ەلدەگى جيىرمادان استام بانكتىڭ 13-ءى عانا دەبەتتىك كارتا ۇسىنادى. سونىڭ ىشىندە تەك 6 ەكىنشى دەڭگەيلى بانك قانا ءوز كارتالارى بويىنشا جىلدىق تەگىن قىزمەت كورسەتەدى. ولار – «بانك حوۋم كرەديت» (Lite كارتا), «بانك تسەنتركرەديت» (كارتاكارتا), Forte Bank (ForteBlack), «بانك فريدوم فينانس» (Freedom Card), «ەۋرازيالىق بانك» جانە Altyn Bank.
Ranking مالىمەتى بويىنشا, تەگىن اقشا شەشىپ الۋ بويىنشا ەڭ ۇلكەن ليميت «بانك حوۋم كرەديتتە». بۇل بانكتىڭ دەبەتتىك كارتاسى ارقىلى تاۋلىگىنە – 2 ملن, ال ايىنا – 60 ملن تەڭگە قارجى شەشىپ الۋعا بولادى. «ەۋرازيالىق بانك» ءليميتى: ايىنا – 1 ملن تەڭگە. «بانك تسەنتركرەديت», Forte Bank, «بانك فريدوم فينانس» ءليميتى: ايىنا – 500 مىڭ تەڭگە. Altyn Bank ءليميتى: ايىنا – 400 مىڭ تەڭگە.
التى بانكتىڭ التاۋى دا بانك ىشىندە كارتادان كارتاعا اۋدارىم جاساۋ بويىنشا كوميسسيا ۇستامايدى. بىراق وزگە بانكتىڭ كارتاسىنا كوميسسياسىز اۋدارىم جاساۋ بويىنشا ليميت بار. ەڭ ۇلكەن ليميت: «بانك حوۋم كرەديت» كارتاسى ارقىلى باسقا بانك كارتاسىنا ايىنا 4 ملن تەڭگەنى كوميسسياسىز اۋدارۋعا بولادى. ForteBank پەن «بانك فريدوم فينانس» ارقىلى ايىنا 500 مىڭ تەڭگەنى وزگە كارتاعا كوميسسياسىز اۋدارۋعا مۇمكىندىك بار. سونداي-اق بتسك كارتاسىمەن وزگە كارتاعا ايىنا 200 مىڭ تەڭگەنى عانا كوميسسياسىز جونەلتە الاسىز. Altyn Bank وزگە بانكتىڭ كارتاسىنا اۋدارىم جاساۋ پروتسەسىن تەك تەلەفون ءنومىرى ارقىلى عانا مۇمكىن ەتىپ قويعان.
كەشبەككە كەلەر بولساق, قازىرگى ساتتە «بانك حوۋم كرەديت» ءموبيلدى قوسىمشا ارقىلى كوممۋنالدىق قىزمەتتى, جانارماي قۇيۋ تولەمىن جانە سۋپەرماركەتتەردە ساۋدا جاساعان جاعدايدا العاشقى ءۇش ايدا 10 پايىزعا دەيىن كەشبەك بەرەدى. جالپى, بتسك مەن بحك-ءنىڭ كەز كەلگەن كاتەگورياسىنداعى كەشبەك مولشەرى 10 پايىزدى قۇرايدى. ال «ەۋرازيالىق بانك» – 30, Forte Bank 15 پايىزعا دەيىن كەشبەك ۇسىنادى. ءبىز قاراستىرىپ وتىرعان التى بانكتىڭ بەسەۋى (Forte-دەن باسقالارى) كەپىلدەندىرىلگەن كەشبەك بەرەدى. كەپىلدەندىرىلگەن كەشبەك «بانك فريدوم فينانستا» – 1,5, «بانك حوۋم كرەديت» پەن «بانك تسەنتركرەديتتە» – 1, «ەۋرازيالىق بانك» پەن Altyn Bank-تە – 0,5 پايىز.
جالپى, سوڭعى ءبىر جىلدا دەبەتتىك كارتا سانى 15,9 پايىزعا وسكەن.
