سايىس 3 تامىزدا باستالادى. جارىس وتەتىن جەرگە تەڭىزشىلەر «سارىارقا» زىمىران-ارتيللەريالىق كەمەسىمەن كەلەدى, ال «ورال» كورابلى رەزەرۆتەگى كەمە رەتىندە بەلگىلەنىپ وتىر. اسكەري تەڭىزشىلەر جارىستا جۇزبەلى مينانى, تەڭىز جانە اۋە نىسانالارىن ارتيللەريا وعىمەن اتۋدان سايىسۋمەن بىرگە, كەمەنىڭ تىرشىلىك ءۇشىن كۇرەسىن, قۇتقارۋ قۇرالدارىمەن جۇمىس ىستەۋ داعدىلارىن جانە تەڭىز ماشىعىن كورسەتەدى. جارىستىڭ ءتارتىبى گيدرومەتەورولوگيالىق جاعدايلارعا بايلانىستى قۇرىلادى.
قازىر قاتىسۋشىلار اۋە جانە ءسۋۇستى نىسانالارىن يميتاتسيالايتىن نىسانالارعا وق اتىپ, تاجىريبە جيناۋدا. جۇزۋشىلەر قاشىقتىققا ءجۇزۋدى ورىنداپ, قۇتقارۋ قۇرالدارىن پايدالانۋ تەحنيكاسىن پىسىقتايدى. كەمەنىڭ مىقتىلىعىن سىناۋ ءۇشىن اپاتتىق جاعدايداعى نۇسقاسى ازىرلەنۋدە. ساباقتار باسسەيندە, پيرستەردە جانە تەڭىزدە وتەدى.
– اۆاريالىق قۇتقارۋ قۇرال-سايماندارىنىڭ كومەگىمەن كەمەنىڭ مىقتىلىعىن كورسەتۋ ءۇشىن كوماندا ءارتۇرلى كولەمدەگى تەسىكتى بىتەۋگە ءتيىس. بۇل تاپسىرمانى اسكەري-تەڭىز بازاسىنىڭ وقۋ-جاتتىعۋ كەشەنىندە پىسىقتايمىز. سۋ جۇيەلى تۇردە ون سەكۋند سايىن تەسىكتەردەن جىبەرىلەدى. وعان كىرىسۋ كوماندا كاپيتانىنىڭ كەمە زاقىمداندى دەگەن بايانداماسىنان كەيىن جەتى مينۋت ىشىندە ورىندالۋعا ءتيىس, – دەدى كوماندا كاپيتانى 3-سىنىپتى ستارشينا جامبىل بادباەۆ.
بىلتىر يراندا تەڭىزشىلەرىمىز سايىستىڭ وسى كەزەڭىندە ءبىرىنشى ورىن الدى. جالپى, حالىقارالىق ارميا ويىندارىندا قازاقستاندىقتار جەتى سايىسقا قاتىسادى. رەسەيدە «تانك بياتلونى» مەن «ەلبرۋس شەڭبەرى», ازەربايجاندا «تەڭىز كۋبوگى», ارمەنيادا «بەيبىتشىلىك جاۋىنگەرى» وتەدى دەپ جوسپارلانۋدا.
قالعان ءۇش سايىس ەلىمىزدىڭ اسكەري پوليگوندارىندا وتەدى. گۆاردەيسكىدە «ارتيللەريادان وق اتۋ شەبەرلەرى» مينااتقىش ەسەپتوپتارىنىڭ جارىسى, بۋراباي تاۋلى ايماعىنداعى اسكەري كوللەدجدىڭ بازاسىندا «مەريديان» اسكەري-توپوگرافيالىق قىزمەت ماماندارىنىڭ جارىسى, سپاسسك پوليگونىندا – «تاكتيكالىق مەرگەن» اسكەري-سپورتتىق جارىستار كەشەنى ۇيىمداستىرىلادى.
ماڭعىستاۋ وبلىسى
