ۆاشينگتون جۇرتى قازاقتىڭ ءدام-تۇزىن تاتتى

استانا. 4 مامىر. سەنبى, 3 مامىر كۇنى ەلىمىزدىڭ اقش-تاعى ەلشىلىگىندە قازاق ءدامىنىڭ كۇنى وتكىزىلدى. وسىعان وراي ديپلوماتيالىق كەڭسەنىڭ ەسىگى كەلەم دەۋشىلەرگە اشىق تۇردى. بۇل تۋرالى قازاقستاننىڭ اقش-تاعى ەلشىلىگىندەگى دەرەككوزىنە سىلتەمە جاساعان egemen.kz ءتىلشىسى حابارلادى ەلشىلىك وكىلى نۇرعالي ارىستانوۆتىڭ ايتۋىنشا, تاڭەرتەڭگى ساعات 10 مەن كەشكى 5 ارالىعىندا ەلشىلىكتىڭ ەسىگى بارلىق كەلەم دەۋشىلەرگە اشىق بولعان. ۆاشينگتون تۇرعىندارى مەن قوناقتارى وتە تومەن باعادا ساتىلعان قازاقتىڭ ۇلتتىق تاعامدارى-باۋىرساق, قۋىرداقتىڭ ءدامىن تاتىپ, ەجەلگى ۇلى جىبەك جولى بويىندا ورنالاسقان, قاشاننان مەيماندوستىق پەيىلىنەن جازباعان حالىقتىق داستۇرمەن تانىسىپ, بۇگىنگى قازاقستاننىڭ تىنىسى مەن ونىڭ باي تاريحى تۋرالى مول مالىمەتتەر العان. سونداي-اق, كەلۋشىلەرگە قازاقتان جايلى بەستسەللەر كىتاپتاردىڭ كوشىرمەلەرىن تەگىن الۋعا  دا مۇمكىندىك تۋعىزىلعان. ەلشىلىك قىزمەتكەرلەرى قازاق-امەريكان دوستىعى مەن ەكى اراداعى ستراتەگيالىق ارىپتەستىكتى نىعايتا تۇسۋدە, ەكونوميكالىق قاتىناستاردىڭ كوكجيەگىن كەڭەيتۋدە اتقارىلىپ جۇرگەن يگىلىكتى ىستەر جايىندا ايتىپ بەرگەن. مۇنداي شارا جىلىنا ءبىر رەت وتكىزىلىپ, امەريكالىقتار  وركەنيەتتەر توعىسىنداعى زايىرلى مەملەكەتتىڭ ءوسىپ-وركەندەۋىمەن, مۇنداعى كەلىسىم مەن بىرلىككە قۇرىلعان تاتۋ ەل تىرلىگىمەن تانىسادى. انار تولەۋحانقىزى. دەرەككوز: egemen.kz. فوتو: www.newskaz.ru.