قور باسشىسىنىڭ ورىنباسارى ءلاززات شىڭعىسباەۆانىڭ ايتۋىنشا, وسى كۇنگە دەيىن قازاقستاندىقتاردان 40 مىڭ ءوتىنىش كەلىپ ءتۇسىپتى. ونىڭ 30 پايىزى – حالىقتىڭ جەكە سۇرانىستارى. ياعني ازاماتتار سايت ارقىلى حابارلاسىپ, ازىق-ت ۇلىك سەبەتىمەن تۇراقتى قامتاماسىز ەتىپ تۇرۋدى, نەسيەسىن جابۋدى, باسپانا سالىپ بەرۋدى سۇراپ ءوتىنىش قالدىرعان. قور باسشىسىنىڭ ورىنباسارى قوعامدىق قايىرىمدىلىق ۇيىمى ونداي جەكە وتىنىشتەرمەن اينالىسپايتىنىن جەتكىزدى. ەلىمىزدىڭ باستى قايىرىمدىلىق قورىنىڭ وكىلىمەن كەزدەسۋدە شىمكەنتتىڭ ۇكىمەتتىك ەمەس ۇيىم وكىلدەرى ۇسىنىستارىن ءبىلدىرىپ, بىرقاتار باعىتتا كومەك سۇرادى. مىسالى, اۋتيزممەن اۋىراتىن بالالاردى وڭالتۋ مەكەمەسىنە ماتەريالدىق كومەك قاجەتتىگى ايتىلدى. قازىرگى تاڭدا شىمكەنتتە مىڭنان استام بالا اۋتيزممەن اۋىرادى. وكىنىشكە قاراي, ولاردىڭ سانى جىلدان-جىلعا ءوسىپ بارادى. ال قالادا اۋتيزم سيندرومىنا شالدىققان بالالارعا وڭالتۋ قىزمەتىن كورسەتەتىن ورتالىقتار سۇرانىستىڭ از عانا بولىگىن قامتىپ وتىر. قوعامدىق بىرلەستىك وكىلدەرىنىڭ ايتۋىنا قاراعاندا, مۇنداي بالالارمەن اينالىساتىن ۇيىمدار قالادا وتە از, ەكىنشىدەن, اكىمدىك ناقتى ەشقانداي ءىس-ارەكەت جاساپ جاتقان جوق. بار اۋىرتپالىقتى اتا-انالاردىڭ وزدەرى كوتەرۋگە ءماجبۇر. سوسىن 18 جاستان اسقان مۇگەدەكتىگى بار بالالاردى وڭالتۋ مەكەمەلەرىنەن شىمكەنتتە جەكەمەنشىك بىرەۋى عانا جۇمىس ىستەپ تۇر. مۇمكىندىگى شەكتەۋلى بالا 18-گە تولعان سوڭ بار تاعدىرى وزىنە تاپسىرىلادى نەمەسە اكە-شەشەسىنىڭ يىعىنا تۇسەدى. سوندىقتان ۇكىمەتتىك ەمەس ۇيىم وكىلدەرى وسىنداي ورتالىقتاردىڭ كوبىرەك اشىلۋىنا كومەك قولىن سوزسا دەگەن تىلەگىن جەتكىزدى. ەكو – جاساندى ۇرىقتاندىرۋعا قاتىستى دا قوردان كومەك سۇرالدى. ستاتيستيكاعا سۇيەنسەك, شىمكەنتتە ەكو قاجەت ەتەتىن 400 ايەلدىڭ 30-ىنا عانا بالالى بولۋ بۇيىرىپتى. سوندا نەبارى 9-اق پايىز كەلىنشەك كۆوتا بويىنشا جاساندى جولمەن بالا كوتەرگەن.
تامىز ايىندا «قازاقستان حالقىنا» قوعامدىق قورى مەن ۇكىمەتتىك ەمەس ۇيىمدار اراسىندا ۇلكەن جيىن وتەدى. قىركۇيەك ايىندا قورعا بايلانىستى اۋقىمدى جيىن, ياعني كونفەرەنتسيا ۇيىمداستىرىلماق. سونىڭ ناتيجەسىنە قاراي قايىرىمدىلىق ۇيىمنىڭ جاڭا جۇمىس ىستەۋ ەرەجەسى مەن تۇجىرىمداماسى بەكىتىلەدى. كونفەرەنتسيانىڭ نەگىزگى مىندەتى – ۇلتتىق قايىرىمدىلىقتى دامىتۋ ماسەلەلەرى بويىنشا مەملەكەت, بيزنەس جانە ۇەۇ اراسىندا ديالوگ الاڭىن قۇرۋ, تاجىريبە, اقپارات جانە يدەيالار الماسۋ. يننوۆاتسيالىق ادىستەردى زەرتتەۋ جانە تالقىلاۋ, اشىلماعان ماسەلەلەردى جانە پروگرەسسيۆتى شەشىمدەردى ىزدەۋ, قايىرىمدىلىق سالاسىندا بولاشاققا ورتاق مىندەتتەر قويۋ دا كونفەرەنتسيانىڭ باستى تاقىرىبىنا اينالماق.
ءانۋار جۇماشباەۆ,
«Egemen Qazaqstan»
شىمكەنت
