كەشەندى جوسپار شەڭبەرىندە پاۆلودار وبلىسىندا مەكتەپ وقۋشىلارىن كاسىبي باعدارلاۋ ەكوجۇيەسى قۇرىلدى. «جاڭا ماماندىقتار اتلاسى» مەكتەپ تۇلەكتەرىنە ەڭبەك نارىعىندا زامانعا سايكەس قابىلەتتەردى يگەرۋگە مۇمكىندىك بەرەدى. اتالعان جوبا ءبىلىم الۋشىلارعا ومىردە ءوز ورنىن تابۋعا باعىتتالعان. وسىلايشا, وتكەن وقۋ جىلىندا 20 مىڭ جوعارعى سىنىپ وقۋشىسى كاسىبي دياگنوستيكادان ءوتتى.
«باعدارلاما, ەڭ الدىمەن, حالىقتىڭ تابىسىن ارتتىرۋعا جانە ناتيجەلى جۇمىسپەن قامتۋدى قامتاماسىز ەتۋگە باعىتتالعان. جالپى العاندا, وڭدەۋ ونەركاسىبىندە 126 مىڭ جاڭا جۇمىس ورنى قۇرىلاتىن 713 جوبا جۇزەگە اسىرىلادى. 50 ءىرى كاسىپورىننىڭ جانىنان شاعىن جانە ورتا بيزنەس بەلدەۋلەرى قۇرىلادى. بۇل كاسىپكەرلىك سۋبەكتىلەرىنىڭ تابىسىن ارتتىرۋعا, تاۋارلاردى كەپىلدى تۇردە ساتۋعا, ونىمدىلىكتى ارتتىرۋعا مۇمكىندىك بەرەدى», دەدى ە.توعجانوۆ.
ۆيتسە-پرەمەر باعدارلامادا جاستاردىڭ قۇزىرەتتىلىگىن دامىتۋ, ولاردىڭ جۇمىسپەن قامتىلۋىن ارتتىرۋ, جۇمىس ىستەيتىن حالىقتىڭ, ونىڭ ىشىندە, تۇرعىنداردىڭ الەۋمەتتىك وسال توپتارىنىڭ داعدىلارىن دامىتۋ ماسەلەلەرىنە ەرەكشە كوڭىل بولىنەتىنىن اتاپ ءوتتى.
«جاڭا وقۋ جىلىندا ءوڭىر مەكتەپتەرىندە كاسىبي باعىتتاۋشى پەداگوگ شتاتتىق بىرلىگى ەنگىزىلەدى, كوللەدجدەر مەن وزەكتى ماماندىقتار ورتالىعىنىڭ, ونىڭ ىشىندە جاستار وكىلدەرىنىڭ جۇمىسى كۇشەيتىلەدى. 15 كوللەدجدە 15 جاڭا ماماندىق پەن 25 جاڭارتىلعان باعدارلاما بويىنشا وقىتۋ ەنگىزىلەدى», دەدى وبلىستىق ءبىلىم بەرۋ باسقارماسىنىڭ باسشىسى س.ايتقازينا.
جالپى العاندا, ءبىلىم بەرۋدىڭ ۇزدىكسىز مودەلى بولاشاق ماماندارعا ءوز كاسىبىن دۇرىس تاڭداۋعا مۇمكىندىك بەرەدى.
ە.توعجانوۆ «جاڭا ماماندىقتار اتلاسى» تۇلەكتەر مەن جۇمىس بەرۋشىلەر ءۇشىن باستى باعدار بولاتىنىن اتاپ ءوتتى. وڭىردە جۇزەگە اسىرىلىپ جاتقان قاناتقاقتى جوبا ەلىمىزدىڭ باسقا وبلىستارى ءۇشىن ءساتتى مىسال بولۋى كەرەك.
