– 18 جاستان اسقان مۇمكىندىگى شەكتەۋلى بالالارعا قىزمەت كورسەتەتىن ۇيىمدى قينالىپ ءجۇرىپ ارەڭ اشتىم. ءوزىمنىڭ ەكى بالام دا مۇگەدەك. سوندىقتان ولاردىڭ جانىن انا رەتىندە مەنەن ارتىق ەشكىم تۇسىنبەس دەپ ويلايمىن. بۇگىندە قالادا 18-گە دەيىنگى مۇمكىندىگى شەكتەۋلى بالالاردى وڭالتاتىن مەملەكەتتىك, جەكەمەنشىك ورتالىقتار جەتكىلىكتى. ال 18-دەن كەيىنگى مۇنداي ورتالىقتار مۇلدەم جوق. وسى كۇنگە دەيىن قاراستىرىلماعان. جارايدى, كىشكەنتاي كەزىندە مەملەكەتتىڭ قامقورلىعىندا بولسىن دەلىك. سوندا بالا 18-دەن كەيىن نە ىستەمەك؟ مەنى وسى وي قاتتى تولعاندىراتىن؟! – دەيدى ا.كەنجەتاەۆا.
جاڭا ورتالىق اشۋعا كومەك سۇراپ, ءتيىستى مەكەمەلەردىڭ تابالدىرىعىن 7 جىل بويى توزدىرعان الماگۇلدىڭ جالعىز ءۇمىتى – ەرەسەك بالالاردى وڭالتاتىن ورتالىق اشۋدا مەملەكەت تاراپىنان قانداي دا ءبىر قولداۋعا ىلىگۋ ەدى. الايدا ءتۇرلى كەدەرگى كەسە-كولدەنەڭ شىعا بەرىپ, ءىسى ناتيجەسىز اياقتالادى. سودان كەيىن وزىنە عانا سەنۋ كەرەگىن ءتۇسىنىپ, ارەكەت جاسايدى. كوپقاباتتى ۇيدەگى پاتەرىن ساتىلىمعا قويادى. ءبىر جاعىنان شاعىن عيماراتتى جالعا الىپ تۇرادى. جولى بولىپ, ساتىلىمعا قويعان پاتەرىنىڭ ساۋداسىنا تۇسكەن اقشاعا جەر ءۇي ساتىپ الادى. كەيىن ونى شاعىن عانا وڭالتۋ ورتالىعىنا لايىقتاپ وزگەرتەدى. الماگۇل بىلتىر 12 مۇگەدەك جاندى تاربيەسىنە السا, بيىل 20 بالا قامقورلىعىندا.
«ەشكىمگە كەرەك بولماي قالعان بالالاردىڭ ءتورت قابىرعاعا تەلمىرىپ وتىرعانىن كورگىم كەلمەيدى. جۇرەگىم اۋىرادى. قولارباعا تەلىنىپ, ولمەستىڭ كۇنىن كەشكەن بالالارعا قاراپ, قالاي جانىڭ اشىمايدى؟! قاي جەرگە كومەك سۇراپ بارساق تا, ايتاتىن سوزدەرى بىرەۋ عانا: بالا 18-گە تولىپ قويعان دەيدى. سوندا 18-دەن اسقان سوڭ اياعىنان تۇرىپ ءجۇرىپ كەتەتىندەي. قازىر ماعان دا وڭاي سوعىپ وتىرعان جوق. بارلىق شىعىندى ءوز قالتامنان وتەۋىمە تۋرا كەلەدى. مەن ساۋاپتى ءىس جاساپ جاتىرمىن. سوندىقتان بۇل باستاماما ەش وكىنبەيمىن. ەندىگى جەردە مەنىڭ جوبامدى دەمەپ جىبەرەتىن ءبىر كومەك بولسا», دەيدى ا.كەنجەتاەۆا.
