭ ءوسۋى بايقالادى, سوڭعى اپتادا الدىڭعى اپتامەن سالىستىرعاندا اۋرۋشاڭدىق 1,9 ەسەگە, ياعني, 8 156-دان 15 503 جاعدايعا دەيىن ءوستى. تاۋلىگىنە 2 700-گە دەيىن كۆي+ جانە 20-عا دەيىن كۆي- جاعدايلارى تىركەلەدى», دەپ اتاپ ءوتتى دەنساۋلىق ساقتاۋ ۆيتسە-ءمينيسترى – باس مەملەكەتتىك سانيتارلىق دارىگەرى ايجان ەسماعامبەتوۆا.
بۇل رەتتە سوڭعى اپتادا اۋىرعانداردىڭ 70%-ى 3 وڭىرگە – الماتى, نۇر-سۇلتان جانە قاراعاندى وبلىستارىنا ءتان. ايتا كەتەتىن جايت, سىرقاتتانۋشىلىقتىڭ كوتەرىلۋىنە قاراماستان, ناۋقاستاردى اۋرۋحاناعا جاتقىزۋ دەڭگەيى ءالى دە تومەن بولىپ قالۋدا.
دەنساۋلىق ساقتاۋ ۆيتسە-ءمينيسترى ۆياچەسلاۆ دۋدنيك COVID-19-بەن سىرقات پاتسيەنتتەردىڭ 93%-دان استامى امبۋلاتوريالىق دەڭگەيدە ەمدەلىپ جاتقانىن ايتتى.
«كوروناۆيرۋس ينفەكتسياسى اۋرۋشاڭدىعىنىڭ ارتۋىنا بايلانىستى مەديتسينالىق-سانيتارلىق العاشقى كومەك ۇيىمدارى كابينەتتەردىڭ سۇزگى جۇمىسىن قامتاماسىز ىەتە وتىرىپ, سانيتارلىق-دەزينفەكتسيالىق جانە ەپيدەميولوگيالىق رەجىمدى ساقتاي وتىرىپ, شتاتتىق رەجىمدە جۇمىس ىستەيدى. كوروناۆيرۋس ينفەكتسياسى دياگنوزى بار پاتسيەنتتەردىڭ 93%-دان استامى امبۋلاتوريالىق دەڭگەيدە ەم الۋدا», دەدى ۆ.دۋدنيك.
سونىمەن قاتار, ول بۇگىنگى تاڭدا كۆي-مەن اۋىراتىنداردىڭ اراسىندا اۋرۋدىڭ جەڭىل, اسيمپتوماتيكالىق اعىمى بايقالاتىنىن, قىسقا ينكۋباتسيالىق كۋرس 2-دەن 14 كۇنگە دەيىن, ورتاشا ەسەپپەن 2-4 كۇنگە دەيىن سوزىلاتىنىن جەتكىزدى.
«ناۋقاستار كوبىنە جوعارى قىزبا, جالپى السىزدىك, قاتتى باس اۋرۋى سيمپتومدارىنا شاعىمدانادى. اۋرۋدىڭ اۋىر اعىمىندا نەيروتوكسيكوز, ەلەكتروليت بالانسىنىڭ بۇزىلۋى, گيپوۆولەميالىق شوك بايقالادى», دەدى ۆيتسە-مينيستر.
دەنساۋلىق ساقتاۋ مينيسترلىگىنىڭ مالىمەتىنە سۇيەنسەك, امبۋلاتوريالىق دەڭگەيدە تەگىن مەديتسينالىق كومەكتىڭ كەپىلدىك بەرىلگەن كولەمى شەڭبەرىندە كوروناۆيرۋس ينفەكتسياسى بار پاتسيەنتتەردى 5 پرەپاراتپەن قامتاماسىز ەتۋ ۇيىمداستىرىلدى. بۇل – قىزۋ تۇسىرگىش دارىلەر جانە انتيكواگۋليانتتار. بۇلار جەتكىلىكتى مولشەردە بار. كوروناۆيرۋس ينفەكتسياسى بار پاتسيەنتتەرگە مەديتسينالىق-سانيتارلىق العاشقى كومەك دەڭگەيىندە ۋاقتىلى مەديتسينالىق كومەك كورسەتۋ ءۇشىن كۆي بار ناۋقاستاردى باقىلاۋ بويىنشا 2 380 ءموبيلدى بريگادا ۇيىمداستىرىلدى, ونىڭ 1 مىڭى اۋىلدا. بۇل رەتتە رەزەرۆتە 1 600-دەن استام ءموبيلدى بريگادا بار.