قازىرگى كەزدە وڭىردە ء«بىر تەرەزە قاعيداتى» بويىنشا جۇمىس ىستەيتىن جانە 5 مىڭعا جۋىق ادامدى, ونىڭ ىشىندە NEET جاستارىن قامتيتىن 14 وزەكتى ماماندىقتار ورتالىعى قىزمەت ەتەدى. وسى ساناتتاعى 2,5 مىڭعا جۋىق جاس وڭىردەگى ءىرى ونەركاسىپتىك كاسىپورىنداردا تاعىلىمدامادان وتەدى.
«سونىمەن قاتار وڭىردە ءموبيلدى جۇمىسپەن قامتۋ ورتالىقتارى قۇرىلدى. شالعاي اۋىلدارعا 237 شىعۋ ساپارى ۇيىمداستىرىلىپ, 9 مىڭ ادام كەڭەستەرمەن قامتىلدى. جىل باسىنان بەرى وبلىستا 10 مىڭ جۇمىس ورنى قۇرىلسا, ولاردىڭ جارتىسىنان كوبى – 54%-ى تۇراقتى. جۇمىسپەن قامتۋ ورتالىقتارىنىڭ جۇمىسى HR-اگەنتتىكتەرگە سايكەستەندىرىلىپ قايتا قۇرىلدى», دەپ اتاپ ءوتتى پاۆلودار وبلىسى اكىمىنىڭ ورىنباسارى ا.قۇرمانوۆا.
جالپى العاندا, 2022 جىلى ەلىمىزدە 165 ينۆەستيتسيالىق جوبانى ىسكە اسىرۋ ەسەبىنەن 16,3 مىڭ جاڭا جۇمىس ورنىن قۇرۋ جوسپارلانىپ وتىر. ەڭ باستى ءوسىم قاراعاندى, شىعىس قازاقستان جانە پاۆلودار وبلىستارىندا بولادى دەپ كۇتىلۋدە.
جىل باسىندا پاۆلودار وبلىسىنا جۇمىس ساپارىنىڭ قورىتىندىسى بويىنشا پرەمەر-ءمينيستردىڭ ورىنباسارى ە.توعجانوۆ قيىن ومىرلىك جاعدايعا تاپ بولعان وتابسىلارعا كەشەندى قولداۋ كورسەتۋدى قامتاماسىز ەتۋ بويىنشا تاپسىرمالار بەرگەن بولاتىن. قازىرگى كەزدە وبلىس اكىمدىگىندەگى جاعداياتتىق ورتالىقتا وتباسىنىڭ الەۋمەتتىك ستاتۋسى تۋرالى دەرەكتەردى قاناتقاقتى رەجىمدە ناقتى كورۋگە بولادى. جوبانى ەڭبەك جانە حالىقتى الەۋمەتتىك قورعاۋ مينيسترلىگى جۇزەگە اسىرىپ, ەلىمىزدىڭ بارلىق وڭىرىندە اپروباتسيادان وتكىزەدى. پاۆلودار وبلىسى – جوبانى پرواكتيۆتى فورماتتا جۇزەگە اسىرۋ دەڭگەيى جوعارى وڭىرلەردىڭ ءبىرى. جۇما كۇنى ۇكىمەتتىڭ تسيفرلىق كەڭسەسىنىڭ بازاسىندا وتباسىنىڭ تسيفرلىق كارتاسى ىسكە قوسىلادى.
جينالىس قورىتىندىسى بويىنشا ە.توعجانوۆ بىرقاتار تاپسىرما بەردى. وقۋ-اعارتۋ مينيسترلىگى مۇددەلى مەملەكەتتىك ورگاندارمەن, نۇر-سۇلتان, الماتى, شىمكەنت قالالارىنىڭ جانە وبلىستاردىڭ اكىمدىكتەرىمەن بىرلەسىپ, «جاڭا ماماندىقتار اتلاسىن» ەنگىزۋدى جالعاستىرۋى كەرەك. ۆيتسە-پرەمەر باعدارلامانى جۇزەگە اسىرۋ تۇراقتى باقىلاۋدا ەكەنىن اتاپ ءوتتى.
ۆيتسە-پرەمەردىڭ وبلىسقا ساپارى جالعاسۋدا.
