ەل اۋماعىندا ءسىبىر جاراسىنىڭ 2 مىڭعا جۋىق وشاعى بار

استانا. 4 مامىر. ورتالىق كوممۋنيكاتسيالار قىزمەتىندە وتكەن بريفينگتە تۇتىنۋشىلار قۇقىقتارىن قورعاۋ اگەنتتىگىنىڭ توراعاسى بولاتبەك قۋاندىقوۆ ەل تۇرعىندارىن تولعاندىرىپ جۇرگەن بىرقاتار ماسەلەلەرگە توقتالدى. بۇل تۋرالى Bnews.kz حابارلادى. بريفينگتە بولاتبەك قۋاندىقوۆ الدىمەن ءسىبىر جاراسى تۋرالى ءسوز قوزعادى. ءوز سوزىندە اگەنتتىك توراعاسى: «قازاقستان اۋماعىنىڭ 40 پايىزى وبانىڭ تابيعي وشاعى بولىپ تابىلاتىنىن ەستەن شىعارماۋىمىز كەرەك. ەل اۋماعىندا 2 مىڭعا جۋىق ءسىبىر جاراسى مەن باسقا دا اسا قاۋىپتى ىندەتتەردىڭ وشاعى ورنالاسقان. سوندىقتان, ءبىزدىڭ باستى ماقساتىمىز – حالىق اراسىندا جۇقپالى دەرتتىڭ تارالۋىنىڭ الدىن الۋ, جەكەلەگەن ىندەتتەر ۇياسىن جويۋ», – دەدى. بۇدان كەيىن جۇرتشىلىق كوبىرەك تۇتىناتىن تاعامداردىڭ سانيتارلىق- گيگيەنالىق  ماسەلەلەرىن اڭگىمە ارقاۋىنا اينالدىرعان ول: «فاست-فۋد جونىندە ايتىپ وتەيىن... بۇل جىلدام دايىندالاتىن تاعام تۇرلەرىنىڭ ءبىرى. كەيىنگى ۋاقىتتا حالىق اس ازىرلەۋگە ۋاقىتى بولماعاندىقتان, كوشە بويىندا ساتىلاتىن ارزان ءارى ءدامدى فاست-فۋد ونىمدەرىنە قۇمار بولىپ الدى. ونى دايىندايتىن مەكەمەلەر ءوز جۇمىستارىن باستايتىن ۋاقىتتا وزگەلەر سياقتى سانيتارلىق-گيگيەنالىق قورىتىندى الۋى ءتيىس. ال ولاردىڭ دايىنداعان ونىمدەرىنە شاعىمدار ءتۇسىپ جاتسا, جوسپاردان تىس تەكسەرۋلەر جۇرگىزىلەدى. سوندىقتان, فاست-فۋد تاعامدارىنا كۇماندارىڭىز بولسا, كەز كەلگەن ۋاقىتتا سول ءونىمدى بىزگە الىپ كەلۋلەرىڭىزگە بولادى», – دەدى. سونداي-اق, بولاتبەك قۋاندىقوۆ تۇتىنۋشىلاردىڭ قۇقىن قورعاۋ جۇيەسىن تولىعىمەن جاڭعىرتۋ كەرەكتىگىنە توقتالا وتىرىپ, زاڭدىق, قۇقىقتىق, ءتىپتى, نورماتيۆتىك اكتىلەردى قايتا قاراۋدىڭ ۋاقىتى كەلگەنىن, قولدانىستاعى قۇجاتتاردىڭ باسىم بولىگىندەگى تالاپتار وسى زامانعى وزگەرىستەر مەن تەحنولوگيالىق ۇدەرىستەرگە مۇلدەم ساي ەمەس ەكەنىن جەتكىزدى. جولدىباي بازار. دەرەككوز: Bnews.kz. فوتو: med.kz.ucoz.com.