«رۋحاني جاڭعىرۋ» باعدارلاماسى كوپتەگەن يگى ءىستىڭ ورىندالۋىنا جول اشتى. باستاما كەتكەنىمىزدى كەلتىرىپ, كەم-كەتىگىمىزدى جاماۋعا سەپتىگىن تيگىزگەنى جاسىرىن ەمەس. ەسكەرۋسىز قالعان ەسىل ەرلەرىمىز ەلەنىپ, تاريحي ورىندار قورعاۋعا الىنۋدا. وسىنداي اۋىز تولتىرىپ ايتار تاعى ءبىر ونەگەلى ءىستى «ناق-بىرلىك» قوعامدىق ۇيىمى مەن وبلىستىق قازاقستان حالقى اسسامبلەياسى جۇزەگە اسىرعان.
ولار 2018 جىلى ماسكەۋدەگى مۋزەيدەن اقىن سارانىڭ قۇندى جادىگەرلەرىن تاۋىپ اكەلگەن. مۇحامەدجان تىنىشپاەۆ اتىنداعى وبلىستىق تاريحي-ولكەتانۋ مۋزەيىندە تۇرعان جادىگەر كوزگە وتتاي باسىلادى. مۋزەي ديرەكتورى رىسجان ايازباەۆا قۇندى جادىگەر حالىقتىڭ ىستىق ىقىلاسىنا يە بولعانىن جەتكىزدى.
«حالقىمىزدا: «سەنگەنىڭنەن سۇيەنەرىڭ مىقتى بولسىن», دەگەن اتالى ءسوز بار. بۇگىندە ارتىندا قالعان ۇرپاعى سارا تاستانبەكقىزىنىڭ جوعىن جوقتاۋدا. سۇيەنەرىنىڭ مىقتى ەكەنى وسىدان-اق بەلگىلى. وتكەندى جانداندىرۋ ارقىلى بولاشاققا بارارىمىز بەلگىلى. «رۋحاني جاڭعىرۋ» باعدارلاماسى اياسىندا قولعا العان بۇل جۇمىستىڭ بولاشاق ءۇشىن بەرەرى مول. ەندەشە, سىرت ەلدەن اكەلىنگەن قۇندى دۇنيەمىز ەلدىڭ بولاشاعىنا قىزمەت ەتسىن», دەيدى ر.ايازباەۆا.
اتالعان جادىگەرلەردى مۇراجايعا ءمۇسىنشى مارگاريتا ۆاششەنكو وتكىزگەن. ول كەزىندە تالدىقورعان وبلىسىنىڭ باس ساۋلەتشىسى بولعان. سول جىلدارى مارگاريتا ۆاششەنكو اقسۋ اۋدانىنىڭ كوشكەنتال اۋىلىنا جانە جانسۇگىر ەلدى مەكەنىنە سارا تاستانبەكقىزىنىڭ ەسكەرتكىشىن ورناتادى. ءوزى ومىردەن وتەردە قىزى گەليا تيموفەەۆاعا اقىن سارانىڭ پورترەتىن, قۇجاتتارىن قازاق ەلىنە جەتكىز دەپ اماناتتاپ كەتكەن ەكەن.
قازاق قىزدارىنىڭ تەڭدىگىن جىرلاعان اقىننىڭ جادىگەرلەرىن اكەلۋگە «ناق-بىرلىك» قوعامدىق قورىنىڭ توراعاسى ورالبەك جاقيانوۆ كوپ كۇش جۇمساعان. ەلشىلىكپەن كەلىسۋ, مۇراعاتتان قۇندى جادىگەرلەردى الۋ, اماناتتى جەتكىزۋشى سالتانات مەڭلىباەۆانىڭ بارىپ-كەلۋىن قامتاماسىز ەتۋ وڭاي شارۋا ەمەس ەدى.
«مارگاريتا ۆاششەنكو قازاق ەلىن شەكسىز سۇيگەن. ەلگە دەگەن قۇرمەتىن اقىن ساراعا ەسكەرتكىش ورناتۋى جانە ماسكەۋدەگى جادىگەرلەردى ەلگە جەتكىزۋ جايلى قىزىنا ايتىپ كەتكەن اماناتىنان اڭعارۋعا بولادى. وسى اقىن مۇراسىن ەلگە جەتكىزۋدە ۇلكەن ەڭبەك سىڭىرگەن سالتانات داۋلەتحانقىزىنا راحمەت ايتۋىمىز كەرەك. ول شەتەل مۇراعاتىنان 12 قۇندى جادىگەردى شاشاۋ شىعارماي ەلگە جەتكىزىپ, بۇگىن ولكەتانۋ مۋزەيىنە تابىستاپ وتىر», دەيدى و.جاقيانوۆ.
ۋاعىندا ەلدىڭ قۇرمەتىنە بولەنىپ, حالىقتىڭ ماحابباتىنا يە بولعان اقىن قىزدىڭ تاعدىر تىزگىنىنىڭ ءوز قولدارىنان سۋسىپ شىعىپ بارا جاتقانىن سەزگەن باي-باعلاندار كوپكە كورەنەۋ قارسى شىعا الماي, ونىڭ باسىنا بوستاندىق بەرگەن ەدى. ءسويتىپ اقىن سارا ءوزىنىڭ اسقان دارىنىنىڭ ارقاسىندا باسىنا ازاتتىق الىپ قول جەتكىزىپ, ون توعىز جاسىندا ءوز تەڭىن تاپقان. بۇل تاسادا جاتقان پورترەتتە ءوز ورداسىن تاپتى دەپ ويلايمىز.
جەتىسۋ وبلىسى
