سۋرەتتە: ادىلبەك بايمۇقانبەتوۆ شاكىرتىمەن بىرگە
مىنا ءبىر دەرەكتەرگە كوز سالىڭىزشى. سپورت سالاسىندا قىزمەت ەتكەن 40 جىلىندا وننان استام جاستى الەم, وسىنشاسىن ازيا چەمپيوناتتارىندا جۇلدەگەر ەتكەن باپكەر جايلى قالاي ايتساق تا جاراسادى. ونىڭ سىرتىندا گىر سپورتىنان وننان استام ساڭلاقتى ەل چەمپيونى قاتارىنا قوسقان.
جاس كەزىندە ادەكەڭ ەركىن كۇرەسپەن شۇعىلدانىپ, سپورت شەبەرلىگىنەن ۇمىتكەر اتاندى. ءوز سالماعىندا ەل بىرىنشىلىگىندە سان مارتە جۇلدە تەردى. ەرماك قالاسىنداعى دەنە تاربيەسى تەحنيكۋمىندا وقىپ جۇرگەن كەزىندە پاۆلودار وبلىسىنىڭ نامىسىن قورعادى. ەلگە ورالعان سوڭ اۋدانداعى كاسىپتىك-تەحنيكالىق ۋچيليششەگە دەنە تاربيەسىنىڭ وقىتۋشىسى بولىپ ورنالاستى. بۇل 1982 جىل بولاتىن. دەمەك وسىدان 40 جىل بۇرىن.
الدىمەن از-كەم گىر سپورتى جايلى اڭگىمە قوزعايىق. العاش كەلگەن كەزدە گىر سپورتىن مەنسىنبەگەندەر كەزدەستى. 16, 24, 32 كيلولىق گىر تاسىن ەكى قولىمەن الما-كەزەك كوتەرگەن كەزدە بالالاردىڭ قىزىعۋشىلىعى بايقالدى. البىرت جاستاردىڭ ءبىرازى اۋىر جاتتىعۋلارعا شىداي الماي, ۇيىرمەنى تاستاپ تا كەتتى. ال تاباندى, قايسار جاستار شىدادى. ءادىلحان نۇرعازين دەگەن شاكىرتى وبلىستىق سپارتاكيادانىڭ 11 دۇركىن چەمپيونى اتاندى. ول-ول ما, الەم چەمپيوناتىندا توپ جارعان كەزدە ەڭ ءبىرىنشى باپكەرىن قۇشاقتاپ, العىسىن ايتتى. امانگەلدى قۇسايىنوۆ دەگەن شاكىرتى گىر سپورتىنان اۋداندا ءبىرىنشى بولىپ سپورت شەبەرى اتاندى. ون شاكىرتى گىر سپورتىنان سپورت شەبەرى بولىپ, جەرلەستەرىن قۋانتتى.
2007 جىلى نۇرجان دۇكيەۆ دەگەن شاكىرتى قول كۇرەسىنەن الەم چەمپيونى اتانعان كەزدە باپكەرى ەرەكشە قۋانىشقا بولەندى. ونىڭ سەبەبى بار. نۇرجان تاباندى, جاتتىعۋ زالىنان شىقپايتىن, قايتسەم دە الەم چەمپيونى اتانامىن دەپ ۇستازىنا سەرت بەرگەن. اقىرى ۋادەسىندە تۇردى. زاڭعار ءاشىمانوۆ دەگەن شاكىرتى رەسەيدىڭ سۋزدال قالاسىندا جالاۋى جەلبىرەگەن جاسوسپىرىمدەر اراسىنداعى الەم چەمپيوناتىنان جەڭىسپەن ورالدى. قازىر زاڭعار كۇرشىمدەگى ورتا مەكتەپتە دەنە تاربيەسىنەن ساباق بەرىپ, شاكىرتتەر تاربيەلەپ ءجۇر. ۇرپاقتار ساباقتاستىعى دەگەن وسى بولسا كەرەك.
كۇرشىمنىڭ قىزدارى دا سپورت دەسە ەلەڭدەپ تۇرادى. وسىدان ءبىراز جىل بۇرىن نازەركە مالقايداروۆا ادىلبەكتىڭ قول استىندا قول كۇرەسىنەن جاتتىعا باستادى. ەرىنبەيتىن, جاتتىعۋلاردان قالمايتىن وجەت قىز 2009 جىلى كانادادا جالاۋى جەلبىرەگەن الەم چەمپيوناتىنان جەڭىسپەن ورالدى. تەرەكتى اۋىلىنداعى باپكەر باقىتحان ماجيكوۆتىڭ شاكىرتى ەرناز نۇراحمەتوۆ ايدى اسپانعا ءبىر-اق شىعارىپ, توكيودا وتكەن الەم چەمپيوناتىنان جەڭىسپەن ورالدى.
– ءيا, كۇرشىم اۋدانىندا بۇقارالىق سپورت دامىپ كەلەدى. بىزدەگى 200-دەن استام سپورت عيماراتىندا: سپورت زالدارى مەن ەكى ستاديوندا, باسقا دا سپورت الاڭدارىندا قالا تۇرعىندارى – ەرەسەكتەر, جاستار, مەكتەپ وقۋشىلارى الاڭسىز جاتتىعادى. بارلىعى تەگىن. ال ادىلبەك سياقتى اعامىزبەن ماقتانامىز. 40 جىلدا قانشاما الەم چەمپيونىن تاربيەلەپ شىعاردى. الداعى ۋاقىتتا دا كۇرشىمدىكتەر سپورتتا بيىك تابىستارعا جەتە بەرەتىنى ءسوزسىز, – دەيدى اۋداندىق مادەنيەت, تىلدەردى دامىتۋ, دەنە شىنىقتىرۋ جانە سپورت ءبولىمىنىڭ باسشىسى سىمبات دۇيسەنعازين.
زەينەتكەر اتانسا دا قاتاردان قالماي, اۋىل سپورتىنىڭ وركەندەۋىنە ەرەكشە ۇلەس قوسىپ كەلە جاتقان ادەكەڭ سياقتى نار جۇگىن ارقالاعان ازاماتتارعا العىستان باسقا ايتارىمىز جوق.
وڭداسىن ەلۋباي,
قازاقستاننىڭ قۇرمەتتى سپورت قايراتكەرى
شىعىس قازاقستان وبلىسى,
كۇرشىم اۋدانى
