اسىل داستۇردەن, اتا جولدان اينىمايىق

ادام كاپيتالىن جوعارى مادەنيەت, ءبىلىم مەن عىلىم, سونىڭ ىشىندە ءداستۇرلى ءدىن تاربيەسىنىڭ كومەگىمەن دامىتۋ وسى زاماندىق تۇراقتى ءارى وركەنيەتتى الەمگە ەركىن قادام باسۋدىڭ بىردەن-ءبىر جولى. كەشە الماتىدا ءوز جۇمىسىن باستاعان «ءدىني ەكسترەميزم مەن تەرروريزمگە قارسى ءىس-ارەكەتتەرىندەگى جاستاردىڭ ءرولى» اتتى حالىقارالىق فورۋمداعى كەڭىنەن پىكىر الىسىلعان كەلەلى اڭگىمەگە وسى جايلار ارقاۋ بولدى. قازاقستان ءۇشىن ءداستۇرلى دىندەر, مەملەكەتتىك جانە قوعامدىق ۇيىمدار, عالىمدار مەن جاس­تار وكىلدەرىنىڭ وسىناۋ كەزدەسۋىن باس پروكۋراتۋرانىڭ ينستيتۋتى, ءدىن ىستەرى جونىندەگى اگەنتتىك, «جاس وتان» جاس­تار قاناتى مەن ءال-فارابي اتىنداعى قازاق ۇلتتىق ۋنيۆەرسيتەتى استاناداعى ەقىۇ ورتالىعىنىڭ قولداۋىمەن ۇيىمداستىرعانىن ايتا كەتۋ ءلازىم. فورۋم ماقساتى ەكسترەميزم مەن تەرروريزمگە قارسى ءىس-ارەكەتتەر بويىنشا جاستار ساياساتىن تالقىلاپ, جاستار اراسىندا ءدىني راديكاليزمنىڭ ءوسۋىنىڭ سەبەپتەرىن انىقتاپ, سوعان قارسى جۇيەلى شارالار قولدانۋ جولدارىن تالقىعا سالۋ بولسا, جيىن بارىسى سول ۇدەدەن كورىندى. «ءبىزدىڭ جاستارىمىزدى ەكسترەميزمنەن قورعاۋ جولدارىن ىزدەپ وتىرمىز. بۇل قوعام الدىندا تۇرعان مىندەت. جاستارعا ءوز ويىمىزدى جەتكىزىپ, ۇلتتىق قۇندىلىقتارىمىزدى تەك ءدىني تۇرعىدان ەمەس, ءبىلىمدى, ساۋاتتى بولا وتىرىپ تا قورعاپ قالۋعا بولاتىنىن ايتۋدامىز. بۇگىندە 4,5 ملن. جاس بار. ولاردىڭ ءبىرازى نەشە ءتۇرلى اعىمدار جەتەگىندە كەتىپ جاتىر. مەملەكەت تاراپىنان «ءدىنتانۋ نەگىزدەرى» ءپانى ەنگىزىلىپ, وقۋ-قۇرالدارىن جەتىلدىرۋ, وقىتۋشىلاردىڭ بىلىكتىلىگىن ارتتىرۋ ورايىندا ءبىرتالاي جۇمىستار جاسالۋدا. وتكەن جىلى 1 700 مىڭ ادام قامتىلعان كەزدەسۋلەر ۇيىمداستىرىلدى. الەۋمەتتىك زەرتتەۋلەر جاستار اراسىندا وزدەرىن ءدىندار اتاۋشىلار 2003 جىلى 38,7 پايىز, ال 2013 جىلى 73,9 پايىز بولعاندىعىن كورسەتىپ وتىر. ياعني, ون جىل ىشىندە يماندى جاستار قاتارى ەكى ەسە كوبەيگەن. بۇل كوڭىلگە قۋانىش ۇيالاتادى» – دەدى ءدىن ىستەرى اگەنتتىگى توراعاسىنىڭ ورىنباسارى عالىم شويكين. وسىناۋ ماڭىزدى شاراعا ارنايى كەلگەن قازاقستان مۇسىلماندارى ءدىني باسقارماسىنىڭ توراعاسى, باس ءمۇفتي ەرجان قاجى مالعاجى ۇلى ءوز سوزىندە تاقىرىپ بۇگىن باستالعان دۇنيە ەمەستىگىن, ۋاعىز-ناسيحات جۇمىستارى بۇعان دەيىن دە جۇرگىزىلىپ كەلگەندىگىن ايتتى. بىراق نەگىزگى مىندەت ءالى دە بولسا اعىمدار تۋرالى تولىق اقپارات بەرىپ, جاستاردىڭ قالىپتى دامۋىنا دۇرىس ءجون سىلتەۋ ەكەندىگىنە بايىپتى تۇردە توقتالدى. قورعانبەك امانجول, «ەگەمەن قازاقستان». الماتى.