شەكارا اشىلدى

بىراق كەيبىر شەكتەۋلەر تولىق شەشىلگەن جوق قازاق جۇرتى قۇدايى كورشىلەرىنە قاشاننان قىرىن قاراماعان. اسىرەسە, قىرعىزدارمەن اۋىلى ارالاس, قويى قورالاس. قىز الىسىپ, قىز بەرىسىپ, مىڭ جىلدىق قۇدا بولىپ جاتقاندار دا جەتەرلىك. سول قىرعىزدىڭ ءبىرازى بۇگىندە استانا, الماتى, تاراز, قورداي بازارلارىندا ساۋدا-ساتتىقپەن اينالىسىپ ءجۇر. قازاقستان, رەسەي كاسىپكەرلەرى دە كۇن سايىن قىرعىز شەكاراسىنان ءوتىپ, دوردوي بازارىن بەتكە الىپ جاتقانى. بۇل, ارينە, ءوزارا تاتۋلىق پەن تۇسىنىستىكتىڭ ارقاسى. بۇل تاتۋلىق پەن تۇسىنىستىككە, ارينە,  قىرعىز ەلىندەگى “قىزىلدى-جاسىلدى” ءتوڭ­كەرىستەر دە كەدەرگى بولا العان جوق. قازاقستان تاراپىنان گۋمانيتارلىق كومەك كورسەتىلىپ, حالىقارالىق جۇك كەرۋەندەرى مەن جولاۋشىلار قاتىناسى تولاس تاپقان جوق. ال شەكارا جا­بىلسا مەملەكەت قاۋىپسىزدىگى, شەكارا بەكەمدىگى ءۇشىن ۋاقىتشا جابىلدى. ەندى, مىنە, ەكى ەل اراسىنداعى ول شەكارا دا اشىلىپ وتىر. – كورشى ەلدەگى ساياسي جاعداي مەم­لەكەتىمىزدىڭ ىشكى جانە سىرتقى قاۋىپسىزدىگىنە كەرى اسەر ەتپەس ءۇشىن جامبىل وبلىسى بويىنشا كەدەندىك باقىلاۋ دەپارتامەنتىنە قاراستى نەگىزگى كەدەن بەكەتتەرى كۇشەيتىلگەن تارتىپتە جۇمىس جاساپ, كەدەندىك شەكارادا بىرنەشە شەكتەۋلەر قويىلعان بولاتىن. ايىر قالپاقتى اعايىندار ءبىر-بىرىمەن ءتىل تابىسقانشا قىرعىز ەلىندەگى الەۋمەتتىك-ەكونوميكالىق جاعدايدىڭ قۇلدىراپ بارا جاتقانىن بىلگەن ەلباسى ۇكىمەتكە جامبىل وبلىسىنداعى قىرعىز رەسپۋبليكاسىنىڭ ءۇش وبلىسىمەن شەكتەسەتىن “قورداي”, “سىپاتاي باتىر” جانە “ايشا ءبيبى” كەدەن بەكەتتەرىنىڭ ورتالىق وتكىزۋ پۋنكتتەرىن اشۋ تۋرالى تاپسىرما بەردى, – دەيدى جامبىل وبلىسى بويىنشا كەدەندىك باقىلاۋ دەپارتامەنتىنىڭ ءباسپاسوز قىزمەتكەرى قۇدايبەرگەن رىسداۋلەت. قازىرگى ۋاقىتتا اتالعان بەكەتتەردىڭ تەك ورتالىق وتكىزۋ پۋنكتتەرى عانا اشىلعان. بەكەتتەرگە قاتىستى باقىلاپ-وتكىزۋ پۋنكتتەرى بولسا كۇشەيتىلگەن تارتىپتە جۇمىس ىستەپ تۇر. ونداعى شەكتەۋلەر الىنعان جوق. شەكاراداعى كەدەندىك جانە كوشى-قون باقىلاۋ جۇمىستارى كۇشەيتىلگەن تارتىپتە جۇرگىزىلۋدە. بەكەتتەر ارقىلى حالىقارالىق كولىك ترانزيتىنە, ياعني جۇك جانە جولاۋشىلار قاتىناسىنا جانە ازىق-ت ۇلىك پەن اۋىل­شارۋاشىلىق ونىمدەرىن تاسىمالداۋعا رۇقسات ەتىلگەن. كوسەمالى ساتتىباي ۇلى, جامبىل وبلىسى.