«ەستەرىڭىزگە سالا كەتەيىك, ءموبيلدى بريگادالار 5 مىڭ جانە ودان دا كوپ حالىققا 1 بريگادا ەسەبىنەن ۇيىمداستىرىلادى. اۋىل دەڭگەيىندە دارىگەرلىك امبۋلاتوريانىڭ جانە مەديتسينالىق-سانيتارلىق العاشقى كومەك ورتالىعىنىڭ جانىنان كەمىندە ءبىر ءموبيلدى بريگادا قۇرىلادى. ءجىتى رەسپيراتورلىق اۋرۋ بەلگىلەرى بار جانە كوروناۆيرۋس ينفەكتسياسىنا كۇدىكتى نەمەسە ناۋقاس پاتسيەنتتەرگە ۇيگە شىعۋ كەزىندە پتر ادىسىمەن كوروناۆيرۋس ينفەكتسياسىنا بيولوگيالىق ماتەريالدار ۇلگىلەرىن الۋ جۇرگىزىلەدى. «COVID-19 كوروناۆيرۋس ينفەكتسياسى» دياگنوستيكاسى مەن ەمدەۋدىڭ كلينيكالىق حاتتاماسىنا سايكەس ءدارى-دارمەكتەر تاعايىندالادى, قاجەت بولعان جاعدايدا ءدارى-دارمەكتەر ناۋقاسقا جەتكىزىلەدى. 2022 جىلدىڭ ءى جارتىجىلدىعىندا ءموبيلدى بريگادالار 815 مىڭ شىعۋدى جۇزەگە اسىردى. ەڭ كوپ شىعۋ قاراعاندى وبلىسىندا, نۇر-سۇلتان جانە الماتى قالالارىندا جۇزەگە اسىرىلدى», دەلىنگەن مينيسترلىك تاراتقان مالىمەتتە.
مەديتسينالىق قىزمەتتەردى ستاتسيونارلىق كورسەتۋگە قاتىستى رەسپۋبليكادا كۆي بويىنشا ستاتسيونارلىق كومەكتى قۋاتتىلىعى 4 505 توسەكتىك 180 مەديتسينالىق ۇيىم كورسەتەدى, 1 342 پاتسيەنت ەمدەۋگە جاتقىزىلدى.
«ستاتسيونارلىق ەمدەۋدەگى پاتسيەنتتەردىڭ تالداۋىنا سايكەس بالالار سانى 36 %-دى قۇرايدى. ەرەسەك پاتسيەنتتەر 64 %-دى قۇرادى, ونىڭ ىشىندە جاسى 60 جاستان جوعارى ادامدار – 22 %. 50 %-دان استامى قاتار جۇرەتىن اۋرۋلارى بارلار, ونىڭ ىشىندە قان اينالىمى جۇيەسىنىڭ اۋرۋلارى – 19%, تىنىس الۋ ورگاندارىنىڭ اۋرۋلارى, قانت ديابەتى جانە سەمىزدىك – 5 %. بۇگىنگى تاڭدا ناۋقاستاردىڭ اراسىندا 18 %-بەن 249 جۇكتى ايەل بار», دەدى ۆ.دۋدنيك.
سونىمەن قاتار رەزەرۆتە 138 مەديتسينالىق ۇيىمدا 20 مىڭنان استام ينفەكتسيالىق توسەك بار.
«تاعى دا ەسكە سالعىم كەلەتىنى, بىزگە ينفەكتسيانىڭ اۋىر تۇرلەرىنەن جانە اۋرۋحاناعا جاتقىزۋدان ناقتى الدىن الۋ شاراسى قولجەتىمدى. بۇل كۆي-گە قارسى ۆاكتسينالاۋ. ۆاكتسينالاۋ جانە رەۆاكتسينالاۋ ينفەكتسيادان جالعىز قورعانىس بولىپ قالا بەرەدى. الماتى جانە نۇر-سۇلتان قالالارىنىڭ مىسالىندا ءبىز اۋىرعانداردىڭ 80 %-ى ۆاكتسينالانباعان ادامدار نەمەسە 6 اي بۇرىن ۆاكتسينالانعاندار ەكەنىن كورەمىز, بۇل كۆي-گە قارسى ۆاكتسينالاۋ قاجەتتىلىگىن تاعى دا راستايدى», دەپ اتاپ ءوتتى باس مەملەكەتتىك سانيتاريالىق دارىگەر.
بۇگىنگى تاڭدا كۆي-عا قارسى ۆاكتسينامەن ەرەسەك تۇرعىنداردىڭ 80%-دان استامى نەمەسە ەلدىڭ بارلىق حالقىنىڭ 56%-دان استامى قامتىلعان.
«COVID-19-عا قارسى رەۆاكتسينا الدىڭعى ۆاكتسينالاردىڭ كومەگىمەن پايدا بولعان ۆاكتسينادان كەيىنگى يممۋنيتەتتى ساقتاۋعا جانە اعزانى اۋرۋدان قورعاۋدى كۇشەيتۋگە باعىتتالعانىن اتاپ وتكەن ءجون. وكىنىشكە قاراي, ۆاكتسينالانعان ادامداردا, سونداي-اق كۆي-مەن اۋىرعان ادامداردا ۋاقىت وتە كەلە دەنەنىڭ ينفەكتسيادان قورعالۋ دەڭگەيى تومەندەيدى, ناتيجەسىندە ادام قايتادان ينفەكتسياعا سەزىمتال بولادى. وسىعان بايلانىستى, ۆاكتسينانىڭ العاشقى كۋرسىن العاننان كەيىن 6 ايدان كەيىن كۆي-عا قارسى رەۆاكتسينا الۋ ۇسىنىلادى», دەدى ا.ەسماعامبەتوۆا.