قوعامدىق بىرلەستىك ءتورايىمى ءوز ءۇيىنىڭ اۋلاسىندا ءى جانە ءىى توپ مۇگەدەكتىگى بار جاستاردى ەڭبەككە باۋلۋمەن اينالىسادى. كوپشىلىگى جۇمىس ىستەۋگە دەگەن قابىلەتىنىڭ بارىن كورسەتۋدە. ال ەڭبەككە مۇلدەم جارامايتىندارى اينالاسىندا دوستارى, تىلەۋلەستەرى بار ەكەنىن سەزىنىپ, پسيحولوگيالىق قولداۋ, دەمەۋ تابۋدا. سول ارقىلى كۇن سايىن ۇيلەرىنە كوڭىل كۇيلەرى كوتەرىلىپ قايتادى. سونداي-اق ا.كەنجەتاەۆا ەلىمىزدە ءبىرىنشى بولىپ ينۆاتۋريزم باستاماسىن قولعا الىپ وتىر. سول باستامامەن اتا-انالارمەن بىرگە بالالاردى كينوپارككە قىدىرتىپ, ءتۇرلى اتراكتسيوندا ويناتىپ, بىركولىك شاتقالىندا دەمالىپ قايتقان.
«ەندىگى ماقساتىم – جەرگىلىكتى اكىمدىك جاردەم بەرىپ جاتسا, 100 ورىندىق ارنايى وڭالتۋ ورتالىعىن اشسام با دەيمىن. جەكە كاسىپكەرلەرگە راحمەت. ءوتىنىشىمىزدى جەرگە تاستاماي, قولدان كەلگەنشە كومەك بەرىپ جاتىر. 2017 جىلى ەكى مۇگەدەك بالاممەن رەسپۋبليكالىق تەلەارنانىڭ باعدارلاماسىنا قاتىسقان جايىم بار. سول حاباردى ەلىمىزگە بەلگىلى ايتىسكەر-اقىن جۇرگىزگەن ەدى. ءبىزدىڭ ءحالىمىزدىڭ قانداي ەكەنىن كورىپ جانى اشىپ, جاڭا «گازەل» اۆتوكولىگىن سىيلاعان. سول كولىك بۇگىندە قاجەتىمىزگە جاراپ تۇر. جالپى, 18-گە دەيىنگى مۇمكىندىگى شەكتەۋلى بالالارعا قامقورلىق ەلىمىزدە قاراستىرىلعان. قانشاما مۇگەدەكتىگى بار بالا اسىراپ وتىرعان وتباسىلار مەملەكەتتىك باعدارلامامەن ءۇي الىپ جاتىر. جاردەماقى دا تولەنەدى. ءتىپتى بالالاردىڭ جاردەماقىسىنا جان باعىپ وتىرعان وتباسىلار دا بار. ەندى كامەلەتتىك جاستان اسقان مۇگەدەكتىگى بار بالالارعا كوڭىل بولەتىن كەز كەلدى. وسى جانايقايىمىزدى جەرگىلىكتى بيلىك ەستىسە ەكەن», دەيدى قامقور انا.
راس, قازىر مۇمكىندىگى شەكتەۋلى بالا باعىپ وتىرعان وتباسىلاردا ءبىر ادام بالا كۇتىمىنە بايلانعان. كۇندىز-ءتۇنى سونىڭ جاعدايىن جاساۋمەن ۋاقىتىن وتكىزەدى. وسىندايدا اتا-انالاردىڭ شارشايتىنى بەلگىلى. ويتكەنى ولار دا پەندە عوي. ال الماگۇل كەنجەتاەۆا اشقانداي, ەرەسەكتەرگە ارنالعان وڭالتۋ ورتالىقتارى اتا-انالاردىڭ از دا بولسا دەمالۋىنا, قولدارىنىڭ بوساۋىنا مۇمكىندىك بەرەر ەدى. بىراق ازىرگە بۇل ماسەلە بيلىك پەن قوعام تاراپىنان ۇلكەن قوزعالىستى كۇتىپ وتىر.
ءانۋار جۇماشباەۆ,
«Egemen Qazaqstan»
شىمكەنت
